അത്ഭുത മുട്ട! വിയറ്റ്നാമിലെ ഈ മുട്ട കഴിച്ചാൽ നിങ്ങൾക്ക് ഏഴ് വയസു കുറയും!

പ്രായം കുറയ്ക്കുന്ന മുട്ട! അൽപം വിചിത്രമെന്ന തോന്നിയാലും, അത്തരം മുട്ടകൾ ഉണ്ടെന്നാണ് വിയറ്റ്നാമികൾ പറയുന്നത്. പറഞ്ഞു വരുന്നത് സോഷ്യൽമീഡിയയിൽ ഇപ്പോൾ വൈറലായ 'ലോഞ്ചിവിറ്റി എഗ്ഗി'നെക്കുറിച്ചാണ്. ഇത് ഒരു സാധാരണ മുട്ടയല്ല, ഈ മുട്ടകൾ കഴിച്ചാൽ നിങ്ങൾക്ക് ഏഴ് വയസു വരെ കുറയുമെന്നാണ് ഇവിടുത്തുകാർ പറയുന്നത്.

വിയറ്റ്നാമിലെ ഡാ നങ് എന്ന മലയോര പട്ടണത്തിലാണ് ഈ പുഴുങ്ങിയ മുട്ട കിട്ടുന്നത്. മുട്ടയ്ക്കല്ല, മുട്ട പുഴുങ്ങുന്ന രീതിയാണ് ഇവയെ പ്രസിദ്ധമാക്കുന്നത്. സാധാരണ നമ്മൾ ചെയ്യുന്ന പോലെ അടുപ്പിൽ വെള്ളത്തിലിട്ട് വേവിച്ചെടുക്കുകയല്ല ഇവിടെ ചെയ്യുന്നത്. പട്ടണത്തിന് സമീപം ന്യൂയി തൻ തായ് ഹോട്ട് സ്പ്രിങ്സ് പാർക്കിലെ സ്വാഭാവിക ചൂടുറവകളിൽ വെച്ചാണ് ഈ മുട്ടകള്‍ വേവിക്കുന്നത്.

മലയിടുക്കുകളിലൂടെ ഒഴുകിയെത്തുന്ന ഈ ചൂടുനീരുറവകളിലെ വെള്ളത്തില്‍ ധാരാളം ധാതുക്കളുടെ സാന്നിധ്യമുണ്ട്. 65°C മുതൽ 75°C വരെ താപനിലയുള്ള ഉറവയിൽ, ഏകദേശം 15-20 മിനിറ്റ് സമയം കൊണ്ടാണ് മുട്ടകൾ വേവിക്കുന്നത്. ഈ പ്രത്യേക രീതിയിൽ വേവിക്കുമ്പോൾ മുട്ടയ്ക്ക് ആരോ​ഗ്യ​ഗുണങ്ങളും രുചിയും കൂടുമെന്നാണ് വിശ്വാസം.

മുട്ടയിലെ മഞ്ഞക്കരുവിനെ യിൻ എന്നും വെള്ളയെ 'യാങ്' എന്നുമാണ് വിശേഷിപ്പിക്കുന്നത്. ഈ ലോഞ്ചിവിറ്റി എഗ്ഗ് കഴിക്കുന്നത് ദീർഘായുസ്സ് നൽകുമെന്നും കുറഞ്ഞത് 7 വയസ്സ് കുറഞ്ഞതായി തോന്നുമെന്നും ഒരു ഐതിഹ്യം പോലെ ഇവർ പറയുന്നു. എന്നാല്‍, ഇതിനു ഇതുവരെ ശാസ്ത്രീയ വിശദീകരണങ്ങള്‍ ഒന്നും ലഭിച്ചിട്ടില്ല.