നമ്മുടെ വീട് എത്രത്തോളം വൃത്തിയുള്ളതും ക്രമമുള്ളതുമാണെന്നത് ശാരീരിക ആരോഗ്യത്തെ മാത്രമല്ല, നമ്മുടെ മാനസികാരോഗ്യത്തെയും സ്വാധീനിക്കും. കസേരയിൽ കൂട്ടിയിട്ടിരിക്കുന്ന വസ്ത്രങ്ങൾ, തറയിൽ വാരിവലിച്ചിട്ടിരിക്കുന്ന സാധാനങ്ങൾ വൃത്തിയാക്കാത്ത അടുക്കള... ഇതൊക്കെ പലർക്കും സാധാരണ കാഴ്ചയാണെങ്കിലും ചില‍ക്ക് അലങ്കോലമായ മുറിയിൽ ദീർഘനേരം കഴിയുന്നത് മനസ്സിൽ അമിത സമ്മർദവും അസ്വസ്ഥതയും ഉണ്ടാക്കാം. സ്വഭാവം, മാനസികാവസ്ഥ, ജീവിതസാഹചര്യങ്ങൾ എന്നിവയെല്ലാം ഇതിൽ പങ്കുവഹിക്കുന്നു.
മേശപ്പുറത്തെ പേപ്പറുകൾ, അലമാരയിൽ അടുക്കിവെക്കാത്ത വസ്ത്രങ്ങൾ, പൂർത്തിയാക്കാത്ത ജോലികളെ ഓർമിപ്പിക്കുന്ന സാധനങ്ങൾ എന്നിവ കാണുമ്പോൾ മനസ്സിന് ഒരേസമയം നിരവധി കാര്യങ്ങൾ ശ്രദ്ധിക്കേണ്ടിവരുന്നു. ഇത് ചിലരിൽ മാനസികമായ അമിതഭാരം അനുഭവപ്പെടാൻ ഇടയാക്കാം. എന്താണ് ആദ്യം ചെയ്യേണ്ടതെന്ന് തീരുമാനിക്കാൻ കഴിയാത്ത അവസ്ഥയും ജോലികൾ തുടങ്ങാനുള്ള മടിയും ഇതിന്റെ ഭാഗമായി ഉണ്ടാകാം.
വീട്ടിലിരുന്ന് ജോലി ചെയ്യുകയോ പഠിക്കുകയോ ചെയ്യുന്നവർക്ക് ക്രമമില്ലാത്ത മുറി കൂടുതൽ ബുദ്ധിമുട്ടുണ്ടാക്കിയേക്കാം. ചുറ്റും കാണുന്ന അനാവശ്യ വസ്തുക്കളിൽ ശ്രദ്ധ തിരിക്കാനുള്ള സാധ്യതയുണ്ട്. ഒരു ജോലിയിൽ ശ്രദ്ധ കേന്ദ്രീകരിക്കുന്നതിനിടെ മറ്റൊരു ജോലി ചെയ്യേണ്ടതിനെക്കുറിച്ചുള്ള ഓർമകൾ മനസ്സിലേക്ക് വരാം. പ്രത്യേകിച്ച് വായിക്കാനും എഴുതാനും ഓൺലൈൻ ജോലികൾ ചെയ്യാനും ഉപയോഗിക്കുന്ന മേശ അലങ്കോലമായി കിടക്കുമ്പോൾ ആവശ്യമായ സാധനങ്ങൾ കണ്ടെത്താൻ കൂടുതൽ സമയം ചെലവഴിക്കേണ്ടിവരും. ഇത് ജോലിയുടെ ഒഴുക്കിനെ തടസ്സപ്പെടുത്തുകയും നിരാശ വർധിപ്പിക്കുകയും ചെയ്യാം.
