ഗ്രാജുവേറ്റ് ആപ്റ്റിറ്റ്യൂഡ് ടെസ്റ്റ് ഇൻ എൻജിനിയറിങ് ( GATE-ഗേറ്റ്) 2026നുള്ള രജിസ്ട്രേഷൻ തീയതി നീട്ടി നൽകി വിജ്ഞാപനം പുറത്തിറക്കി. നേരത്തെ സെപ്റ്റംബ‍ർ 25 നായിരുന്നു അവസാന തീയതിയായി പ്രഖ്യാപിച്ചിരുന്നത്. പിന്നീടത് സെപ്റ്റംബ‍ർ 28 വരെയാക്കിയിരുന്നു. ഇപ്പോൾ ഒക്ടോബർ ആറ് വരെ നീട്ടിയാണ് വിജ്ഞാപനം.
ലേറ്റ് ഫീസ് അടച്ച് ഒക്ടോബർ ഒമ്പത് വരെ അപേക്ഷിക്കാനാകും. പരീക്ഷ നേരത്തെ പ്രഖ്യാപിച്ചത് പോലെ 2026 ഫെബ്രുവരി 7,8,14,15 തീയതികളിലായി നടക്കും. ഗേറ്റ് പരീക്ഷാ ഫലം മാ‍ർച്ച് 19 ന് പ്രഖ്യാപിക്കും. ഗേറ്റ് സ്കോറിന് ഫലം പ്രഖ്യാപിച്ച തീയതി മുതൽ മൂന്ന് വർഷത്തേക്ക് സാധുതയുണ്ടായിരിക്കും.
വിവിധ മാസ്റ്റേഴ്‌സ്, ഡോക്ടറൽ പ്രോഗ്രാമുകളിലേക്കുള്ള പ്രവേശനത്തിനും ചില പൊതുമേഖലാ സ്ഥാപനങ്ങളിലേക്കുള്ള നിയമനത്തിനും ഗേറ്റ് സ്കോറിന് സാധുതയുണ്ട്.
ഇത്തവണ എൻജിനിയറിങ് സയൻസസ് പേപ്പറിൽ എനർജി സയൻസിനെക്കുറിച്ചുള്ള ഒരു പുതിയ വിഭാഗം ഉണ്ടായിരിക്കും.
2026 ഫെബ്രുവരിയിൽ നടക്കുന്ന ഗ്രാജുവേറ്റ് ആപ്റ്റിറ്റ്യൂഡ് ടെസ്റ്റ് ഇൻ എൻജിനിയറിങ് (ഗേറ്റ്) 2026 ന്റെ സംഘാടക സ്ഥാപനം ഐഐടി ഗുവാഹത്തി ആണ്
ഗേറ്റ് 2026 ഫെബ്രുവരി 7, 8,(ശനി,ഞായർ) ഫെബ്രുവരി 14, 15 തീയതികളിൽ (ശനി, ഞായർ) നടക്കും. ഓരോ ദിവസവും രണ്ട് സെഷനുകൾ നടക്കും - രാവിലെ 9:30 മുതൽ ഉച്ചയ്ക്ക് 12:30 വരെയും ഉച്ചയ്ക്ക് 2:30 മുതൽ വൈകുന്നേരം 5:30 വരെയുമായിരിക്കും പരീക്ഷാർത്ഥികൾക്ക് ഏതെങ്കിലും ഒന്ന് തെരഞ്ഞെടുക്കാം.
ഗേറ്റ് 2026 പ്രധാന തീയതികൾ :https://gate2026.iitg.ac.in/important-dates.html
യുജി ഡിഗ്രി പ്രോഗ്രാമിന്റെ മൂന്നാം വർഷമോ അതിൽ കൂടുതലോ വർഷങ്ങളിൽ പഠിക്കുന്നവരോ എൻജിനിയറിങ്, ടെക്നോളജി, ആർക്കിടെക്ചർ, സയൻസ്, ആർട്സ്, ഹ്യുമാനിറ്റീസ് എന്നിവയിൽ സർക്കാർ അംഗീകൃത ബിരുദം പൂർത്തിയാക്കിയവരോ ആയിരിക്കണം.
