'അച്ഛനും അമ്മയും എന്നെ സ്നേഹിച്ചിരുന്നോ?' മാതാപിതാക്കളെ കുറിച്ച് കുട്ടികൾ ഓർത്തുവയ്ക്കുന്ന ഏഴ് കാര്യങ്ങൾ

കുട്ടിയായിരിക്കുമ്പോൾ മാതാപിതാക്കൾ നൽകുന്ന സ്നേഹവും സുരക്ഷിതത്വവും ശ്രദ്ധയും അവരുടെ വ്യക്തിത്വത്തെയും ഭാവിയിലെ ബന്ധങ്ങളെയും സ്വാധീനിക്കുന്നതാണ്. വിലകൂടിയ സമ്മാനങ്ങളെക്കാളും വലിയ സൗകര്യങ്ങളെക്കാളും കുട്ടികളുടെ മനസ്സിൽ ആഴത്തിൽ പതിയുന്നത് മാതാപിതാക്കൾ അവരോട് എങ്ങനെ പെരുമാറിയിരുന്നു എന്നതാണ്.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

വളർന്ന് സ്വന്തം ജീവിതത്തിലേക്ക് കടന്നാലും കുട്ടിക്കാലത്തിലെ ചില അനുഭവങ്ങൾ അവരുടെ മനസിൽ മായാതെ നിൽക്കും. മാതാപിതാക്കൾ പറഞ്ഞ ചില വാക്കുകളും നൽകിയ പിന്തുണയും ഒരുമിച്ച് ചെലവഴിച്ച ചെറിയ നിമിഷങ്ങളുമെല്ലാം പിന്നീട് വിലപ്പെട്ട ഓർമ്മകളായി മാറും.

മാതാപിതാക്കളെക്കുറിച്ച് കുട്ടികൾ എക്കാലവും ഓർക്കുന്ന ഏഴ് കാര്യങ്ങൾ:

മാതാപിതാക്കൾ തങ്ങളെ എത്രമാത്രം സ്നേഹിച്ചിരുന്നു

കുട്ടികൾക്ക് മാതാപിതാക്കളുടെ സ്നേഹം അനുഭവപ്പെടുന്നത് വലിയ സമ്മാനങ്ങളിലൂടെയല്ല. കെട്ടിപ്പിടിക്കുക, തലോടുക, സ്നേഹത്തോടെ സംസാരിക്കുക, വിഷമിക്കുമ്പോൾ അടുത്തിരിക്കുക, സ്കൂളിൽ നിന്ന് വരുമ്പോൾ വിശേഷങ്ങൾ ചോദിക്കുക തുടങ്ങിയ ചെറിയ കാര്യങ്ങളിലൂടെയാണ്.

സുരക്ഷിതത്വബോധം കുട്ടിയുടെ മനസിൽ വലിയ സ്വാധീനം ചെലുത്തും. അതുകൊണ്ടു തന്നെ തിരക്കേറിയ ജീവിതത്തിനിടയിലും കുട്ടികളോട് സ്നേഹം പ്രകടിപ്പിക്കാൻ മാതാപിതാക്കൾ സമയം കണ്ടെത്തണം. സ്നേഹം മനസിൽ ഉണ്ടായാൽ മാത്രം പോരാ, കുട്ടികൾക്ക് അത് അനുഭവപ്പെടുകയും വേണം.

'മാതാപിതാക്കൾ എനിക്ക് വേണ്ടി സമയം കണ്ടെത്തിയിരുന്നോ'

കുട്ടികൾ വളരുമ്പോൾ ഏറ്റവും വിലപ്പെട്ടതായി മാറുന്നത് മാതാപിതാക്കൾ നൽകിയ സമയമാണ്. ഒരുമിച്ച് ഭക്ഷണം കഴിച്ചത്, പാർക്കിൽ പോയത്, കഥ പറഞ്ഞത്, സ്കൂൾ പരിപാടിയിൽ പങ്കെടുക്കാൻ എത്തിയത്, രാത്രിയിൽ ഉറങ്ങുന്നതിന് മുമ്പ് സംസാരിച്ചത് തുടങ്ങിയ സാധാരണ നിമിഷങ്ങൾ വർഷങ്ങൾക്കു ശേഷം കുട്ടികളുടെ മനസിൽ പ്രത്യേക ഓർമ്മകളായി മാറും. കുട്ടിക്ക് മാതാപിതാക്കളുടെ പൂർണ ശ്രദ്ധ ലഭിച്ച കുറച്ച് മിനിറ്റുകൾ പോലും പലപ്പോഴും മണിക്കൂറുകളോളം ഒരുമിച്ച് ഇരിക്കുന്നതിനേക്കാൾ വിലപ്പെട്ടതായിരിക്കും.

