ട്രിപ്പിൾ 50 എംപി കാമറ, അൾട്രാ- തിൻ ഡിസൈൻ; മോട്ടോറോള എഡ്ജ് 70 അടുത്ത തിങ്കളാഴ്ച വിപണിയിൽ

പ്രമുഖ സ്മാർട്ട്‌ഫോൺ നിർമ്മാതാക്കളായ മോട്ടോറോളയുടെ പുതിയ മോഡൽ ഫോൺ ആയ അൾട്രാ-സ്ലിം എഡ്ജ് 70 ലോഞ്ച് തീയതി കമ്പനി പ്രഖ്യാപിച്ചു. അടുത്ത തിങ്കളാഴ്ചയാണ് ഇത് ഇന്ത്യൻ വിപണിയിൽ അവതരിപ്പിക്കുക. ഇതിനോടകം തന്നെ ആഗോള തലത്തിൽ ഫോൺ വിപണിയിൽ എത്തിയിട്ടുണ്ട്. ഇ-കോമേഴ്സ് സ്ഥാപനമായ ഫ്ലിപ്പ്കാർട്ട് വഴിയും കമ്പനിയുടെ വെബ്സൈറ്റ് വഴിയും ഫോൺ ലഭ്യമാകും.

5.99mm മാത്രം വീതിയുള്ള അൾട്രാ-തിൻ ഡിസൈൻ വിഭാഗത്തിലാണ് ഫോൺ വരിക. ക്വാൽകോം സ്‌നാപ്ഡ്രാഗൺ 7 ജെൻ 4 ചിപ്പ്‌സെറ്റ് ആണ് ഫോണിന് കരുത്തു പകരുക. 120Hz റിഫ്രഷ് റേറ്റും 4,500 നിറ്റ്‌സ് പീക്ക് ബ്രൈറ്റ്നസ്സും ഉള്ള 6.67 ഇഞ്ച് 1.5K pOLED ഡിസ്പ്ലേയാണ് സ്മാർട്ട്ഫോണിനുള്ളത്. മെറ്റൽ ഫ്രെയിമും ഗൊറില്ല ഗ്ലാസ് 7i സംരക്ഷണവും സ്മാർട്ട്ഫോണിൽ ഉണ്ട്. ഈ ഹാൻഡ്സെറ്റ് 12 ജിബി റാമും 512 ജിബി ഇന്റേണൽ സ്റ്റോറേജുമാണ് വാഗ്ദാനം ചെയ്യുന്നത്.

കാമറ വിഭാഗത്തിൽ സ്മാർട്ട്ഫോണിന്റെ പിന്നിൽ ഇരട്ട 50 എംപി മെയിൻ, അൾട്രാ-വൈഡ് സെൻസറുകൾ ഉണ്ട്. മുൻവശത്ത്, സെൽഫികൾക്കും വിഡിയോ കോളുകൾക്കുമായി 50 എംപി കാമറയും ഉൾപ്പെടുന്നു. പ്രധാന കാമറ 4K വീഡിയോ റെക്കോർഡിങ്ങിനെ പിന്തുണയ്ക്കുന്നു. 68W വയർഡ് ചാർജിങ്ങിനെയും 15W വയർലെസ് ചാർജിങ്ങിനെയും പിന്തുണയ്ക്കുന്ന 4,800mAh ബാറ്ററിയാണ് ഈ ഫോണിൽ ഉണ്ടാവുക. ഇൻ- ഡിസ്‌പ്ലേ ഫിംഗർപ്രിന്റ് സെൻസർ, ഫെയ്‌സ് അൺലോക്ക് എന്നി സുരക്ഷാ ഫീച്ചറുകളും ഫോണിലുണ്ട്.

ആൻഡ്രോയിഡ് 16 അടിസ്ഥാനമാക്കിയുള്ള ഹലോ യുഐയിലാണ് ഇത് പ്രവർത്തിക്കുന്നത്. കൂടാതെ ബിൽറ്റ്-ഇൻ എഐ സവിശേഷതകളും ഫോണിൽ ഉൾപ്പെടുന്നു. പൊടി, ജല പ്രതിരോധം എന്നിവയ്ക്കുള്ള IP68, IP69 റേറ്റിങ്ങുകളും ഫോണിനുണ്ട്.