ന്യൂഡല്‍ഹി: രാജ്യത്ത് ഇന്ധന വില ദിനംപ്രതി ഉയരുന്നത് തുടരുകയാണ്. എട്ട് ദിവസത്തിനിടെ ആറ് രൂപയോളമാണ് വര്‍ധിച്ചത്. ഇപ്പോഴിതാ ഇന്ധന വില വര്‍ധനവിനെ പരിഹസിച്ച് രംഗത്തെത്തിയിരിക്കുകയാണ് രാജസ്ഥാന്‍ കോണ്‍ഗ്രസ് നേതാവും മന്ത്രിയുമായ പ്രതാപ് കചരിയവാസ്.
ബിജെപി മന്ത്രിമാര്‍ ഇന്ധന കൂപ്പണുകള്‍ വിതരണം ചെയ്യണമെന്ന് മന്ത്രി പറഞ്ഞു. മന്ത്രിമാര്‍ കശ്മീര്‍ ഫയല്‍സ് സിനിമയുടെ ടിക്കറ്റുകള്‍ വിതരണം ചെയ്തതുപോലെ പൊതുജനത്തിന് ഇന്ധന കൂപ്പണുകള്‍ വിതരണം ചെയ്യാന്‍ രംഗത്തിറങ്ങണമെന്ന് കചരിയവാസ് പരിഹസിച്ചു.
'തെരഞ്ഞെടുപ്പുകള്‍ കഴിഞ്ഞു ബിജെപി പെട്രോള്‍, ഡീസല്‍ വില വര്‍ധിപ്പിക്കാനും ആരംഭിച്ചു. യഥാര്‍ത്ഥത്തില്‍ അവര്‍ രാമ ഭക്തരല്ല, രാവണ ഭക്തരാണ്. കശ്മീര്‍ ഫയല്‍സിന്റെ ടിക്കറ്റുകള്‍ വിതരണം ചെയ്തതുപോലെ സൗജന്യമായി പെട്രോള്‍, ഡീസല്‍ അടിക്കാനുള്ള കൂപ്പണുകള്‍ വിതരണം ചെയ്യാന്‍ ബിജെപി മന്ത്രിമാര്‍ രംഗത്തിറങ്ങണം'- കചരിയവാസ് പറഞ്ഞു.
വിവേക് അഗ്നിഹോത്രി സംവിധാനം ചെയ്ത കശ്മീര്‍ ഫയല്‍സ് സിനിമയുടെ ടിക്കറ്റുകള്‍ രാജ്യത്തെ വിവിധ തിയേറ്ററുകളില്‍ ബിജെപി നേതാക്കള്‍ ബുക്ക് ചെയ്തിരുന്നു. 1990കളിലെ കശ്മിര്‍ പണ്ഡിറ്റുകളുടെ പലായനത്തിന്റെ കഥ പറയുന്നതാണ് ചിത്രം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
