മുളങ്കൂമ്പ് കഴിച്ചിട്ടുണ്ടോ? ഗുണങ്ങൾ അറിഞ്ഞാൽ പാഴാക്കില്ല

മുളയുടെ വേരിൽ നിന്നും പൊട്ടിമുളയ്ക്കുന്ന ഇളം കൂമ്പുകൾ പലരുടെയും ശ്രദ്ധിയിൽപെട്ടിട്ടുണ്ടാവാം. മുളങ്കൂമ്പ് എന്നാണ് അവയെ വിളിക്കുന്നത്. നിരവധി പോഷക​ഗുണങ്ങൾ അടങ്ങിയ മുളങ്കൂമ്പ് കൊണ്ട് പല വിഭവങ്ങളും ഉണ്ടാക്കാറുണ്ട്. ഫ്രഷ് ആയും പുളിപ്പിച്ചും കാനുകളിൽ ആയും മുളങ്കൂമ്പ് ലഭ്യമാണ്. മുളങ്കൂമ്പിന് ഔഷധ​ഗുണങ്ങളും ഏറെയാണ്.

വിഷഹാരി

പാമ്പ്, തേൾ പോലുള്ള വിഷജന്തുക്കൾ കടിക്കുന്നതു മൂലമുണ്ടാകുന്ന വിഷം ചികിത്സിക്കാൻ മുളങ്കൂമ്പ് കൊണ്ടുണ്ടാക്കിയ ജ്യൂസ് ഫലപ്രദമാണെന്ന് പറയപ്പെടുന്നു. ആയുർവേദം പ്രകാരം, മുളങ്കൂമ്പ് ജ്യൂസ് മുറിവിൽ പുരട്ടുന്നതും വിഷാംശങ്ങളെ നീക്കാൻ സഹായിക്കും.

ശ്വാസകോശത്തിന്റെ ആരോഗ്യം

ശ്വാസകോശത്തിന്റെ ആരോ​ഗ്യം മെച്ചപ്പെടുത്തുന്നതിന് സഹായിക്കുന്ന ധാരാളം വിറ്റാമിനുകൾ മുളങ്കൂമ്പിൽ അടങ്ങിയിട്ടുണ്ട്. ഇത് ശ്വാസകോശ സംബന്ധമായ രോ​ഗങ്ങളുടെ അപകടസാധ്യത കുറയ്ക്കുന്നു.

ഗർഭിണികൾക്ക്

​ഗർഭകാലഘട്ടത്തിന്റെ അവസാന സമയം മുളങ്കൂമ്പ് ചെറിയ അളവിൽ ഭക്ഷണത്തിൽ ഉൾപ്പെടുത്തുന്നത് പ്രസവം എളുപ്പമാക്കാൻ സഹായിക്കുമെന്ന് ചൈനീസ് പാരമ്പര്യവൈദ്യം ചൂണ്ടിക്കാണിക്കുന്നു. എന്നാൽ വൈദ്യനിർദേശ പ്രകാരം മാത്രം കഴിക്കുക.

രോഗപ്രതിരോധ ശേഷി

ധാരാളം വിറ്റാമിനുകളുടെയും ധാതുക്കളുടെയും കലവറയാണ് മുളങ്കൂമ്പ്. ഇത് രോ​ഗ പ്രതിരോധശേഷി മെച്ചപ്പെടുത്താൻ സഹായിക്കും. തണുപ്പുകാലത്ത് മുളങ്കൂമ്പ് ഭക്ഷണത്തിൽ ഉൾപ്പെടുത്തുന്നത് ബാക്ടീരിയൽ-വൈറൽ അണുബാധകളിൽ നിന്ന് സംരക്ഷണം നൽകും.

ശരീരഭാരം കുറയ്ക്കും

മുളങ്കൂമ്പിൽ കലോറിയും വളരെ കുറവാണ്. ഇത് ശരീരഭാരം കുറയ്ക്കാനും സഹായിക്കും. ഒരു കപ്പ് മുളങ്കൂമ്പിൽ 13 കലോറിയും അര ​ഗ്രാം കൊഴുപ്പും മാത്രമേ അ‌ടങ്ങിയിട്ടുള്ളൂ. ഭക്ഷ്യനാരുകൾ ധാരാളം അടങ്ങിയതിനാൽ ദഹനത്തിനു സഹായകം, ഏറെ നേരം വയർ നിറഞ്ഞ തോന്നലുണ്ടാക്കാനും ഇത് സഹായിക്കും.