'സോറി കമൽ സാർ, എല്ലാത്തിനും കാരണം മണി സാർ ആണ്'; ത​ഗ് ലൈഫിലെ ആ രം​ഗത്തെക്കുറിച്ച് ചിമ്പു

കമൽ ഹാസൻ ചിത്രം ത​ഗ് ലൈഫിന്റെ ട്രെയ്‌ലർ അടുത്തിടെയാണ് പുറത്തുവന്നത്. ട്രെയ്‌ലറിനെതിരെ വിമർശനങ്ങളുയർന്നുവെങ്കിലും ചിത്രത്തിലെ കമൽ ഹാസൻ - ചിമ്പു കോമ്പോ ആരാധകർ ഏറ്റെടുത്തിരുന്നു. ചിമ്പുവും കമൽ ഹാസനും തമ്മിലുള്ള ഫൈറ്റ് രം​ഗങ്ങളും ട്രെയ്‍ലറിൽ കാണാമായിരുന്നു. ട്രെയ്‌ലറിന്റെ അവസാനം കമൽ ഹാസനും ചിമ്പുവും പരസ്പരം കഴുത്തിന് പിടിക്കുന്ന ഒരു ​രംഗവുമുണ്ടായിരുന്നു.

'ഇത് എനിക്കും അവനും ഇടയിൽ നടക്കുന്ന കഥ, നീയോ ഞാനോ?' എന്നുള്ള കമൽ ഹാസന്റെ ‍ഡയലോ​ഗും ആരാധകർ ഏറ്റെടുത്തിരുന്നു. ഇപ്പോഴിതാ ഈ രം​ഗം ഷൂട്ട് ചെയ്തതിനെക്കുറിച്ച് ഓഡിയോ ലോഞ്ചിൽ ചിമ്പു പറഞ്ഞ വാക്കുകളാണിപ്പോൾ വൈറലായി മാറുന്നത്.

"കമൽ സാറും ഞാനും അങ്ങോട്ടുമിങ്ങോട്ടും കഴുത്തിൽ പിടിച്ച് ഞെരിക്കുന്ന ഒരു സീൻ നിങ്ങൾ ട്രെയ്‌ലറിൽ കണ്ടു കാണുമല്ലോ. അല്ലെങ്കിൽ തന്നെ കമൽ സാറിനൊപ്പം ഒരു ചെറിയ ഷോട്ട് എടുക്കുമ്പോൾ പോലും ടെൻഷൻ ആണ്. അപ്പോഴാണ് മണി സാർ ഇങ്ങനെയൊരു ഷോട്ട് വെച്ചിരിക്കുന്നത്. എനിക്ക് എന്താണ് ചെയ്യേണ്ടതെന്ന് അറിയില്ലായിരുന്നു. പിന്നെ ചെയ്ത് അല്ലേ പറ്റൂ. ഫസ്റ്റ് ഷോട്ടിനായി ഞാൻ റെഡിയായി, കമൽ സാറിനോട് ഈ ഷോട്ടിന്റെ കാര്യം പറഞ്ഞു.

സാർ കുഴപ്പമൊന്നുമില്ലെന്ന് പറഞ്ഞു. അങ്ങനെ മണി സാർ ആക്ഷൻ പറഞ്ഞു, ഞാൻ കമൽ സാറിന്റെ കഴുത്തിൽ പതുക്കെ പിടിച്ചു. ഞാൻ പിടിച്ചത് ശരിയാകാതിരുന്നതിനാൽ മണി സാർ കട്ട് വിളിച്ചു. നീ എന്താ ചെയ്യുന്നത്, ശരിക്ക് പിടിക്ക് ചിമ്പൂ എന്ന് പറഞ്ഞു. ഞാൻ പറ‍ഞ്ഞു സാറിന് ഇത് തമാശയാണ്, എങ്ങനെയാണ് സാർ കമൽ സാറിന്റെ കഴുത്തിൽ പിടിച്ച് ഞെരിക്കുന്നത് എന്ന്. നീ അങ്ങനെ ചെയ്യുന്നത് സ്ക്രീനിൽ നന്നായി മനസിലാകുന്നുണ്ട്, അതുകൊണ്ട് നന്നായി ചെയ്യൂ എന്ന് അദ്ദേഹം പറഞ്ഞു.

അങ്ങനെ രണ്ടാമത്തെ ടേക്ക് പോയി. അതിലും അദ്ദേഹം കട്ട് പറഞ്ഞു, എനിക്ക് എന്താണെന്ന് ഒന്നും മനസിലാകുന്നില്ല. പിന്നെ എനിക്ക് ഒരുകാര്യം മനസിലായി, അടുത്ത പ്രാവശ്യം കമൽ സാറിന്റെ കഴുത്തിൽ മര്യാദയ്ക്ക് പിടിച്ചില്ലെങ്കിൽ മണി സാർ എന്റെ കഴുത്തിന് പിടിക്കുമെന്ന്. പിന്നെ അടുത്ത ഷോട്ടിന് റെഡിയായി. കമൽ സാറിനോട് പ്രശ്നമൊന്നുമില്ലല്ലോ എന്നൊക്കെ ഞാൻ ചോദിച്ചു.

കുഴപ്പമില്ല, നീ ചെയ്തോ എന്ന് അദ്ദേഹം പറഞ്ഞു. ആക്ഷൻ പറഞ്ഞു, ഞാൻ കമൽ സാറിന്റെ കഴുത്തിന് കയറി പിടിച്ചു, അദ്ദേഹം അതിന് ഭയങ്കരമായി റിയാക്ട് ചെയ്തു. ഞാൻ ഒന്ന് പിടിച്ചപ്പോഴേക്കും അദ്ദേഹം ഇങ്ങനെ റിയാക്ട് ചെയ്തതാണോ അതോ പെർഫോമൻസ് ആണോ എന്നൊന്നും എനിക്ക് മനസിലായില്ല. അപ്പോൾ ഞാൻ ഓർത്തു, ഞാനിപ്പോൾ കൈ വിട്ടാൽ മണി സാർ വീണ്ടും അടുത്ത ടേക്ക് പറയും.

'ഇന്നും റിപീറ്റ് വാല്യൂ സോങ്‌സിന്റെ രാജാവ്...'; എംജി ശ്രീകുമാറിന് പിറന്നാൾ ആശംസകൾ നേർന്ന് അഫ്സൽ

ബലത്തിൽ പിടിച്ച് ഞെരിച്ചാൽ കമൽ സാറിന് പ്രശ്നമാകും. കുറച്ച് സെക്കന്റ് നേരത്തേക്ക് എനിക്ക് എന്താണെന്ന് ഒന്നും മനസിലായില്ല. പിന്നെ കുറച്ച് ലൈറ്റായി ഞാൻ പിടിച്ചു. അങ്ങനെയാണ് ആ സീൻ ചെയ്തത്. സോറി കമൽ സാർ അങ്ങനെ ചെയ്തതിന്. എന്നോട് ക്ഷമിക്കൂ, എല്ലാത്തിനും കാരണം മണി സാർ ആണ്".- ചിമ്പു പറഞ്ഞു.