മുംബൈ: ഓഹരി വിപണിയില് കനത്ത ഇടിവ്. അമേരിക്ക- ഇറാന് സംഘര്ഷമാണ് പ്രധാനമായി ഓഹരി വിപണിയെ ബാധിച്ചത്. വ്യാപാരത്തിന്റെ തുടക്കത്തില് തന്നെ സെന്സെക്സ് 500 പോയിന്റ് ആണ് താഴ്ന്നത്. നിഫ്റ്റി 24,000ന് തൊട്ടുമുകളിലാണ്.
ഒരിടവേളയ്ക്ക് ശേഷം അമേരിക്ക- ഇറാന് സംഘര്ഷം വീണ്ടും കനത്തതാണ് ഓഹരി വിപണിയില് പ്രതിഫലിച്ചത്. എണ്ണനീക്കത്തിന്റെ അഞ്ചിലൊന്ന് കടന്നുപോകുന്ന ഹോര്മുസ് കടലിടുക്കിന്റെ നിയന്ത്രണം സംബന്ധിച്ച് ഇറാനും അമേരിക്കയും തമ്മില് തര്ക്കം നിലനില്ക്കുകയാണ്. ഹോര്മുസ് കടലിടുക്കിന്റെ നിയന്ത്രണാധികാരം തങ്ങള്ക്ക് ആണ് എന്നാണ് ഇറാന് പറയുന്നത്. എന്നാല് നിയന്ത്രണം അമേരിക്ക ഏറ്റെടുക്കുമെന്ന് പ്രഖ്യാപിച്ചതിന് പിന്നാലെ ഇറാന് നാവിക ഉപരോധം ഏര്പ്പെടുത്തിയിരിക്കുകയാണ് അമേരിക്കന് പ്രസിഡന്റ് ഡോണള്ഡ് ട്രംപ്. സുരക്ഷിത യാത്രയ്ക്കായി കാര്ഗോ കപ്പലുകള്ക്ക് 20 ശതമാനം ഫീസ് ഈടാക്കുമെന്നും ട്രംപ് പ്രഖ്യാപിച്ചു. അതേസമയം തങ്ങളുടെ അനുവാദമില്ലാതെ യുഎസ് സേന ഈ പാതയിലൂടെ കടന്നുപോകാന് ശ്രമിച്ചാല് അതിനെ ശക്തമായി നേരിടുമെന്ന് ഇറാന് സൈന്യം മുന്നറിയിപ്പ് നല്കി.
ഇതോടെ ഹോര്മുസ് കടലിടുക്ക് സാധാരണനിലയിലേക്ക് വരുമെന്ന പ്രതീക്ഷകള്ക്ക് മങ്ങലേറ്റിരിക്കുകയാണ്. ഇതിനെ തുടര്ന്ന് എണ്ണവില കുതിക്കുന്നതാണ് യഥാര്ഥത്തില് ഓഹരി വിപണിയില് പ്രതിഫലിക്കുന്നത്. രണ്ടുദിവസത്തിനിടെ എണ്ണവിലയില് 11 ശതമാനത്തിന്റെ വര്ധനയാണ് രേഖപ്പെടുത്തിയത്. പ്രധാനമായി എച്ച്ഡിഎഫ്സി ബാങ്ക്, എച്ച്സിഎല് ടെക്, ഇന്ഫോസിസ്, ബജാജ് ഫിനാന്സ് ഓഹരികളാണ് നഷ്ടം നേരിടുന്നത്.
അതിനിടെ ഡോളറിനെതിരെ രൂപയുടെ മൂല്യവും ഇടിഞ്ഞു. വ്യാപാരത്തിന്റെ തുടക്കത്തില് 48 പൈസയുടെ ഇടിവോടെ 96 കടന്നിരിക്കുകയാണ് രൂപയുടെ മൂല്യം. എണ്ണവില വര്ധന തന്നെയാണ് രൂപയെ ബാധിച്ചത്. ഇതിനെ തുടര്ന്ന് ഡോളര് ശക്തിയാര്ജിച്ചതും രൂപയ്ക്ക് വിനയായി. ഇന്നലെ 30 പൈസയുടെ നഷ്ടമാണ് രൂപ നേരിട്ടത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
