പഴം കഴിച്ച പിന്നാലെ വെള്ളം കുടിക്കുന്ന ശീലമുണ്ടോ?

വേനൽച്ചൂടിനെ ഒന്നു തണുപ്പിക്കാൻ വാഴപ്പഴം നല്ലതാണ്. പൊട്ടാസ്യം, മ​ഗ്നീഷ്യം ഉൾപ്പെടെ നിരവധി ധാതുക്കളും വിറ്റാമിനുകളും പഴത്തിൽ അടങ്ങിയിട്ടുണ്ട്. പഴം ദിവസവും കഴിക്കുന്നത് ആരോ​ഗ്യത്തിന് മികച്ചതാണ്. എന്നാൽ ശരിയായ രീതിയിൽ കഴിച്ചില്ലെങ്കിൽ ഇതെല്ലാം വെറുതെയാകുമെന്നാണ് ആരോ​ഗ്യവിദ​ഗ്ധരുടെ അഭിപ്രായം. പഴം കഴിച്ച പിന്നാലെ ചിലർ തണുത്ത വെള്ളം കുടിക്കുന്ന ശീലമുണ്ട്.

ആയുർവേദം പ്രകാരം വാഴപ്പഴം ശരീരത്തിൽ കഫദോഷം വർധിപ്പിക്കും. വാഴപ്പഴം കഴിച്ചയുടനെ തണുത്ത വെള്ളം കുടിച്ചാൽ അത് ശരീരത്തിന്റെ ആന്തരിക സന്തുലനത്തെ ബാധിക്കുകയും തൊണ്ടയ്ക്ക് അസ്വസ്ഥത, ചുമ, ജലദോഷം തുടങ്ങിയവയ്ക്ക് കാരണമാകുകയും ചെയ്യും. കഫം അധികമുള്ളവരിലാണ് ഇതിന് സാധ്യത കൂടുതൽ.

വാഴപ്പഴത്തിൽ നാരുകളും നാച്വറൽ ഷുഗറും ധാരാളമുണ്ട്. എന്നാൽ വാഴപ്പഴം കഴിച്ചയുടനെ വെള്ളം കുടിക്കുന്നത് പഞ്ചസാരയുടെ ആഗിരണം വേഗത്തിലാക്കും. ഇത് രക്തത്തിലെ ഗ്ലൂക്കോസിന്റെ അളവ് താൽക്കാലികമായി കൂടാൻ കാരണമാകും.

വാഴപ്പഴം കഴിച്ചശേഷം വെള്ളം കുടിക്കുന്നത് ഉദരത്തിലെ ആസിഡുകളുടെ സന്തുലനത്തെ ബാധിക്കും. ഇത് വയറിനു കനം, വായുകോപം, വയറിന് അസ്വസ്ഥത എന്നിവ ചിലരിലുണ്ടാക്കും. ചിലർക്ക് ഓക്കാനം വരും. പഴം കഴിച്ചശേഷം കുറഞ്ഞത് 20 മുതൽ 30 മിനിറ്റ് വരെ കഴിഞ്ഞ ശേഷമേ വെള്ളം കുടിക്കാവൂ എന്ന് ആരോഗ്യവിദഗ്ധർ പറയുന്നു.

നല്ല ദാഹം തോന്നുന്നവർ പഴം കഴിച്ചയുടനെ വെള്ളം കുടിക്കുന്നതിനു പകരം, പഴം കഴിക്കുന്നതിനു പത്തോ പതിനഞ്ചോ മിനിറ്റ് മുൻപ് വെള്ളം കുടിക്കുക. വാഴപ്പഴം ഊർജത്തിന്റെ മികച്ച ഉറവിടമാണ്. ഇതിന്റെ പൂർണമായ ഗുണങ്ങൾ ലഭിക്കാനും ദഹനസംബന്ധമായ പ്രശ്നങ്ങൾ അകറ്റാനും മൈൻഡ്ഫുൾ ഈറ്റിങ്ങ് സഹായിക്കും.