ഇൻസ്റ്റിറ്റ്യൂഷൻ ഓഫ് എൻജിനിയേഴ്‌സ് (ഇന്ത്യ) (IE),ഇൻസ്റ്റിറ്റ്യൂഷൻ ഓഫ് സിവിൽ എഎൻജിനിയേഴ്സ് (ICE),ഇൻസ്റ്റിറ്റ്യൂഷൻ ഓഫ് ഇലക്ട്രോണിക്‌സ് ആൻഡ് ടെലികമ്മ്യൂണിക്കേഷൻ എൻജിനിയേഴ്‌സ് (IETE),എയറോനോട്ടിക്കൽ സൊസൈറ്റി ഓഫ് ഇന്ത്യ (AeSI),ഇന്ത്യൻ ഇൻസ്റ്റിറ്റ്യൂട്ട് ഓഫ് കെമിക്കൽ എൻജിനിയേഴ്‌സ്, ഇൻക്ലൂഡിങ് പോളിമർ ആൻഡ് എൻവയോൺമെന്റൽ ഗ്രൂപ്പ് (IIChE),ഇന്ത്യൻ ഇൻസ്റ്റിറ്റ്യൂട്ട് ഓഫ് മെറ്റൽസ് (IIM),ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഡസ്ട്രിയൽ എൻജിനിയേഴ്‌സ് (IIIE) എന്നിങ്ങനെയുള്ള ഏതെങ്കിലും പ്രൊഫഷണൽ സൊസൈറ്റികളിൽ നിന്ന് സർട്ടിഫിക്കേഷൻ നേടിയവർക്ക്, B.E./B.Tech./B.Arch./B.Planning മുതലായവയ്ക്ക് തുല്യമായി MoE/AICTE/UGC/UPSC അംഗീകരിച്ചിട്ടുണ്ടെന്ന് ഉറപ്പാക്കണം. അങ്ങനെയുള്ളവർക്ക് അപേക്ഷിക്കാം.
ഏതെങ്കിലും ബിരുദ പ്രോഗ്രാമിന്റെ മൂന്നാം വർഷമോ അതിൽ കൂടുതലോ വർഷങ്ങളിൽ പഠിക്കുന്നവരോ എൻജിനിയറിങ് /ടെക്നോളജി/ആർക്കിടെക്ചർ/ സയൻസ്/കൊമേഴ്‌സ്/ആർട്സ്/ഹ്യുമാനിറ്റീസ് എന്നിവയിൽ സർക്കാർ അംഗീകൃത ബിരുദ പ്രോഗ്രാം പൂർത്തിയാക്കിയവരോ ആയവർക്ക് ഗേറ്റ് 2026 എഴുതാൻ അർഹതയുണ്ട്.
ഇന്ത്യ ഒഴികെയുള്ള രാജ്യങ്ങളിൽ നിന്ന് യോഗ്യതാ ബിരുദം നേടിയ/പഠിക്കുന്ന അപേക്ഷകർ നിലവിൽ മൂന്നാം വർഷമോ അതിൽ കൂടുതലോ വർഷത്തിലായിരിക്കണം അല്ലെങ്കിൽ എൻജിനിയറിങ് / ടെക്നോളജി/ ആർക്കിടെക്ചർ/സയൻസ്/കൊമേഴ്‌സ്/ആർട്സ്/ഹ്യുമാനിറ്റീസ് എന്നിവയിൽ ബാച്ചിലേഴ്സ് ബിരുദം (കുറഞ്ഞത് മൂന്ന് വർഷത്തെ കാലാവധി) പൂർത്തിയാക്കിയിരിക്കണം.
ഒരു പരീക്ഷാർത്ഥിക്ക് ഒന്നോ രണ്ടോ പരീക്ഷകൾക്ക് അപേക്ഷിക്കാം. പരീക്ഷാർത്ഥികൾക്ക് അവർ തെരഞ്ഞെടുത്ത രണ്ട് പേപ്പറുകൾ മാത്രമെ എഴുതാൻ അനുവദിക്കൂ.
പൊതുവിഭാഗത്തിൽ ഉള്ളവർ ഒക്ടോബർ ആറ് വരെ ഫീസ് അടയ്ക്കുമ്പോൾ ഒരു പേപ്പറിന് 2000 രൂപ അടയ്ക്കണം. സ്ത്രീകൾ, പട്ടികജാതി,പട്ടികവർഗ ഭിന്നശേഷിക്കാർ എന്നിവർ 1,000രൂപ ഒടുക്കിയാൽ മതിയാകും. ഒക്ടോബർ ഒമ്പത് വരെ ലേറ്റ് ഫീസ് ഉൾപ്പടെ അടയ്ക്കുമ്പോൾ അത് യഥാക്രമം 1,500 രൂപയും 2,500 രൂപയും ഒടുക്കണം. ഈ അപേക്ഷാ ഫീസ് ഒരു പരീക്ഷാ പേപ്പറിനുള്ളതാണ്. രണ്ട് പേപ്പറുകൾ തെരഞ്ഞെടുക്കുന്ന വിദ്യാർത്ഥികൾ ഇതിന്റെ ഇരട്ടി ഫീസ് അടയ്ക്കണം.
വിശദവിവരങ്ങൾക്ക്: https://gate2026.iitg.ac.in/
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
