വനിതകൾക്ക് തൊഴിൽ അവസരം; മഹിളാ സമഖ്യ സൊസൈറ്റിയിൽ നിയമനം

തിരുവനന്തപുരം ജില്ലയിലെ ഇന്റഗ്രേറ്റഡ് ചൈൽഡ് കെയർ സെന്ററിൽ കെയർ ടേക്കർ തസ്തികയിലേക്ക് വനിതാ ഉദ്യോഗാർഥികൾക്കായി വാക്-ഇൻ ഇന്റർവ്യൂ നടത്തുന്നു. കേരള മഹിളാ സമഖ്യ സൊസൈറ്റിയുടെ നിയന്ത്രണത്തിൽ വനിത ശിശുവികസന വകുപ്പിന്റെ സഹായത്തോടെ പ്രവർത്തിക്കുന്ന സ്ഥാപനത്തിലാണ് നിയമനം. പ്ലസ് ടു അല്ലെങ്കിൽ പ്രീഡിഗ്രിയാണ് അടിസ്ഥാന യോഗ്യത. അപേക്ഷകർക്ക് 25 വയസ് പൂർത്തിയായിരിക്കണം. 30 മുതൽ 40 വയസ് വരെയുള്ളവർക്ക് മുൻഗണന ലഭിക്കും.

തെരഞ്ഞെടുക്കപ്പെടുന്ന ഉദ്യോഗാർഥികൾക്ക് പ്രതിമാസം 12,000 രൂപ വേതനം ലഭിക്കും. യോഗ്യതയുള്ള സ്ത്രീ ഉദ്യോഗാർഥികൾ വെള്ള പേപ്പറിൽ തയ്യാറാക്കിയ അപേക്ഷ, വിദ്യാഭ്യാസ യോഗ്യത, പ്രായം, പ്രവൃത്തിപരിചയം എന്നിവ തെളിയിക്കുന്ന അസൽ സർട്ടിഫിക്കറ്റുകൾ, സ്വയം സാക്ഷ്യപ്പെടുത്തിയ പകർപ്പുകൾ എന്നിവ സഹിതം ഇന്റർവ്യൂവിൽ പങ്കെടുക്കണം.

ഇന്റർവ്യൂ ജൂൺ 30-ന് രാവിലെ 11 മണിക്ക് തിരുവനന്തപുരം പൂജപ്പുരയിലെ ജില്ലാ ശിശു സംരക്ഷണ ഓഫീസിൽ (എസ്.ബി.ഐ ഹെഡ് ഓഫീസിന് എതിർവശം) നടക്കും. കൂടുതൽ വിവരങ്ങൾക്ക് കേരള മഹിളാ സമഖ്യ സൊസൈറ്റിയുടെ ഓഫീസുമായി ബന്ധപ്പെടാം. ഫോൺ: 0471-2348666.