കഴുകാനുള്ള വസ്ത്രങ്ങൾ, ക്രമീകരിക്കാനുള്ള അലമാര, മാറ്റിവെച്ച വീട്ടുജോലികൾ എന്നിവ മുറി കാണുമ്പോൾ ചെയ്യാനുള്ള കാര്യങ്ങളെക്കുറിച്ച് വീണ്ടും വീണ്ടും ഓർമ വരാം. വിശ്രമിക്കാനായി മുറിയിൽ ഇരിക്കുമ്പോഴും പൂർത്തിയാക്കാത്ത ജോലികളെക്കുറിച്ച് ചിന്തിക്കേണ്ടിവരുന്നത് ചിലരിൽ കുറ്റബോധവും സമ്മർദവും സൃഷ്ടിച്ചേക്കാം. ശരീരത്തിന് വിശ്രമം ലഭിക്കുന്നുണ്ടെങ്കിലും മനസ്സിന് പൂർണമായി ശാന്തമാകാൻ കഴിയാത്ത സാഹചര്യം ഇതിലൂടെ ഉണ്ടാകാം.
ദിവസം മുഴുവൻ ജോലിയും കുടുംബ ഉത്തരവാദിത്തങ്ങളും കാരണം ക്ഷീണിതരായി വരുന്നവർക്ക് വീട്ടിലെ അലങ്കോലമായ അന്തരീക്ഷം അധിക ഭാരമായി തോന്നാം. വീട്ടിലെത്തുമ്പോൾ സമാധാനത്തോടെ വിശ്രമിക്കണമെന്ന ആഗ്രഹമുണ്ടെങ്കിലും ചുറ്റും കിടക്കുന്ന സാധനങ്ങൾ വീണ്ടും ജോലികളെക്കുറിച്ച് ഓർമിപ്പിച്ചേക്കാം.
കിടപ്പുമുറി വിശ്രമത്തിനുള്ള ഇടമാണ്. എന്നാൽ കിടക്കയിൽ വസ്ത്രങ്ങൾ കൂട്ടിയിട്ടിരിക്കുകയോ മേശപ്പുറത്ത് ജോലിസംബന്ധമായ സാധനങ്ങൾ നിറഞ്ഞിരിക്കുകയോ ചെയ്യുമ്പോൾ മുറി വിശ്രമത്തിനുള്ള ഇടമെന്നതിലുപരി ജോലികൾ ഓർമിപ്പിക്കുന്ന ഇടമായി തോന്നാം. ചിലർക്ക് ഇത് ഉറങ്ങുന്നതിന് മുമ്പ് മനസ്സ് ശാന്തമാക്കാൻ ബുദ്ധിമുട്ടുണ്ടാക്കാം.
മുറി ക്രമീകരിക്കുന്നത് ചിലർക്ക് കൂടുതൽ നിയന്ത്രണബോധവും ശാന്തതയും നൽകാം. 2025-ൽ പ്രസിദ്ധീകരിച്ച ഒരു പഠനവും വീടുകളിലെ അലങ്കോലാവസ്ഥയും മാനസിക ക്ഷേമത്തിലെ കുറവും തമ്മിൽ ബന്ധമുണ്ടെന്ന് കണ്ടെത്തിയിട്ടുണ്ട്. വീടിന്റെ സൗന്ദര്യത്തെക്കുറിച്ചുള്ള വ്യക്തിയുടെ കാഴ്ചപ്പാടും ഈ ബന്ധത്തിൽ ഒരു പങ്കുവഹിക്കുന്നതായി പഠനം സൂചിപ്പിക്കുന്നു. എന്നാൽ പഠനം സർവേ അടിസ്ഥാനത്തിലുള്ളതായതിനാൽ വൃത്തിയാക്കുന്നതിലൂടെ തന്നെ മാനസികാരോഗ്യം മെച്ചപ്പെടുമെന്ന് ഉറപ്പിച്ച് പറയാനാവില്ല.