വിഷമിച്ചപ്പോൾ മാതാപിതാക്കൾ എങ്ങനെ പെരുമാറി

പരീക്ഷയിൽ മാർക്ക് കുറഞ്ഞപ്പോൾ, സുഹൃത്തുക്കളുമായി പ്രശ്നമുണ്ടായപ്പോൾ, എന്തെങ്കിലും തെറ്റ് ചെയ്തപ്പോഴൊക്കെ മാതാപിതാക്കൾ എങ്ങനെ പ്രതികരിച്ചു എന്നത് കുട്ടികൾ വളരെക്കാലം ഓർക്കും. തെറ്റുകൾ സംഭവിക്കുമ്പോൾ ഉടൻ ശകാരിക്കുന്നതിനു പകരം എന്താണ് സംഭവിച്ചതെന്ന് കേൾക്കാനും പരിഹാരം കണ്ടെത്താനും മാതാപിതാക്കൾ തയ്യാറാകുന്നത് കുട്ടിയിൽ ആത്മവിശ്വാസം വളർത്തും. 'എന്തെങ്കിലും പ്രശ്നമുണ്ടായാൽ മാതാപിതാക്കളോട് പറയാം' എന്ന വിശ്വാസം കുട്ടിക്ക് ലഭിക്കുന്നത് വളരെ പ്രധാനമാണ്.

മാതാപിതാക്കൾ അവരെ വിശ്വസിച്ചിരുന്നോ

കുട്ടികൾക്ക് സ്വതന്ത്രമായി വളരാൻ മാതാപിതാക്കളുടെ വിശ്വാസം ആവശ്യമാണ്. ചെറിയ കാര്യങ്ങളിൽ തീരുമാനമെടുക്കാൻ അവസരം നൽകുക, അവരുടെ അഭിപ്രായം ചോദിക്കുക, ഉത്തരവാദിത്തങ്ങൾ ഏൽപ്പിക്കുക, അവർക്ക് കഴിവുണ്ടെന്ന് പറയുക—ഇവയെല്ലാം കുട്ടിയുടെ ആത്മവിശ്വാസം വർധിപ്പിക്കും. എല്ലാ കാര്യങ്ങളിലും സംശയിക്കുകയും മറ്റുള്ള കുട്ടികളുമായി താരതമ്യം ചെയ്യുകയും ചെയ്യുന്നതിന് പകരം 'നിനക്ക് ഇത് ചെയ്യാൻ കഴിയും' എന്ന് പറയുന്ന മാതാപിതാക്കളെയാണ് കുട്ടികൾ പിന്നീട് സ്നേഹത്തോടെ ഓർക്കുക.

മാതാപിതാക്കൾ അവരെ മറ്റുള്ളവരുമായി താരതമ്യം ചെയ്തിരുന്നോ

'അവനെ നോക്ക്, എത്ര നല്ല മാർക്കാണ്', 'അവൾക്ക് ഇത്രയും കഴിവുണ്ട്, നിനക്കോ?' തുടങ്ങിയ താരതമ്യങ്ങൾ കുട്ടിയുടെ മനസിൽ ആഴത്തിലുള്ള മുറിവുകൾ ഉണ്ടാക്കാം. അതേസമയം, കുട്ടിയുടെ സ്വന്തം കഴിവുകളും പുരോഗതിയും അംഗീകരിക്കുന്ന മാതാപിതാക്കളെ അവർ ഏറെ വിലമതിക്കും. ഓരോ കുട്ടിയും വ്യത്യസ്തരാണ്. അതിനാൽ മറ്റൊരാളുമായി താരതമ്യം ചെയ്യുന്നതിനു പകരം കുട്ടിയുടെ കഴിവുകളും പരിശ്രമവും ശ്രദ്ധിക്കുന്നതാണ് ആരോഗ്യകരമായ സമീപനം.

