മുഖത്ത് കൊഴുപ്പ് നീക്കാൻ ഫേഷ്യൽ വ്യായാമങ്ങൾ ചെയ്യുന്നതിന് മുൻപ് ഇക്കാര്യങ്ങൾ അറിഞ്ഞിരിക്കണം

മുഖത്ത് കൊഴുപ്പ് ഒഴിവാക്കാൻ മിക്കയാളുകളും ചെയ്യുന്ന ഒന്നാണ് ഫേഷ്യൽ വ്യായാമങ്ങൾ. എന്നാൽ അതിന് മുൻപ് മുഖത്തെ കൊഴുപ്പിനെ കുറിച്ച് അറിഞ്ഞിരിക്കേണ്ട ചില കാര്യങ്ങളുണ്ട്.

സ്പോട്ട് റിഡക്ഷൻ അതായത്, ഒരു പ്രത്യേക ഭാഗത്ത് കൊഴുപ്പ് മാത്രം നീക്കം ചെയ്യുക എന്ന രീതിയിലല്ല നമ്മുടെ ശരീരം പ്രവര്‍ത്തിക്കുന്നത്. ശരീരത്തിലെ മൊത്തത്തിലുള്ള കൊഴുപ്പ് കുറയ്ക്കുന്നതിനൊപ്പം മുഖത്തെ കൊഴുപ്പും കുറയുകയാണ് ചെയ്യുന്നത്. അതുകൊണ്ട് തന്നെ മുഖത്തെ മാത്രം കൊഴുപ്പ് നീക്കാൻ ഫേഷ്യൽ വ്യായാമം ചെയ്തിട്ടു കാര്യമില്ല. ക്ഷമയും ശരിയായ സമീപനവും ഉണ്ടെങ്കിൽ, മുഖത്തിന്റെ ആകൃതിയിൽ ശ്രദ്ധേയമായ മാറ്റങ്ങൾ കൊണ്ടുവരാന്‍ സാധിക്കുമെന്ന് പോഷകാഹാര വിദഗ്ധയായ ഉദിത അഗര്‍വാള്‍ പറയുന്നു.

ശരീരത്തിലെ കൊഴുപ്പ് കുറയ്ക്കാം

ഭക്ഷണത്തില്‍ നിന്ന് കലോറി കുറയ്ക്കുക എന്നതാണ് ശരീരത്തിലെ കൊഴുപ്പ് കുറയ്ക്കാനുള്ള പ്രധാന മാര്‍ഗം. കലോറി കുറഞ്ഞ പോഷകസമൃദ്ധമായ ഭക്ഷണങ്ങള്‍ക്കൊപ്പം നടത്തം, യോഗ, അല്ലെങ്കിൽ വീട്ടിലെ വ്യായാമങ്ങൾ എന്നിങ്ങനെയുള്ള ഏതെങ്കിലും തരത്തിലുള്ള ശാരീരിക ചലനങ്ങളും ഉൾപ്പെടുത്തുന്നത് ക്രമേണ ശരീരത്തിലെ കൊഴുപ്പ് നീക്കാന്‍ സഹായിക്കും.

വൃത്തിയുള്ളതും പോഷകസമൃദ്ധവുമായ ഭക്ഷണം

• സംസ്കരിച്ചതും ഉപ്പിട്ടതും പഞ്ചസാര അടങ്ങിയതുമായ ഭക്ഷണങ്ങൾ കുറയ്ക്കുന്നതിലൂടെ വയറു വീർക്കുന്നത് കുറയ്ക്കാനും ശരീരത്തില്‍ ജലാംശം നിലനിര്‍ത്താനും സഹായിക്കും.

• പ്രോട്ടീൻ അടങ്ങിയ ഭക്ഷണങ്ങൾ സംതൃപ്തി വർധിപ്പിക്കുന്നതിനും കൊഴുപ്പ് കുറയ്ക്കുന്നതിനും സഹായിക്കുന്നു.

