കിലോയ്ക്ക് 300 രൂപ കടന്നു; റെക്കോര്‍ഡിട്ട് റബര്‍ വില, കര്‍ഷകര്‍ 'ഹാപ്പി'

തിരുവനന്തപുരം: ചരിത്രത്തിലാദ്യമായി 300 കടന്ന് റെക്കോര്‍ഡ് നിലവാരത്തിലെത്തി റബര്‍ വില. ആര്‍എസ്എസ്- 4 ഗ്രേഡ് റബര്‍ കിലോയ്ക്ക് 300 രൂപയ്ക്കാണ് ഇന്നലെ വ്യാപാരം നടന്നത്. ഉല്‍പ്പാദനക്കുറവും വര്‍ധിച്ചുവരുന്ന ആവശ്യകതയുമാണ് ആഭ്യന്തര മാര്‍ക്കറ്റില്‍ റബര്‍വില വര്‍ധനയ്ക്കുള്ള കാരണമായി വിലയിരുത്തുന്നത്. റബര്‍ വിപണിയിലെ ഉണര്‍വില്‍ ഏറെ പ്രതീക്ഷയിലാണ് കര്‍ഷകരും വ്യാപാരികളും.

ഈ വര്‍ഷം ജനുവരിയില്‍ 192 രൂപ ആയിരുന്നു റബര്‍ വില. ഒമ്പത് മാസത്തിനിടെയാണ് 108 രൂപയോളം കൂടിയത്. നിലവില്‍ ആര്‍എസ്എസ് (RSS-4) ഗ്രേഡ് റബറിനാണ് 300 രൂപയിലെത്തിയിരിക്കുന്നത്. ആര്‍എസ്എസ്-5 ഗ്രേഡിന് 298 രൂപയും, ലാറ്റക്‌സിന് 197 രൂപയുമാണ് നിലവിലെ വിപണി വില. പശ്ചിമേഷ്യയിലെ സംഘര്‍ഷം മൂലം കപ്പല്‍ മാര്‍ഗമുള്ള ചരക്കുനീക്കം തടസ്സപ്പെട്ടതും ഇന്തോനേഷ്യ, മലേഷ്യ തുടങ്ങിയ പ്രധാന റബര്‍ ഉല്‍പ്പാദക രാജ്യങ്ങളിലെ മോശം കാലാവസ്ഥയുമാണ് വില കുതിച്ചുയരാന്‍ കാരണം.