മാതാപിതാക്കൾ തമ്മിൽ പരസ്പരം എങ്ങനെ പെരുമാറി

കുട്ടികൾ മാതാപിതാക്കളുടെ പെരുമാറ്റത്തിൽ നിന്ന് ബന്ധങ്ങളെക്കുറിച്ച് പഠിക്കുന്നു. അമ്മയും അച്ഛനും പരസ്പരം എങ്ങനെ സംസാരിക്കുന്നു, അഭിപ്രായ വ്യത്യാസങ്ങൾ എങ്ങനെ പരിഹരിക്കുന്നു, പരസ്പരം ബഹുമാനിക്കുന്നുണ്ടോ, വിഷമസമയത്ത് ഒരാൾ മറ്റൊരാൾക്ക് എങ്ങനെ പിന്തുണ നൽകുന്നു തുടങ്ങിയ കാര്യങ്ങൾ കുട്ടികൾ ശ്രദ്ധിക്കും. വീട്ടിലെ അന്തരീക്ഷം കുട്ടിയുടെ ഓർമ്മകളിൽ വലിയ പങ്കുവഹിക്കുന്നു. മാതാപിതാക്കൾ തമ്മിലുള്ള സ്നേഹവും ബഹുമാനവും കുട്ടിക്ക് ആരോഗ്യകരമായ ബന്ധങ്ങളുടെ മാതൃകയായി മാറും.

തങ്ങളുടെ സന്തോഷത്തിൽ മാതാപിതാക്കൾ പങ്കുചേർന്നിരുന്നോ

കുട്ടിയുടെ ചെറിയ വിജയങ്ങൾ പോലും മാതാപിതാക്കൾ ആഘോഷിക്കുന്നത് അവർക്ക് വലിയ സന്തോഷം നൽകും. ആദ്യമായി സൈക്കിൾ ഓടിച്ചത്, സ്കൂളിൽ സമ്മാനം ലഭിച്ചത്, ഒരു ചിത്രം വരച്ചത്, പുതിയൊരു കാര്യം പഠിച്ചത്, മത്സരത്തിൽ വിജയിച്ചത്—ഇത്തരം നിമിഷങ്ങളിൽ മാതാപിതാക്കളുടെ സന്തോഷവും അഭിനന്ദനവും കുട്ടികൾ മറക്കില്ല. അതുപോലെ, കുട്ടി പരാജയപ്പെട്ടാലും “കുഴപ്പമില്ല, അടുത്ത തവണ ശ്രമിക്കാമല്ലോ” എന്ന് കൂടെ നിൽക്കുന്ന മാതാപിതാക്കളെയും അവർ ഓർക്കും.

കുട്ടികൾക്ക് ഏറ്റവും ആവശ്യമുള്ളത് എന്താണ്?

കുട്ടികൾക്ക് എല്ലാം നൽകാൻ മാതാപിതാക്കൾക്ക് കഴിയണമെന്നില്ല. വിലകൂടിയ കളിപ്പാട്ടങ്ങൾ, വലിയ വീട്, ആഡംബര ജീവിതം എന്നിവയേക്കാൾ കുട്ടിയുടെ മനസിൽ പതിയുന്നത് സ്നേഹം, സമയം, ശ്രദ്ധ, പിന്തുണ, സുരക്ഷിതത്വം, അംഗീകാരം എന്നിവയാണ്. കുട്ടികൾ ഒരിക്കൽ വളർന്ന് സ്വന്തം ജീവിതത്തിലേക്ക് കടക്കും. അപ്പോൾ ബാല്യത്തിലെ എല്ലാ വസ്തുക്കളും അവർ ഓർക്കണമെന്നില്ല.

എന്നാൽ “എന്റെ മാതാപിതാക്കൾ എന്നെ സ്നേഹിച്ചിരുന്നു, എന്റെ വാക്കുകൾ കേട്ടിരുന്നു, ഞാൻ വിഷമിച്ചപ്പോൾ കൂടെയുണ്ടായിരുന്നു” എന്ന അനുഭവം ജീവിതകാലം മുഴുവൻ അവരോടൊപ്പം ഉണ്ടാകാം. അതുകൊണ്ട് കുട്ടികൾക്ക് നൽകാവുന്ന ഏറ്റവും വലിയ സമ്മാനം നമ്മുടെ സമയവും ശ്രദ്ധയും സ്നേഹവുമാണ്.