ചുണ്ടു ചുവപ്പിക്കാൻ ചെമ്പരത്തി, ഇനി സിംപിളായി വീട്ടിലുണ്ടാക്കാം ലിപ് ബാം

നമ്മൾ ഉപയോ​ഗിക്കുന്ന പല ലിപ്സ്റ്റിക്കുകളും ലിപ് ബാമുകളും പല കെമിക്കലുകളും അടങ്ങിയതാണ്. അവ കാലക്രമേണ ചുണ്ടുകളുടെ സ്വാഭാവിക നിറം നഷ്ടമാക്കുന്നതിനൊപ്പം ചുണ്ടുകളെ വരണ്ടതാക്കാനും കാരണമാകും. എപ്പോഴും പ്രകൃതിദത്തമായി ഉൽപാദിപ്പിക്കുന്ന വസ്തുക്കൾ ചുണ്ടുകളിൽ ഉപയോ​ഗിക്കുന്നതാണ് നല്ലത്.

ചെമ്പരത്തി പൂക്കൾ കാണാൻ മാത്രമല്ല, ഔഷധമൂല്യം കൊണ്ടും അവ മികച്ചതാണ്. രോ​ഗപ്രതിരോധ ശേഷി മുതൽ ചർമസംരക്ഷണത്തിന് വരെ ചെമ്പരത്തി ബഹുകേമമാണ്. അപ്പോൾ പിന്നിലെ നമ്മുടെ സുന്ദരമായ ചുണ്ടുകളെ സംരക്ഷിക്കുന്നത് ചെമ്പരത്തികൊണ്ടൊരു ലിപ്ബാം വീട്ടിൽ തന്നെ ഉണ്ടാക്കി നോക്കിയാലോ?

ആവശ്യമായ സാധനങ്ങൾ

• ചെമ്പരത്തിപ്പൂവ്

• വെള്ളിച്ചെണ്ണ

• നാരങ്ങനീര്

തയ്യാറാക്കുന്ന വിധം

ഏകദേശം രണ്ട് ചെമ്പരത്തി പൂക്കളുടെ ഇതളുകൾ വേർതിരിച്ചെടുത്ത ശേഷം നല്ലതു പോലെ കഴുകി തോർത്തിയെടുക്കാം. ശേഷം അഞ്ച് തുള്ളി വെളിച്ചെണ്ണ ഒഴിച്ച് കൈകൾ കൊണ്ട് നല്ലതു പോലെ തിരുമി, അവയുടെ ജ്യൂസെടുക്കാം.

ചെമ്പരത്തി ജ്യൂസിലേക്ക് നാരങ്ങാനീര് ചേർത്ത് ഇളക്കി, ചെറിയ പാത്രങ്ങളിൽ ഒഴിച്ച് തണുക്കാൻ വയ്ക്കാം. സാധാരണ ലിപ് ബാം ഉപയോഗിക്കുന്നപോലെ ഇടയ്ക്കിടെ ഇത് ചുണ്ടുകളിൽ പുരട്ടാവുന്നതാണ്. ഫ്രിഡ്ജിൽ സൂക്ഷിച്ചാൽ ഏകദേശം രണ്ടാഴ്ച വരെ ഉപയോഗിക്കാം. ആദ്യത്തെ ഉപയോഗത്തിൽ തന്നെ ചുണ്ടിന് ഒരു ഇളം ചുവപ്പ് നിറം ലഭിക്കും.