പരിക്കേറ്റ കാലുമായി വീൽ ചെയറിൽ 'ഛാവ' ട്രെയ്‌ലർ ലോഞ്ചിനെത്തി രശ്മിക; കൈയടിച്ച് ആരാധകർ, വിഡിയോ

വിക്കി കൗശലും രശ്മിക മന്ദാനയും പ്രധാന വേഷത്തിലെത്തുന്ന ചിത്രമാണ് ഛാവ. ലക്ഷ്മൺ ഉടേക്കർ സംവിധാനം ചെയ്യുന്ന ചിത്രത്തിന്റെ ട്രെയ്‌ലർ ലോഞ്ച് ബുധനാഴ്ച മുംബൈയിൽ വച്ചു നടക്കും. ട്രെയ്‌ലർ ലോഞ്ചിൽ പങ്കെടുക്കാനായി മുംബൈ വിമാനത്താവളത്തിൽ വീൽചെയറിലെത്തിയ രശ്മികയുടെ ദൃശ്യങ്ങൾ സോഷ്യൽ മീഡിയയിൽ വൈറലാകുകയാണിപ്പോൾ.

അടുത്തിടെയാണ് ജിമ്മിലെ പരിശീലനത്തിനിടയില്‍ വലതു കാലിന് പരിക്കേറ്റ വിവരം രശ്മിക ഇൻസ്റ്റ​ഗ്രാമിലൂടെ പങ്കുവച്ചത്. വരുന്ന ആഴ്കളില്‍ അല്ലെങ്കില്‍ മാസങ്ങളില്‍ ഒറ്റ കാലില്‍ ആയിരിക്കും തന്‍റെ സഞ്ചാരമെന്നും രശ്മിക കുറിച്ചിരുന്നു. പരിക്കേറ്റ കാലുമായി ട്രെയ്‌ലർ ലോഞ്ചിനെത്തിയ രശ്മികയ്ക്ക് കൈയ്യടിയ്ക്കുകയാണ് ആരാധകർ.

വേ​ഗം തന്നെ സുഖം പ്രാപിക്കട്ടെയെന്ന് ആശംസിക്കുന്നവരും കുറവല്ല. ഛാവയിൽ മഹാറാണി യേശുഭായ് എന്ന കഥാപാത്രത്തെയാണ് രശ്മിക അവതരിപ്പിക്കുന്നത്. ഛത്രപതി ശിവജി മഹാരാജിൻ്റെ മകൻ ഛത്രപതി സംഭാജി മഹാരാജിൻ്റെ ജീവിതത്തെ അടിസ്ഥാനമാക്കിയാണ് ചിത്രമൊരുങ്ങുന്നത്. അക്ഷയ് ഖന്ന, അശുതോഷ് റാണ, ദിവ്യ ദത്ത എന്നിവരും ചിത്രത്തിൽ മറ്റ് പ്രധാന വേഷങ്ങളിലെത്തുന്നു.

​ഗെയിം ചെയ്ഞ്ചറിന്റെ വൻ പരാജയം; നിർമാതാവിന്റെ അടുത്ത ചിത്രത്തിൽ പ്രതിഫലം വെട്ടിക്കുറച്ച് റാം ചരൺ

അടുത്ത മാസം 14 ന് ചിത്രം തിയറ്ററുകളിലെത്തും. കുബേര, സിക്കന്ദർ, റെയിൻബോ, താമ, അനിമൽ പാർക്ക്, പുഷ്പ 3, ദ് ഗേൾഫ്രണ്ട് തുടങ്ങി നിരവധി ചിത്രങ്ങളാണ് രശ്മികയുടേതായി ഇനി റിലീസിനായി ഒരുങ്ങുന്നത്.