മുംബൈ: യുഎസ് ഫെഡറല്‍ റിസര്‍വ് പലിശനിരക്ക് കുറയ്ക്കുമെന്ന പ്രതീക്ഷയില്‍ ഓഹരി വിപണിയില്‍ മുന്നേറ്റം. പലിശനിരക്ക് കുറച്ചുകൊണ്ടുള്ള യുഎസ് കേന്ദ്രബാങ്കിന്റെ പ്രഖ്യാപനം ഇന്ന് ഉണ്ടാവുമെന്ന പ്രതീക്ഷയില്‍ ഇന്ന് ആഗോള വിപണികളെല്ലാം തന്നെ നേട്ടത്തിലായിരുന്നു. ഇത് ഇന്ത്യന്‍ വിപണിയിലും പ്രതിഫലിക്കുകയായിരുന്നു. സെന്‍സെക്‌സ് 400ലധികം പോയിന്റ് ആണ് മുന്നേറിയത്. നിഫ്റ്റി 26000 എന്ന സൈക്കോളജിക്കല്‍ ലെവലിനും മുകളിലാണ്.
മാസങ്ങള്‍ നീണ്ട അനിശ്ചിതാവസ്ഥയ്ക്ക് വിരാമമിട്ട് ഉടന്‍ തന്നെ ഇന്ത്യയും അമേരിക്കയും വ്യാപാര കരാറില്‍ ഒപ്പിടുമെന്ന പ്രതീക്ഷകളും വിപണിയില്‍ പ്രതിഫലിക്കുന്നുണ്ട്. നിലവില്‍ ഇന്ത്യയില്‍ നിന്നുള്ള ഉല്‍പ്പന്നങ്ങള്‍ക്ക് 50 ശതമാനമാണ് അമേരിക്കയില്‍ ഇറക്കുമതി തീരുവ. ഇത് 20 ശതമാനത്തില്‍ താഴയാകുമെന്ന റിപ്പോര്‍ട്ടുകളാണ് വിപണിക്ക് കരുത്തുപകരുന്നത്. ഈ അനുകൂല സൂചനകളെ തുടര്‍ന്ന് വിദേശനിക്ഷേപകര്‍ ഇന്ത്യന്‍ വിപണിയില്‍ ഓഹരികള്‍ വാങ്ങിക്കൂട്ടുന്നത് ആരംഭിച്ചിട്ടുണ്ട്. ഇതാണ് വിപണിയുടെ മുന്നേറ്റത്തിന് കാരണമെന്ന് വിദഗ്ധര്‍ അഭിപ്രായപ്പെട്ടു. കൂടാതെ രൂപ ശക്തിയാര്‍ജിച്ചതും വിപണിയെ സ്വാധീനിക്കുന്നുണ്ട്.
ചൊവ്വാഴ്ച മാത്രം പതിനായിരം കോടിയലധികം രൂപ മൂല്യമുള്ള ഓഹരികളാണ് വിദേശ നിക്ഷേപകര്‍ വാങ്ങിക്കൂട്ടിയത്. ജൂണ്‍ 25ന് ശേഷം ഒരു ദിവസം നടക്കുന്ന ഏറ്റവും വലിയ വാങ്ങിക്കൂട്ടല്‍ ആണിത്. അസംസ്‌കൃത എണ്ണവില കുറഞ്ഞതും വിപണിയില്‍ പ്രതിഫലിക്കുന്നുണ്ട്. പ്രധാനമായി ഐസിഐസിഐ ബാങ്ക്, റിലയന്‍സ്, ടാറ്റ സ്റ്റീല്‍, എച്ച്ഡിഎഫ്‌സി ബാങ്ക്, എസ്ബിഐ ഓഹരികളാണ് നേട്ടം ഉണ്ടാക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
