വൻ ഹൈപ്പോടെ തിയറ്ററുകളിലെത്തിയ ചിത്രമായിരുന്നു ശങ്കർ - കമൽ ഹാസൻ കൂട്ടുകെട്ടിലെത്തിയ ഇന്ത്യൻ 2. പക്ഷേ ചിത്രത്തിന് തിയറ്ററുകളിൽ വിജയിക്കാനായില്ല എന്നു മാത്രമല്ല നിരവധി പരിഹാസങ്ങളും ഏറ്റുവാങ്ങേണ്ടി വന്നു. ഇപ്പോഴിതാ ചിത്രത്തിന് ഇത്രയധികം നെഗറ്റീവ് റിവ്യൂ വരുമെന്ന് താനൊരിക്കൽ പോലും പ്രതീക്ഷിച്ചിരുന്നില്ലെന്ന് പറയുകയാണ് ശങ്കർ.
ഒരു തമിഴ് മാധ്യമത്തിന് നൽകിയ അഭിമുഖത്തിലായിരുന്നു ശങ്കർ ഇക്കാര്യം വ്യക്തമാക്കിയത്. 'ഒരു നല്ല ആശയം മുന്നോട്ട് വയ്ക്കുക എന്ന് മാത്രമാണ് ഞാനുദ്ദേശിച്ചത്. ആ രീതിയിൽ ഞാൻ സന്തോഷവാനാണ്. വീട് വൃത്തിയാണെങ്കിൽ രാഷ്ട്രവും വൃത്തിയായിരിക്കും എന്നത് അത്ഭുതകരവും അനിവാര്യവുമായ ഒരു ആശയമാണ്. പ്രായോഗികമായി ഇത് എങ്ങനെ നടപ്പിലാക്കാൻ കഴിയും എന്നതാണ് ഒരു ചോദ്യമെങ്കിലും, അത് ഇപ്പോഴും പ്രധാനമാണ്'. -ശങ്കർ പറഞ്ഞു.
അതോടൊപ്പം രണ്ടാം ഭാഗത്തിന് മോശം പ്രതികരണങ്ങളാണ് ലഭിച്ചതെങ്കിലും മൂന്നാം ഭാഗം ഉറപ്പായും പ്രേക്ഷകര്ക്ക് ഇഷ്ടമാകും എന്നും ശങ്കര് പറഞ്ഞു. ഗെയിം ചെയ്ഞ്ചറിന്റെ വർക്കുകൾ പൂർത്തിയായാൽ ഉടൻ തന്നെ ഇന്ത്യൻ 3 യുടെ ജോലികൾ ആരംഭിക്കും.
ഇന്ത്യൻ 3 തിയറ്ററുകളിൽ തന്നെ റിലീസ് ചെയ്യുമെന്നും ശങ്കർ പറഞ്ഞു. ജൂലൈ 12ന് ആണ് ഇന്ത്യന് 2 തിയറ്ററുകളില് എത്തിയത്. അഴിമതിക്കെതിരെ പോരാടുന്ന ഇന്ത്യന് എന്ന കഥാപാത്രമായി കമല് ഹാസന് തകര്ത്തഭിനയിച്ച ‘ഇന്ത്യന്’ സിനിമയുടെ സീക്വല് ആയാണ് ഇന്ത്യന് 2 എത്തിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