മുഴുവൻ ഒരുമിച്ച് വൃത്തിയാക്കാൻ ശ്രമിക്കാതെ, ആദ്യം മേശയോ കിടക്കയോ ക്രമീകരിക്കുക. ചെറിയൊരു ഭാഗം വൃത്തിയാക്കിയാലും ജോലി പൂർത്തിയാക്കിയതിൻ്റെ സംതൃപ്തി ലഭിക്കാം.
ഉപയോഗിക്കുന്ന സാധനങ്ങൾ എളുപ്പത്തിൽ ലഭിക്കുന്നിടത്ത് വയ്ക്കുക. ഉപയോഗിക്കാത്ത വസ്തുക്കൾ അനുയോജ്യമായ ഇടങ്ങളിൽ സൂക്ഷിക്കുന്നത് കാഴ്ചയിലെ അലങ്കോലാവസ്ഥ കുറയ്ക്കാൻ സഹായിക്കും.
പഠിക്കാനും ജോലി ചെയ്യാനും ഉപയോഗിക്കുന്ന മേശയിലെ അനാവശ്യ പേപ്പറുകളും സാധനങ്ങളും മാറ്റിവയ്ക്കുക. ആവശ്യമായ വസ്തുക്കൾ മാത്രം സമീപത്ത് സൂക്ഷിക്കുന്നത് ശ്രദ്ധ കേന്ദ്രീകരിക്കാൻ സഹായിച്ചേക്കാം.
ദിവസവും പത്ത് മിനിറ്റ് മുറി ക്രമീകരിക്കാൻ മാറ്റിവയ്ക്കാം. വസ്ത്രങ്ങൾ മടക്കിവയ്ക്കുക, മാലിന്യങ്ങൾ നീക്കുക, സാധനങ്ങൾ അവയുടെ സ്ഥാനത്ത് വയ്ക്കുക തുടങ്ങിയ ചെറിയ കാര്യങ്ങൾ മതിയാകും.
വീട് എപ്പോഴും മിനുക്കിവെച്ചിരിക്കണമെന്നില്ല. കുട്ടികളുള്ള വീടുകളിലും തിരക്കേറിയ ജീവിതസാഹചര്യങ്ങളിലും സാധനങ്ങൾ ചിതറിക്കിടക്കുന്നത് സ്വാഭാവികമാണ്. വൃത്തിയാക്കുന്നത് മറ്റൊരു സമ്മർദമായി മാറാതിരിക്കാൻ ശ്രദ്ധിക്കുക.
മുറി വൃത്തിയാക്കാൻ കഴിയാത്തത് അലസതകൊണ്ട് മാത്രമല്ല. ജോലിഭാരം, സമയക്കുറവ്, ശാരീരിക ക്ഷീണം, മാനസിക സമ്മർദം, പ്രചോദനക്കുറവ് തുടങ്ങിയ നിരവധി കാരണങ്ങൾ ഇതിന് പിന്നിലുണ്ടാകാം. ചിലപ്പോൾ മാനസികമായി തളർന്നിരിക്കുന്നതിനാൽ സാധാരണ വീട്ടുജോലികൾ പോലും ബുദ്ധിമുട്ടായി തോന്നാം. അതിനാൽ മുറി അലങ്കോലമായിരിക്കുന്നതിന്റെ പേരിൽ സ്വയം കുറ്റപ്പെടുത്തുന്നത് ഒഴിവാക്കണം.
അതേസമയം, വീട്ടിലെ അലങ്കോലാവസ്ഥയോടൊപ്പം നീണ്ടുനിൽക്കുന്ന ഉത്കണ്ഠ, വിഷാദം, ഉറക്കപ്രശ്നങ്ങൾ, ദൈനംദിന കാര്യങ്ങൾ ചെയ്യാനുള്ള ബുദ്ധിമുട്ട് എന്നിവ അനുഭവപ്പെടുന്നുണ്ടെങ്കിൽ ഒരു മാനസികാരോഗ്യ വിദഗ്ധന്റെ സഹായം തേടുന്നത് നല്ലതാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
