വിമാനയാത്രയ്ക്കിടെ നടി പ്രീതി സിന്റയെ തിരിച്ചറിയാതിരുന്നതിൽ ക്ഷമ ചോദിച്ച് ബോളിവുഡ് സംവിധായകനും നടനുമായ സഞ്ജയ് ഖാൻ. ട്വിറ്ററിലൂടെയാണ് സഞ്ജയുടെ ക്ഷമാപണം. ദുബൈയിലേക്കുള്ള വിമാനത്തിൽ വച്ച് മകൾ പരിചയപ്പെടുത്തിയെങ്കിലും തനിക്ക് മനസ്സിലാകാതെ പോയെന്ന് സഞ്ജയ് ട്വീറ്റിൽ പറയുന്നു.
പ്രീതിയുടെ സിനിമകൾ കണ്ടിട്ടുണ്ടെന്നും സുന്ദരമായ ഒരു മുഖം അവൾക്കുണ്ടെന്നും സഞ്ജയ് ട്വീറ്ററിൽ കുറിച്ചു. ''പ്രിയ പ്രീതി, ദുബൈയിലേക്കുള്ള വിമാനത്തിൽ വച്ച് മകൾ സിമൺ നിങ്ങളെ പരിചയപ്പെടുത്തിയപ്പോൾ എനിക്ക് നിങ്ങളെ തിരിച്ചറിയാൻ കഴിയാതെ വന്നതിൽ ക്ഷമ ചോദിക്കേണ്ടത് എൻറെ കടമയാണെന്ന് ഞാൻ കരുതുന്നു. സിന്റാ എന്ന് പറഞ്ഞിരുന്നെങ്കിൽ ഞാൻ ഉറപ്പായും ഓർത്തെടുത്തേനെ കാരണം നിൻറെ സുന്ദരമായ മുഖം പല സിനിമകളിലും ഞാൻ കണ്ടിട്ടുണ്ട്'' എന്നാണ് സഞ്ജയുടെ ട്വീറ്റ്.
സൂസന്നെ ഖാൻ, സായിദ് ഖാൻ, ഫറാ ഖാൻ അലി, സിമോൺ അറോറ എന്നിവരുടെ പിതാവാണ് സഞ്ജയ്. ഏക് ഫൂൽ ദോ മാലി, ഉപാസന, ദോസ്തി തുടങ്ങി നിരവധി ചിത്രങ്ങളിൽ സഞ്ജയ് ഖാൻ അഭിനയിച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
