ഫുഡ് ക്രേവിങ്സ് തോന്നുമ്പോൾ ഉടൻ ജങ്ക് ഫുഡ്; പൊണ്ണത്തടിക്കൊപ്പം ഉത്കണ്ഠയും ഏറും

ഫുഡ് ക്രേവിങ്സ് ഉണ്ടാകുമ്പോൾ നേരെ ജങ്ക് ഫുഡ് തിരഞ്ഞെടുക്കുന്നവർക്ക് ശരീരഭാരം മാത്രമല്ല, ഉത്കണ്ഠയും ഏറും. കൊഴുപ്പ് ഉയർന്ന അളവിൽ അടങ്ങിയ ഭക്ഷണം കഴിക്കുന്നത് നമ്മുടെ ​ഗട്ട് മൈക്രോബയോമിൽ മാറ്റങ്ങൾ വരുത്താനും അനാരോ​ഗ്യകരമായ ബാക്ടീരിയകളെ വാഗസ് നാഡിയിലൂടെ തലച്ചോറിലേക്ക് കയറ്റിവിടുകയും ചെയ്യുന്നുവെന്ന് പഠനങ്ങൾ ചൂണ്ടിക്കാണിക്കുന്നു.

സെറോടാണിൻ പൊതുവെ 'ഫീൽ-​ഗുഡ്' ഹോർമോൺ ആയാണ് കരുതുന്നത്. എന്നാൽ ഈ ഹോർമോൺ സജീവമാകുന്നതോടെ തലച്ചോറിലെ ചില നാഡീകോശങ്ങൾ ഉത്കണ്ഠ പോലുള്ള പ്രതികരണങ്ങൾ ഉണ്ടാക്കുമെന്ന് ​അമേരിക്കയിലെ കൊളറാഡോ സര്‍വകലാശാല സമീപകാലത്ത് നടത്തിയൊരു പഠനത്തിൽ ചൂണ്ടിക്കാണിക്കുന്നു.

എലികളിൽ നടത്തിയ പരീക്ഷണത്തിൽ സെറോടോണിൻ ഉൽപാദനവുമായി ബന്ധപ്പെട്ട ട്രിപ്റ്റോഫാൻ ഹൈഡ്രോക്സൈലേസ് ഉൾപ്പെടെ മൂന്ന് ജീനുകൾ സജീവമാകുന്നതായും കണ്ടെത്തി. ഇതിൽ ട്രിപ്റ്റോഫാൻ ഹൈഡ്രോക്സൈലേസ് അഥവ ടിപിഎച്ച് 2 മനുഷ്യരിലെ മാനസിക വൈകല്യങ്ങളുമായും ആത്മഹത്യയുമായി ബന്ധപ്പെട്ടതാണ്.

പ്രധാനമായും പൂരിത കൊഴുപ്പുകൾ അടങ്ങിയ അൾട്രാ-ഹൈ ഫാറ്റ് ഡയറ്റ് പിന്തുടരുന്നത് യുവാക്കളിൽ ഹ്രസ്വകാലത്തേക്ക് ഉത്കണ്ഠ വർധിപ്പിക്കുകയും ഭാവിയിൽ തലച്ചോറിനെ കുഴപ്പലാക്കുകയും ചെയ്യുമെന്നും ​ഗവേഷകർ വിശദീകരിച്ചു. പഴങ്ങളിലും പച്ചക്കറിയിലും അടങ്ങിയ ആരോ​ഗ്യകരമായ കