രോ​ഗപ്രതിരോധ ശേഷിക്ക് മഞ്ഞൾ ചേർത്ത പാൽ, പക്ഷെ ​ഗർഭിണികൾ കുടിക്കുമ്പോൾ സൂക്ഷിക്കണം

ഗർഭിണിയായിരുമ്പോൾ പ്രത്യേക പരിചരണം ആവശ്യമാണ്. അതുകൊണ്ട് തന്നെ നൂറായിരം അഭിപ്രായങ്ങളും ഉണ്ടാകും. ചില നാട്ടുവൈദ്യവും പൊടിക്കൈകളും പരിചയപ്പെടുത്തുകയും ചെയ്യാം. ഇക്കൂട്ടത്തിൽ പെട്ടതാണ് പാലിൽ മഞ്ഞൾ ചേർത്ത് കുടിക്കുന്നത്.

മഞ്ഞളിൽ അടങ്ങിയിട്ടുള്ള കുർകുമിൻ ആന്റി-ഇൻഫ്‌ളമേറ്ററി, ആന്റിഓക്‌സിഡന്റ് ​ഗുണങ്ങളടങ്ങിയതാണ്. ഇത് പാലിനൊപ്പം ചേരുമ്പോൾ ദഹനം സുഗമമാകുകയും ​ഗ്യാസ് പോലുള്ള പ്രശ്നങ്ങളെ അകറ്റുകയും പ്രതിരോധശേഷി വർധിപ്പിക്കുകയും ചെയ്യും. ​ഗർഭിണികൾക്ക് മഞ്ഞൾ കലർത്തിയ പാല് സുരക്ഷിതമാണെങ്കിലും മിതമായ അളവിൽ മാത്രമേ നൽകാവൂ എന്ന് ആരോ​ഗ്യ വിദ​ഗ്ധർ പറയുന്നു.

ഗർഭകാലത്ത് പ്രതിരോധശേഷി കുറയാനുള്ള സാധ്യത കൂടുതലായതിനാലും ബാക്ടീരിയ മൂലമുണ്ടാകുന്ന അസുഖങ്ങളിൽ നിന്ന് മഞ്ഞൾ ചേർത്ത പാല് സംരക്ഷിക്കുമെന്നതുകൊണ്ടുമാണ് പലരും ഇത് കുടിക്കുന്നത്. ഗർഭകാലത്തോ പ്രസവശേഷമോ ഉണ്ടാകാനിടയുള്ള പ്രീഇക്ലാംസിയ എന്ന ഗൗരവമായ രോഗാവസ്ഥയെ തടുക്കാനും ഇത് നല്ലതാണ്.

അതേസമയം, ഈ പാനീയം കുടിക്കുന്നത് ശരീരത്തിലെ ഈസ്ട്രജന്റെ അളവ് വ്യത്യാസപ്പെടുത്തുകയും അത് ഗർഭപാത്ര സങ്കോചങ്ങളിലേക്കും ബ്ലീഡിങ്ങിലേക്കും നയിക്കുമെന്നും ചിലർ പറയുന്നുണ്ട്. അതുകൊണ്ട് ഗൈനക്കോളജിസ്റ്റിന്റെ അറിവോടെ മാത്രമേ ഇത് കുടിക്കാവൂ.