• പരിപ്പ്, വിത്തുകൾ തുടങ്ങിയ ഭക്ഷണങ്ങളില്‍ അടങ്ങിയ ആരോഗ്യകരമായ കൊഴുപ്പുകൾ ഉപാപചയ പ്രവർത്തനത്തെ സഹായിക്കുന്നു.

• പഴങ്ങൾ, പച്ചക്കറികൾ, നാരുകൾ എന്നിവ ദഹനത്തെയും പൂർണതയെയും പ്രോത്സാഹിപ്പിക്കുന്നു.

• വിഷവസ്തുക്കളെ പുറന്തള്ളാനും സന്തുലിതാവസ്ഥ നിലനിർത്താനും മതിയായ അളവില്‍ വെള്ളം കുടിക്കുക.

മുഖത്തെ വീക്കം നിയന്ത്രിക്കുന്നതില്‍ ശരിയായ ജലാംശം നിര്‍ണായക പങ്ക് വഹിക്കുന്നു. ഓരോരുത്തരുടെയും പ്രായം, ആരോഗ്യം എന്നിവയുടെ അടിസ്ഥാനത്തില്‍ ശരീരത്തിന് ആവശ്യമായ വെള്ളത്തിന്‍റെ അളവില്‍ വ്യത്യാസപ്പെട്ടിരിക്കുന്നു. ഇത് മൊത്തത്തിലുള്ള ഉപാപചയ പ്രവർത്തനത്തെ പിന്തുണയ്ക്കുന്നു.

ഉറക്കവും സമ്മര്‍ദവും

ഉയർന്ന സമ്മർദ നില ശരീരത്തിലെ കോർട്ടിസോളിനെ ഉയർത്തുന്നു. ഇത് കൊഴുപ്പ് സംഭരണത്തെയും വയറു വീർക്കുന്നതിനെയും പ്രോത്സാഹിപ്പിക്കുന്നു. ഏഴ് മുതൽ ഒമ്പത് മണിക്കൂർ ഉറങ്ങാന്‍ ശ്രമിക്കുക. മതിയായ വിശ്രമം ശരീരത്തിന് ഹോർമോണുകളെ കാര്യക്ഷമമായി നിയന്ത്രിക്കാൻ സഹായിക്കുന്നു. ഇത് മുഖത്തെ വീക്കത്തിനും ശരീരഭാരം വർധിപ്പിക്കുന്നതിനുമുള്ള സാധ്യത കുറയ്ക്കുന്നു.

ഫേഷ്യല്‍ വ്യായാമങ്ങൾ

ഫേഷ്യല്‍ വ്യായാമങ്ങള്‍ നേരിട്ട് കൊഴുപ്പ് കത്തിക്കുന്നില്ലെങ്കിലും, അവ മുഖ പേശികളെ ടോൺ ചെയ്യാനും ഉറപ്പിക്കാനും സഹായിക്കും. കവിളുകൾ വശങ്ങളിൽ നിന്ന് വശങ്ങളിലേക്ക് വായു വലിക്കുക, പല്ലുകൾ കടിച്ചുകൊണ്ട് പുഞ്ചിരിക്കുക, അല്ലെങ്കിൽ "ഫിഷ് ഫെയ്സ്" പൊസിഷൻ പിടിക്കുക തുടങ്ങിയ ലളിതമായ പ്രവർത്തനങ്ങൾ കാലക്രമേണ മുഖത്തിന്റെ ഘടനയും രൂപവും സൂക്ഷ്മമായി മെച്ചപ്പെടുത്തും.

മദ്യവും പഞ്ചസാരയും

മദ്യവും പഞ്ചസാര അടങ്ങിയ പാനീയങ്ങളും വയറു വീർക്കുന്നതിനും അധിക കലോറി ഉപഭോഗത്തിനും കാരണമാകുന്നു. ഇവ രണ്ടും ഒഴിവാക്കുന്നത് മുഖത്ത് വീക്കം ഉണ്ടാകുന്നതും കൊഴുപ്പ് അടിഞ്ഞു കൂടുന്നതും കുറയ്ക്കുന്നു.