'കാമറയ്ക്ക് മുന്നിൽ വസ്ത്രം മാറുന്ന കജോൾ'; ഡീപ്ഫേക്കിൽ കുടുങ്ങി ബോളിവുഡ് നടി

നടി രശ്മിക മന്ദാനയുടെ ഡീപ് ഫേക്ക് വിഡിയോ സിനിമാലോകത്തെ ഒന്നടങ്കം ഞെട്ടിക്കുന്നതായിരുന്നു. ഈ വിഡിയോയുമായി ബന്ധപ്പെട്ട് അന്വേഷണവും പുരോ​ഗമിക്കുകയാണ്. അതിനിടെ മറ്റൊരു ബോളിവുഡ് താരറാണി കൂടി ഡീപ് ഫെക്കിൽ കുടുങ്ങിയിരിക്കുകയാണ്. കജോളിന്റെ വിഡിയോ ആണ് സോഷ്യൽ മീഡിയയിൽ പ്രചരിക്കുന്നത്. 

മന്ദാരം എന്ന് പേരുള്ള ഇൻസ്റ്റാ​ഗ്രാം പേജിലാണ് വീഡിയോ പ്രത്യക്ഷപ്പെട്ടത്. കാമറയ്ക്ക് മുൻപിൽ വസ്ത്രം മാറുന്ന തരത്തിലുള്ളതാണ് വിഡിയോ. കജോൾ വസ്ത്രം മാറുന്നു എന്ന രീതിയിലുള്ള തലക്കെട്ടുകളോടെയാണ് വിഡിയോ പ്രചരിക്കുന്നത്. സോഷ്യൽമീഡിയയിൽ ട്രെൻഡിങ് ആയ ​ഗെറ്റ് റെഡി വിത്ത് മി വിഡിയോ ഉപയോ​ഗിച്ചാണ് ഡീപ് ഫേക്ക് നിർമിച്ചിരിക്കുന്നത്.

കജോളിന്റേതെന്ന വ്യാജേന പ്രചരിക്കുന്ന വീഡിയോ ഡീപ് ഫേക്ക് ആണെന്ന് ഫാക്ട് ചെക്ക് വെബ്സൈറ്റായ ബൂം ലൈവ് റിപ്പോർട്ട് ചെയ്തു. ഒരു സോഷ്യൽ മീഡിയാ ഇൻഫ്ളുവൻസറിന്റെ ദൃശ്യത്തിൽ നടിയുടെ മുഖം കൃത്രിമമായി ചേർക്കുകയായിരുന്നുവെന്നാണ് റിപ്പോർട്ടിൽ പറയുന്നത്. ഈ വർഷം ജൂൺ അഞ്ചിനാണ് യഥാർത്ഥ വിഡിയോ പോസ്റ്റ് ചെയ്തിരിക്കുന്നത്. സംഭവത്തിൽ കജോൾ ഇതുവരെ പ്രതികരിച്ചിട്ടില്ല.

ദിവസങ്ങൾക്ക് മുൻപ് രശ്മികയും ഡീപ് ഫേക്ക് വിഡിയോ പുറത്തുവന്നതോടെ ആശങ്ക പങ്കുവച്ച് നിരവധി താരങ്ങൾ രം​ഗത്തെത്തിയിരുന്നു. സോഷ്യൽ മീഡിയ ഇൻഫ്ളുവൻസറായ സാറ പട്ടേലിന്റെ വിഡിയോ ഉപയോ​ഗിച്ചാണ് ഡീപ് ഫേക്ക് നിർമിച്ചത്.  സംഭവത്തിൽ കേസെടുത്ത പൊലീസ് ബിഹാർ സ്വദേശിയായ 19കാരനെ ചോദ്യം ചെയ്തിരുന്നു. നടിയുടെ ഡീപ്‌ഫേക്ക് വീഡിയോ സാമൂഹികമാധ്യമങ്ങളിൽ ആദ്യം അപ് ലോഡ് ചെയ്തത് ഇയാളാണെന്നാണ് പൊലീസിന്റെ സംശയം.

ഈ വാർത്ത കൂടി വായിക്കൂ 

'യാതൊരു പണിയുമില്ലാത്തവർക്ക് സമർപ്പിക്കുന്നു': പ്രിയ നായർക്കൊപ്പമുള്ള ചിത്രവുമായി ​ഗോപി സുന്ദർ

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