ഫ്രിഡ്ജ് ഇല്ലെങ്കില്‍ എല്ലാം കുളമാകും, പക്ഷെ അടുക്കളയിലെ ഈ സ്ഥിരം സാധനങ്ങള്‍ വയ്ക്കരുത് 

ഫ്രിഡ്ജ് ഇല്ലാത്ത അടുക്കളയെക്കുറിച്ച് ചിന്തിക്കാന്‍ തന്നെ കഴിയാത്ത അവസ്ഥയായിട്ടുണ്ട്. ഭക്ഷണസാധനങ്ങള്‍ കൂടുതല്‍ ദിവസം കേടുകൂടാതെ സൂക്ഷിക്കാന്‍ ഫ്രിഡ്ജ് സഹായിക്കുമെന്നത് ശരിയാണെങ്കിലും ഇത് എല്ലാ കാര്യത്തിലും അങ്ങനെയായിരിക്കണം എന്നില്ല. ഫ്രിഡ്ജില്‍ സ്ഥാനമില്ലാത്ത പല സാധനങ്ങളും പലപ്പോഴും നമ്മള്‍ അവിടെ എടുത്തുവയ്ക്കാറുണ്ട്. പച്ചക്കറികളും പഴങ്ങളുമൊക്കെ ഇക്കൂട്ടത്തിലുണ്ട്. എല്ലാ വീടുകളിലും പതിവായി ഉപയോഗിക്കുന്ന എന്നാല്‍ ഫ്രിഡ്ജില്‍ സൂക്ഷിക്കേണ്ടാത്തവ ഏതൊക്കെയെന്ന് നോക്കാം...

സവോള
തൊലി പൊളിക്കാത്ത സവോളകള്‍ ഫ്രിഡ്ജില്‍ സൂക്ഷിക്കുകയേ ചെയ്യരുത്. ഇങ്ങനെ ചെയ്താല്‍ സവോള ചീഞ്ഞുപോകാനാണ് സാധ്യത. ഇനി നിങ്ങള്‍ തൊലി പൊളിച്ച് മുറിച്ച സവോളയുടെ ബാക്കിവന്ന കഷ്ണമാണെങ്കിലും ഒരു ദിവസത്തില്‍ കൂടുതല്‍ ഫ്രിഡ്ജില്‍ വച്ചതിന് ശേഷം എടുത്തുപയോഗിക്കരുത്. 

തക്കാളി
തക്കാളി ഫ്രിഡ്ജില്‍ സൂക്ഷിക്കുന്നത് ഗുണത്തേക്കാള്‍ ദോഷമാണ് ചെയ്യുന്നത്. പഴുക്കാത്ത തക്കാളിയാണ് ഫ്രിഡ്ജില്‍ വയ്ക്കുന്നതെങ്കില്‍ അത് തക്കാളിയുടെ തൊലിക്ക് കേടുവരുത്തുകയും രുചിയും രൂപവും വരെ നശിപ്പിക്കുകയും ചെയ്യും. അതേസമയം നന്നായി പഴുത്ത തക്കാളി പ്ലാസ്റ്റിക് കവറിലാക്കി ഫ്രിഡ്ജില്‍ സൂക്ഷിക്കാം. 

നട്ട്‌സ്, ഡ്രൈ ഫ്രൂട്ട്‌സ്
കഴിച്ച് ബാക്കിവരുന്ന ഡ്രൈ ഫ്രൂട്ട്‌സും നട്ട്‌സുമെല്ലാം ഫ്രിഡ്ജിലും ഫ്രീസറിലും വയ്ക്കുന്നവര്‍ ഒരുപാടുണ്ട്. എന്നാല്‍ ഫ്രിഡ്ജില്‍ സൂക്ഷിക്കുന്നതുവഴി ഇവയുടെ യഥാര്‍ത്ഥ രുചിയും മണവും നഷ്ടപ്പെടും. അതുകൊണ്ട് എയര്‍ടൈറ്റ് ആയിട്ടുള്ള പാത്രത്തില്‍ ഇവ സൂക്ഷിക്കുന്നതാണ് ഏറ്റവും നല്ലത്. 

ഉരുളക്കിഴങ്ങ്
തൊലി കളയാത്ത ഉരുളക്കിഴങ്ങ് ഒരു കാരണവശാലും ഫ്രിഡ്ജില്‍ സൂക്ഷിക്കരുത്. ഫ്രിഡ്ജിലിരുന്ന് തണുക്കുന്നത് ഉരുളക്കിഴങ്ങിലെ അന്നജം പഞ്ചസാരയായി മാറാന്‍ കാരണമാകും. ഇത് അമിനോ ആസിഡുമായി ചേരുന്നത് ശരീരത്തിന് ദോഷകരമാണ്. ഫ്രിഡ്ജിലെ നനവ് ഉരുളക്കിഴങ്ങ് പെട്ടെന്ന് ചീത്തയാകാനും കാരണമാകും. 

എണ്ണ
പാചകത്തിനുപയോഗിക്കുന്ന എന്തുതരം എണ്ണയാണെങ്കിലും അവ ഫ്രിഡ്ജില്‍ സൂക്ഷിച്ചാല്‍ കട്ടപിടിക്കും. അതുകൊണ്ട് പുറത്തുവച്ച് മോശമാകുന്നതിന് മുമ്പ് ഉപയോഗിച്ചുതീര്‍ക്കുകയാണ് ഏറ്റവും നല്ലത്. 

ബ്രെഡ്
കടയില്‍ നിന്ന് വാങ്ങിയ ഉടന്‍ ബ്രെഡ് എടുത്ത് ഫ്രിഡ്ജില്‍ വയ്ക്കുന്നത് പലരും ചെയ്യുന്ന അബദ്ധമാണ്. കാരണം ഇതും വിപരീത ഫലമാണ് ഉണ്ടാക്കുന്നത്. ഫ്രിഡ്ജില്‍ സൂക്ഷിക്കുന്നത് ബ്രെഡ് പെട്ടെന്ന് ചീത്തയാകാന്‍ കാരണമാകും. മാത്രവുമല്ല തണുപ്പില്‍ ഇരിക്കുന്നതുകൊണ്ടുതന്നെ മരച്ചുപോകുകയും ചെയ്യും. മുറിയില്‍ സൂര്യപ്രകാശം ഏല്‍ക്കാത്ത ഇടമാണ് ബ്രെഡ് സൂക്ഷിക്കാന്‍ ഏറ്റവും നല്ലത്.

ഈ വാര്‍ത്ത കൂടി വായിക്കൂ

സാമ്പാര്‍ കൂട്ടി സമൂസ കഴിച്ചിട്ടുണ്ടോ? "ഏറ്റവും മികച്ച സൗത്ത്-നോര്‍ത്ത് കോമ്പിനേഷന്‍"

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