1.9 കോടി രൂപയുടെ സ്കോളർഷിപ്പ്; കുസാറ്റ് പൂർവവിദ്യാർഥിക്ക് ഓസ്‌ട്രേലിയയിൽ പിഎച്ച്‌ഡി നേടാൻ അവസരം

കൊച്ചി: കൊച്ചി ശാസ്ത്ര സാങ്കേതിക സർവകലാശാലയിലെ (കുസാറ്റ്) പൂർവവിദ്യാർഥിക്ക് 1.9 കോടി രൂപയുടെ സ്കോളർഷിപ്പ്. ഓസ്‌ട്രേലിയയിലെ പ്രശസ്ത ഫ്ലിൻഡേഴ്‌സ് സർവകലാശാലയിൽ ഫിസിക്സ് എഡ്യൂക്കേഷനിൽ പിഎച്ച്ഡി പഠനത്തിന് ആണ് 1.9 കോടി രൂപയുടെ സ്കോളർഷിപ്പോടെ ആദിത്യന് അവസരം ലഭിച്ചത്. 2022-24 എംഎസ് സി ഫിസിക്സ് ബാച്ചിലെ വിദ്യാർഥിയാണ് ആദിത്യ പി എസ്.

മൂന്നര വർഷമാണ് ഈ സ്കോളർഷിപ്പിന്റെ ദൈർഘ്യം. ഫ്ലിൻഡേഴ്സ് സർവകലാശാല കോളേജ് ഓഫ് സയൻസ് ആൻഡ് എൻജിനീയറിങ്ങിലെ ഫിസിക്സ് പ്രൊഫസർ മറിയ പരപ്പിള്ളിയുടെ മേൽനോട്ടത്തിലാണ് ഗവേഷണം നടക്കുക.

നിലവിൽ, കേരളത്തിലെ പ്രമുഖ എസ് ടി എ എം എഡ്യൂക്കേഷൻ റിസർച്ച് സ്ഥാപനമായ ക്യൂറിഫൈ റിസർച്ച് സെന്ററിൽ പ്രവർത്തിച്ചുകൊണ്ടിരിക്കെയാണ് ആദിത്യ ഈ നേട്ടം കൈവരിച്ചത്. തൃശൂർ സ്വദേശിയായ ആദിത്യ. സുരേഷ്, റഹന എന്നിവരാണ് മാതാപിതാക്കൾ.