തിരക്കഥ മോഷ്ടിച്ചെന്നാരോപിച്ച് സംവിധായകൻ കരൺ ജോഹറിനെതിരെ രംഗത്തെത്തിയിരിക്കുകയാണ് ഒരു തിരക്കഥാകൃത്ത്. വിശാൽ എ സിങ് എന്ന തിരക്കഥാകൃത്താണ് കരണിന്റെ ധർമാ പ്രൊഡക്ഷൻസ് നിർമിക്കുന്ന ജഗ് ജഗ് ജീയോ എന്ന പുതിയ ചിത്രത്തിനെതിരെ രംഗത്തെത്തിയത്. സിനിമയുടേത് തന്റെ തിരക്കഥയാണെന്നും തന്റെ അറിവോ അനുവാദമോ ഇല്ലാതെയാണ് കഥ സിനിമയാക്കിയതെന്നുമാണ് ആരോപണം.
"ബണ്ണി റാണി എന്ന പേരിൽ 2020 ജനുവരിയിൽ ഒരു കഥ രജിസ്റ്റർ ചെയ്തിരുന്നു. ഫെബ്രുവരിയിൽ തിരക്കഥ ധർമാ പ്രൊഡക്ഷൻസിന് മെയിൽ ചെയ്തു. അതിന് എനിക്ക് മറുപടിയും ലഭിച്ചു. അവർ എന്റെ കഥ അന്യായമായെടുത്ത് ജഗ് ജഗ് ജീയോ ഉണ്ടാക്കി. ഇത് ശരിയല്ല കരൺ ജോഹർ", വിശാൽ ട്വീറ്റ് ചെയ്തു. ബണ്ണി റാണി എന്ന പേരിൽ എഴുതിയ തിരക്കഥ ധർമാ പ്രൊഡക്ഷൻസിന് അയച്ചുകൊടുത്തതിന്റെ സ്ക്രീൻ ഷോട്ടുകളും വിശാൽ ട്വീറ്റ് ചെയ്തിട്ടുണ്ട്.
തിരക്കഥാകൃത്തിന്റെ അനുവാദമില്ലാതെ സിനിമ നിർമിച്ച നിരവധി സംഭവങ്ങൾ ഹിന്ദി സിനിമയിലുണ്ടെന്നും ഇത്തരം ദുഷ്ചെയ്തികൾക്കെതിരെ ശബ്ദമുയർത്താൻ തീരുമാനിച്ചുകഴിഞ്ഞെന്നും വിശാൽ പറയുന്നു. കരണിനെതിരെ ഔദ്യോഗികനായി പരാതി നൽകുമെന്നും അദ്ദേഹം ട്വീറ്റിൽ പറഞ്ഞു.
രാജ് മേത്ത സംവിധാനം ചെയ്ത ജഗ് ജഗ് ജീയോയുടെ ട്രെയിലർ ഏതാനും ദിവസങ്ങൾക്കുമുമ്പാണ് പുറത്തുവന്നത്. അനുരാഗ് സിങ്ങിന്റെ കഥയ്ക്ക് അദ്ദേഹവും സുമിത് ഭടേജയും ചേർന്നാണ് തിരക്കഥയെഴുതിയിരിക്കുന്നത്. അനിൽ കപൂർ, വരുൺ ധവാൻ, നീതു കപൂർ, കിയാരാ അദ്വാനി, മനീഷ് പോൾ, പ്രജക്ത കോലി എന്നിവരാണ് താരങ്ങൾ.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്ട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