7,300mAh കരുത്തുറ്റ ബാറ്ററി, ട്രിപ്പിൾ കാമറ, 70,000 രൂപയ്ക്ക് അടുത്ത് വില; വൺ പ്ലസ് 15 ഇന്ത്യൻ ലോഞ്ച് ഇന്ന്

ന്യൂഡൽഹി: പ്രമുഖ സ്മാർട്ട്‌ഫോൺ നിർമ്മാതാക്കളായ വൺപ്ലസിന്റെ പുതിയ ഫോൺ ആയ വൺ പ്ലസ് 15 ഇന്ന് ഇന്ത്യൻ വിപണിയിൽ അവതരിപ്പിക്കും. വ്യാഴാഴ്ച വൈകുന്നേരം 7 മണിക്ക് വൺ പ്ലസ് 15 ഇന്ത്യയിൽ അവതരിപ്പിക്കുമെന്ന് കമ്പനി അറിയിച്ചു. ആമസോണിൽ ഇന്ന് രാത്രി എട്ടു മണിക്ക് വിൽപ്പന ആരംഭിക്കും.

പുതിയ ഫോൺ പുതിയ സ്നാപ്ഡ്രാഗൺ 8 എലൈറ്റ് ജെൻ 5 പ്രോസസറുമായാണ് വിപണിയിൽ എത്തുന്നത്. കൂടാതെ ട്രിപ്പിൾ കാമറ സജ്ജീകരണവും വൺപ്ലസ് 13 സീരീസിനെ അനുസ്മരിപ്പിക്കുന്ന രൂപകൽപ്പനയും ഇതിൽ ഉണ്ടാകുമെന്നും റിപ്പോർട്ടുകൾ വ്യക്തമാക്കുന്നു.

കാമറ

കാമറയുടെ കാര്യത്തിൽ, വൺപ്ലസ് 15ൽ 50എംപി മെയിൻ സെൻസർ, 50എംപി ടെലിഫോട്ടോ ലെൻസ്, 50എംപി അൾട്രാ-വൈഡ് ഷൂട്ടർ എന്നിവ ഉൾപ്പെടുന്ന ട്രിപ്പിൾ റിയർ കാമറ സജ്ജീകരണം ഉണ്ടാകുമെന്ന് പ്രതീക്ഷിക്കുന്നു.

ഡിസ്‌പ്ലേ

ഫോണിൽ 6.82 ഇഞ്ച് LTPO AMOLED സ്‌ക്രീൻ, വളഞ്ഞ അരികുകൾ, അൾട്രാ-സ്ലിം 1.15mm ബെസലുകൾ, 165Hz റിഫ്രഷ് റേറ്റ് പിന്തുണയ്ക്കുന്ന 1.5K റെസല്യൂഷൻ എന്നിവ ഉണ്ടാകുമെന്ന് പ്രതീക്ഷിക്കുന്നു.

ബാറ്ററി

സ്മാർട്ട്ഫോണിൽ 7,300mAh ബാറ്ററിയുണ്ടാകുമെന്ന് പ്രതീക്ഷിക്കുന്നു. 120W റാപ്പിഡ് ചാർജിങ്ങും മിന്നൽ വേഗത്തിലുള്ള ടോപ്പ്-അപ്പുകളും സാധ്യമാക്കുന്ന തരത്തിലായിരിക്കും ബാറ്ററി രൂപകൽപ്പന ചെയ്തിരിക്കുന്നതെന്നും റിപ്പോർട്ടുകൾ വ്യക്തമാക്കുന്നു.

വില

ബ്രാൻഡിന്റെ പതിവ് വിലനിർണ്ണയ രീതികൾ അനുസരിച്ച് വൺപ്ലസ് 15 ഫൈവ്ജിക്ക് ഇന്ത്യയിൽ 70,000 രൂപയ്ക്ക് അടുത്ത് വില വരുമെന്നാണ് കരുതുന്നത്.