മോര് കാച്ചാനും തക്കാളിക്കറിയുണ്ടാക്കാനും ഇരുമ്പ് ചീനച്ചട്ടി, പണി പിന്നാലെ

സ്റ്റീലും അലൂമിനിയവും നോണ്‍ സ്റ്റിക്ക് പാത്രങ്ങളുമെല്ലാം അടുക്കള കീഴടക്കിയെങ്കിലും തലമുറകളായി കൈമാറി വന്ന പല വിഭവങ്ങളുടെയും രഹസക്കൂട്ട് ഇരുമ്പ് പാത്രങ്ങളുടെ ആ രുചിയാണ്. രുചിയും ആരോ​ഗ്യ​ഗുണവും തിരിച്ചറിഞ്ഞതോടെ ഇരുമ്പ് പാത്രങ്ങൾ മോഡേൺ അടുക്കളകളുടെയും ഭാ​ഗമാകുന്ന കാലമാണിത്. ഇരുമ്പ് പാത്രത്തിൽ ഭക്ഷണം പാകം ചെയ്യുന്നത് ഭക്ഷണത്തിലേക്ക് ഇരുമ്പിന്റെ അംശം എത്താനും ഇത് വിളർച്ച പോലുള്ള അവസ്ഥ കുറയ്ക്കാനും സഹായിക്കും. എന്നാൽ, എല്ലാ വിഭവങ്ങളും ഇരുമ്പു പാത്രങ്ങളിൽ പാചകം ചെയ്യുന്നത് സുരക്ഷിതമല്ലതാനും.

​ഗുണത്തെക്കാൾ ദോഷം ചെയ്യും

ഇരുമ്പ് ഒരു റിയാക്ടീവ് ലോഹമാണ്. അതായത്, ചില രാസവസ്തുക്കളുമായി ഇത് എളുപ്പത്തിൽ പ്രതിപ്രവർത്തിക്കും. പുളിപ്പുള്ള ഭക്ഷണത്തിലെ ആസിഡുകളുമായാണ് ഇരുമ്പ് പ്രധാനമായും പ്രതിപ്രവർത്തിക്കുന്നത്. ഇതേ തുടർന്ന് കൂടായി അളവിൽ ഇരുമ്പിന്റെ അംശം ശരീരത്തിൽ എത്താനും ശരീരത്തിൽ അമിതമായി ഇരുമ്പ് ശേഖരിക്കപ്പെടുന്ന 'ഹീമോക്രോമാറ്റോസിസ്' പോലുള്ള അവസ്ഥയ്ക്ക് കാരണമാവുകയും ചെയ്യുന്നു. മാത്രമല്ല, ഇത്തരം ഭക്ഷണത്തിന്റെ രുചിയിലും നിറത്തിലും വ്യത്യാസം ഉണ്ടാക്കാം.

ഇവ ഇരുമ്പ് പാത്രത്തിൽ പാകം ചെയ്യരുത്

പ്രധാനമായും അസിഡിറ്റി (പുളിപ്പ്) കൂടിയ ഭക്ഷണങ്ങൾ ഇരുമ്പ് പാത്രത്തിൽ പാകം ചെയ്യുന്നത് ഒഴിവാക്കണം. അതായത്, പുളിയുള്ള കറികൾ (പുളിശ്ശേരി, സാമ്പാർ, രസം), വാളൻപുളി, കുടമ്പുളി, തക്കാളി തുടങ്ങിയ പുളിരസമുള്ള ചേരുവകൾ ധാരാളമായി ഉപയോഗിക്കുന്ന വിഭവങ്ങൾ ഇരുമ്പ് പാത്രത്തിൽ ഉണ്ടാക്കുമ്പോൾ ഇവയിലെ ആസിഡ് ഇരുമ്പുമായി പ്രതിപ്രവർത്തിക്കുകയും കറിക്ക് കറുത്ത നിറവും ലോഹരുചിയും നൽകുകയും ചെയ്യും.

അച്ചാറുകൾ, ചിലതരം സാലഡ് ഡ്രെസ്സിംഗുകൾ, അല്ലെങ്കിൽ വിനാഗിരി (വെള്ള വിനാഗിരി, ആപ്പിൾ സൈഡർ വിനാഗിരി) മുതലായവ പ്രധാന ചേരുവയായുള്ള ഏതൊരു വിഭവവും ഇരുമ്പുപാത്രങ്ങളിൽ നിന്ന് അകറ്റി നിർത്തണം. വിനാഗിരിയിലെ അസറ്റിക് ആസിഡ് ഇരുമ്പുമായി പ്രതിപ്രവർത്തിച്ച് അസ്വാഭാവിക രുചിയുണ്ടാക്കും. ചിലതരം പച്ചക്കറികൾ, പ്രത്യേകിച്ച് നീളൻ പയർ, ചീര പോലുള്ള ചിലതരം ഇലക്കറികൾ എന്നിവ ഇരുമ്പുപാത്രങ്ങളിൽ വെച്ച് പാചകം ചെയ്യുമ്പോൾ നിറം മാറാൻ സാധ്യതയുണ്ട്. ചിലപ്പോൾ ഒരുതരം കറുത്ത നിറവും ഇവയ്ക്ക് വന്നേക്കാം.