ന്യൂഡല്ഹി: ടെക്സ്റ്റ് സന്ദേശങ്ങള് മറച്ചുവെയ്ക്കാന് സാധിക്കുന്ന ഫീച്ചര് വാട്സ്ആപ്പ് പരീക്ഷിക്കുന്നതായി റിപ്പോര്ട്ട്. സന്ദേശങ്ങള് സ്പോയിലറുകളായി മറയ്ക്കാന് ഉപയോക്താക്കളെ അനുവദിക്കുന്ന ഫീച്ചര് നിലവില് പരീക്ഷണ ഘട്ടത്തിലാണെന്നാണ് വാബീറ്റ ഇന്ഫോ റിപ്പോര്ട്ട് ചെയ്യുന്നത്.
ഈ ഫീച്ചറിലൂടെ ഉപയോക്താക്കള്ക്ക് സന്ദേശങ്ങള് മറച്ചുവയ്ക്കാന് സാധിക്കുന്നതിനാല് സന്ദേശങ്ങള് വായിക്കുന്നതിന് ആദ്യം അതത് സന്ദേശങ്ങളില് ടാപ്പ് ചെയ്യണം. ഐഒഎസിലെ ഏറ്റവും പുതിയ വാട്ട്സ്ആപ്പ് ബീറ്റ പതിപ്പായ 26.6.10.71-ല് പുതിയ അപ്ഡേറ്റ് കണ്ടെത്തിയിട്ടുണ്ട്.
സ്പോയിലര് ഫീച്ചര് നിലവില് ടെക്സ്റ്റ് സന്ദേശങ്ങളില് മാത്രമായി പരിമിതപ്പെടുത്തിയിരിക്കുന്നു, ചിത്രങ്ങള്, വീഡിയോകള് അല്ലെങ്കില് മറ്റ് ഫയലുകള് എന്നിവയില് ഫീച്ചര് ലഭ്യമാകില്ല. 'ഇന്വിസിബിള് ഇങ്ക്' ഫോര്മാറ്റിങ് ഉപയോഗിച്ച് ഉപയോക്താക്കള്ക്ക് ടെക്സ്റ്റ് മറയ്ക്കാന് അനുവദിക്കുന്ന സമാനമായ ഒരു ഫീച്ചര് ആപ്പിളിന്റെ ഐമെസേജ് നല്കുന്നുണ്ട്.
എന്താണ് വാട്സ്ആപ്പിന്റെ സ്പോയിലര് ഫോര്മാറ്റിങ് ഫീച്ചര്
ഒരു സന്ദേശം സ്പോയിലറായി അടയാളപ്പെടുത്തുമ്പോള് ഈ ഫീച്ചര് പ്രവര്ത്തിക്കും. തുടര്ന്ന് ചാറ്റില് ഡിഫോള്ട്ടായി ഈ ഉള്ളടക്കം മറഞ്ഞിരിക്കുന്നതായി ദൃശ്യമാകും. സ്പോയിലര് ഫോര്മാറ്റിങ് നീക്കം ചെയ്യാനും ടെക്സ്റ്റ് വായിക്കാനും സ്വീകര്ത്താവ് മെസേജ് ബബിളില് ടാപ്പ് ചെയ്യേണ്ടതുണ്ട്.
ഒരു സന്ദേശത്തിന്റെ ടെക്സ്റ്റ് തെരഞ്ഞെടുത്തതിന് ശേഷം സന്ദേശം മറയ്ക്കാനുള്ള ഓപ്ഷന് ടെക്സ്റ്റ്-ഫോര്മാറ്റിങ് കോണ്ടെക്സ്റ്റ് മെനുവില് ദൃശ്യമാകുമെന്ന് റിപ്പോര്ട്ട് സൂചിപ്പിക്കുന്നു. ഫോര്മാറ്റിങ് പ്രയോഗിക്കുന്നതിന് ഉപയോക്താക്കള്ക്ക് 'സ്പോയിലര്' ഓപ്ഷനില് ടാപ്പ് ചെയ്യാം. സന്ദേശങ്ങള് കണ്ടതിനുശേഷവും സ്പോയിലറുകളായി ഇവ അടയാളപ്പെടുത്തിയിരിക്കും. ഒരു ഉപയോക്താവ് ആപ്പ് ക്ലോസ് ചെയ്ത് വീണ്ടും തുറക്കുകയാണെങ്കില്, സന്ദേശം വീണ്ടും ടാപ്പ് ചെയ്യേണ്ടതുണ്ട്. ഇത് ഉള്ളടക്കം ഡിഫോള്ട്ടായി മറഞ്ഞിരിക്കുന്നതായി ഉറപ്പാക്കുന്നു. ചില ബീറ്റാ ടെസ്റ്റര്മാര്ക്ക് മെനുവില് സ്പോയിലര് ഓപ്ഷന് ലഭ്യമായേക്കാമെന്നും റിപ്പോര്ട്ട് പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
