ദിവസവും രണ്ട് ടീസ്പൂൺ‌; കൂടിപ്പോയാൽ ചിയ വിത്തുകൾ ആരോ​ഗ്യത്തിന് പണി തരും

കാഴ്ചയില്‍ ചെറുതെങ്കിലും പോഷകഗുണങ്ങള്‍ കൊണ്ട് സമ്പന്നമാണ് ചിയ വിത്തുകള്‍. സാൽവിയ ഹിസ്പാനിക്ക സസ്യത്തിൽ നിന്നെടുക്കുന്ന ചിയ വിത്തുകള്‍ ഒമേഗ-3 ഫാറ്റി ആസിഡുകൾ, ഫൈബർ, പ്രോട്ടീൻ, ആന്റിഓക്‌സിഡന്റുകൾ എന്നിവയാൽ സമൃദ്ധമാണ്. എന്നാൽ ഇവ അധികമായി കഴിക്കുന്നതും ആരോ​ഗ്യപ്രശ്നങ്ങൾക്ക് കാരണമാകും.

ഇതിലടങ്ങിയിരിക്കുന്ന നാരുകൾ കുടലിന്റെ ആരോഗ്യത്തിന് ഗുണം ചെയ്യുമെങ്കിലും അമിതമായാൽ മലബന്ധം, വയറുവേദന, ഗ്യാസ് സംബന്ധമായ പ്രശ്‌നങ്ങൾ, ദഹനക്കേട്, വയറിളക്കം തുടങ്ങിയവയ്ക്ക് കാരണമാകുന്നു.

ചിയ വിത്തുകൾ ചവച്ചരച്ച് കഴിക്കേണ്ടതും പ്രധാനമാണ്. എന്നാൽ ശരിയായി ചവയ്ക്കാതെ ചിയ വിത്തുകൾ കഴിക്കുന്നതിന് പിന്നാലെ വെള്ളം കുടിക്കുന്നത് ഇവ ജെൽ പോലെയായി മാറുകയും തൊണ്ടയിൽ കുടുങ്ങാനും സാധ്യതയുണ്ട്. ചിലപ്പോൾ മരണം വരെ സംഭവിക്കാം.

കൂടാതെ ചിയ വിത്തുകൾ രക്തത്തിലെ പഞ്ചസാരയുടെ അളവിനെ ഗുരുതരമായി ബാധിക്കാം. ചില സാഹചര്യങ്ങളിൽ രക്തം കട്ടപിടിക്കുന്നതിനും ചിയ വിത്തുകൾ കാരണമാകുന്നു. ഇത് പുരുഷൻമാരിലുണ്ടാകുന്ന പ്രോസ്‌റ്റേറ്റ് കാൻസറിനും കാരണമാകുന്നതായാണ് റിപ്പോർട്ടുകള്‍.

ഫ്രൂട്സ് സാലഡ് ആരോഗ്യകരമാണ്, എന്നാല്‍ പഴങ്ങള്‍ തിരഞ്ഞെടുക്കുമ്പോള്‍ ഈ കോംമ്പോ ഒഴിവാക്കാം

ദിവസം എത്ര ചിയ വിത്തുകൾ കഴിക്കണം?

ദിവസവും ഡയറ്റില്‍ ഉൾപ്പെടുത്താൻ പറ്റിയ മികച്ച ഒരു ഭക്ഷണമാണ് ചിയ വിത്തുകൾ. നാഷണൽ ഇൻസ്റ്റിറ്റ്യൂട്ട് ഓഫ് ഹെൽത്തിന്റെ പഠനമനുസരിച്ച് സ്ത്രീകളും പുരുഷന്മാരും പ്രതിദിനം 25 മുതല്‍ 38 ഗ്രാം വരെ നാരുകൾ കഴിക്കണം. അമിതമായ ഉപയോഗം പല ആരോഗ്യ പ്രശ്‌നങ്ങൾക്കും കാരണമാകും.