മസ്കത്തിലെ ഇന്ത്യൻ സ്കൂളിൽ അധ്യാപക തസ്തികകളിൽ ഒഴിവ്; കൗൺസിലർമാർക്കും അവസരം

ഒമാനിലെ മസ്‌കത്തിൽ സ്ഥിതി ചെയ്യുന്ന ഇന്ത്യൻ സ്‌കൂളിൽ അധ്യാപക, അനധ്യാപക തസ്തികകളിൽ നിയമനം നടത്തുന്നു. വിവിധ വിഷയങ്ങളിൽ അധ്യാപകരെയും,ബാൻഡ് മാസ്റ്റർ, നൃത്ത അധ്യാപകർ,കൗൺസിലർ തുടങ്ങിയ തസ്തികയിലാണ് ഒഴിവുകൾ ഉള്ളത്. അപേക്ഷകൾ സമർപ്പിക്കേണ്ട അവസാന തീയതി ഡിസംബർ 20.

ഒഴിവുകൾ

സീനിയർ സെക്ഷൻ (പിജിടി) - ബന്ധപ്പെട്ട വിഷയത്തിൽ ബി.എഡും മാസ്റ്റേഴ്സ് ബിരുദവും ഉള്ള അധ്യാപകർ, കൂടാതെ താഴെപ്പറയുന്ന വിഷയങ്ങളിൽ കുറഞ്ഞത് 5 വർഷത്തെ അധ്യാപന പരിചയം ഉണ്ടായിരിക്കണം. വിഷയങ്ങൾ: ഇംഗ്ലീഷ്, മാത്തമാറ്റിക്സ്, ഫിസിക്സ്, കെമിസ്ട്രി, ബയോളജി, അക്കൗണ്ടൻസി, ബിസിനസ് സ്റ്റഡീസ്, ഇക്കണോമിക്സ്, കമ്പ്യൂട്ടർ സയൻസ്, ഹിന്ദി.

മിഡിൽ സെക്ഷൻ (ടിജിടി) - ബന്ധപ്പെട്ട വിഷയത്തിൽ ബി.എഡും ബാച്ചിലർ/മാസ്റ്റേഴ്സ് ബിരുദവും ഉള്ള അധ്യാപകർ, കൂടാതെ താഴെപ്പറയുന്ന വിഷയങ്ങളിൽ കുറഞ്ഞത് 4 വർഷത്തെ അധ്യാപന പരിചയം ഉണ്ടായിരിക്കണം. വിഷയങ്ങൾ: ഇംഗ്ലീഷ്, മാത്തമാറ്റിക്സ്, സയൻസ്, സോഷ്യൽ സയൻസ്, ആർട്ടിഫിഷ്യൽ ഇന്റലിജൻസ്, കമ്പ്യൂട്ടർ സയൻസ്, ഫ്രഞ്ച്, ഹിന്ദി.

പ്രൈമറി സെക്ഷൻ (പിആർടി) - ബന്ധപ്പെട്ട വിഷയത്തിൽ ബി.എഡും ബാച്ചിലർ/മാസ്റ്റേഴ്സ് ബിരുദവും ഉള്ള അധ്യാപകർ, കൂടാതെ താഴെപ്പറയുന്ന വിഷയങ്ങളിൽ കുറഞ്ഞത് 3 വർഷത്തെ അധ്യാപന പരിചയം ഉണ്ടായിരിക്കണം: ഇംഗ്ലീഷ്, മാത്തമാറ്റിക്സ്, സയൻസ്, സോഷ്യൽ സയൻസ്, ഹിന്ദി.

കിന്റർഗാർട്ടൻ സെക്ഷൻ - മോണ്ടിസോറി/ഇസിഇ/പിപിടിടിസി/എൻടിടിസി/ബി.എഡ് യോഗ്യതയുള്ള അധ്യാപകർ. ബിരുദം/മാസ്റ്റർ ബിരുദം, കുറഞ്ഞത് 3 വർഷത്തെ അധ്യാപന പരിചയം.

ബാൻഡ് മാസ്റ്റർ - അംഗീകൃത സ്ഥാപനങ്ങളിൽ നിന്നോ സർവകലാശാലകളിൽ നിന്നോ ആവശ്യമായ യോഗ്യത (ഇൻസ്ട്രുമെന്റൽ മ്യൂസിക്കിൽ ബാച്ചിലർ/മാസ്റ്റർ ബിരുദം അല്ലെങ്കിൽ ഡിപ്ലോമ) ഉള്ള അധ്യാപകർക്ക് അപേക്ഷിക്കാം. ബന്ധപ്പെട്ട മേഖലയിൽ കുറഞ്ഞത് 5 വർഷത്തെ പരിചയം. പ്രതിരോധം/അർദ്ധസൈനിക വിഭാഗം/ പൊലീസ് സേനയിൽ പ്രസക്തമായ പരിചയം ഉള്ള ഉദ്യോഗാർത്ഥികൾക്കും മുകളിൽ പറഞ്ഞ തസ്തികയിലേക്ക് അപേക്ഷിക്കാം.

നൃത്ത അധ്യാപകർ- അംഗീകൃത സ്ഥാപനങ്ങളിൽ നിന്നോ സർവകലാശാലകളിൽ നിന്നോ ബന്ധപ്പെട്ട വിഷയത്തിൽ ബാച്ചിലർ/മാസ്റ്റർ ബിരുദവും ഏതെങ്കിലും അധിക ഡിപ്ലോമയും ഉള്ള അധ്യാപകർക്ക് അപേക്ഷിക്കാം. കുറഞ്ഞത് 3 വർഷത്തെ അധ്യാപന പരിചയം ആവശ്യമാണ്.

കൗൺസിലർ - ബന്ധപ്പെട്ട വിഷയത്തിൽ മാസ്റ്റർ ബിരുദവും പൊതു/അന്താരാഷ്ട്ര സ്കൂളിൽ കൗൺസിലറായി കുറഞ്ഞത് 5 വർഷത്തെ പരിചയവും ഉള്ള കൗൺസിലർമാർക്ക് അപേക്ഷിക്കാം.

കൂടുതൽ വിവരങ്ങൾക്ക് https://ismoman.com/career.html സന്ദർശിക്കുക.