'അന്ന് ഇരുണ്ട നിറമായിരുന്ന ദീപികയും കജോളുമൊക്കെ ഇന്ന് വെളുത്ത് വിളറിയിരിക്കുന്നു?'; വിവാ​ദ പരാമർശവുമായി കങ്കണ

വിവാദ പരാമർശങ്ങളിലൂടെ സോഷ്യൽ മീഡിയയിൽ എപ്പോഴും നിറഞ്ഞു നിൽക്കാറുള്ള ബോളിവുഡ് നടിയാണ് കങ്കണ റണാവത്ത്. എമർജൻസിയാണ് കങ്കണയുടേതായി ഏറ്റവുമൊടുവിൽ തിയറ്ററുകളിലെത്തിയ ചിത്രം. എന്നാൽ ചിത്രം ബോക്സോഫീസിൽ പരാജയമായി മാറി. ചിത്രത്തിന്റെ പരാജയത്തിന്റെ ക്ഷീണം തീർക്കാനായി വിവാദ പ്രസ്താവനയുമായെത്തിയിരിക്കുകയാണ് കങ്കണയിപ്പോൾ.

ബോളിവുഡ് നടിമാരെക്കുറിച്ചും സൗന്ദര്യ കാഴ്ചപ്പാടിനെക്കുറിച്ചുമുള്ള കങ്കണയുടെ വാക്കുകളാണ് ചർച്ചയായിരിക്കുന്നത്. ബോളിവുഡിൽ ഇപ്പോൾ കറുത്ത നായികമാരില്ലെന്നാണ് കങ്കണയുടെ കണ്ടെത്തൽ. മുൻപ് കജോൾ, ദീപിക പദുക്കോൺ, ബിപാഷ ബസു പോലുള്ള മുൻനിര നായികമാര്‍ ബോളിവുഡിലുണ്ടായിരുന്നുവെന്ന് താരം ഇൻസ്റ്റഗ്രാം സ്റ്റോറിയിൽ കുറിച്ചു.

''സ്വഭാവിക സൗന്ദര്യം കൊണ്ട് മൊണാലിസ എന്ന പെൺകുട്ടി ഇന്‍റര്‍നെറ്റ് സെൻസേഷനായി മാറിയിരിക്കുകയാണ്. ചിത്രങ്ങൾക്കും അഭിമുഖങ്ങൾക്കുമായി ആ പെൺകുട്ടിയെ ശല്യപ്പെടുത്തുന്നതിനെ ഞാൻ വെറുക്കുന്നു. ഇന്ന് ഗ്ലാമര്‍ ലോകത്ത് ഇരുണ്ട നിറമുള്ള സ്ത്രീകൾക്ക് പ്രാധാന്യമുണ്ടോ? എനിക്ക് ചിന്തിക്കാതിരിക്കാൻ കഴിയുന്നില്ല.

അനു അഗർവാളിനെയോ കജോളിനെയോ ബിപാഷയെയോ ദീപികയെയോ റാണി മുഖർജിയെയോ സ്നേഹിച്ചതു പോലെയാണോ ആളുകൾ യുവ നടിമാരെ സ്നേഹിക്കുന്നത്? ചെറുപ്പത്തിൽ ഇരുണ്ട നിറമായിരുന്ന നായികമാര്‍ ഇന്ന് വെളുത്ത് വിളറിയിരിക്കുന്നതെന്താണ്?

'പുതിയ അഭിനേതാക്കൾക്ക് പോലും ഉയർന്ന പ്രതിഫലം! താങ്ങാനാകുന്നില്ല; ഇങ്ങനെ പോയാൽ സിനിമാ നിർമാണം നിർത്തേണ്ടി വരും'

എന്തുകൊണ്ടാണ് ആളുകൾ മൊണാലിസയെ തിരിച്ചറിയുന്ന പോലെ പുതുമുഖ നായികമാരെ തിരിച്ചറിയാത്തത്? വളരെയധികം ലേസർ, ഗ്ലൂട്ടത്തയോൺ കുത്തിവെപ്പുകളാണോ?"- കങ്കണ ചോദിച്ചു. കങ്കണയുടെ വാക്കുകൾ റെഡ്ഡിറ്റ് പോലുള്ള സോഷ്യൽമീഡിയ പ്ലാറ്റ്ഫോമുകളിൽ വലിയ ചര്‍ച്ചക്ക് വഴിവച്ചിട്ടുണ്ട്. കങ്കണയെ അനുകൂലിച്ചും പ്രതികൂലിച്ചും നിരവധി പേരാണ് രം​ഗത്തെത്തുന്നത്.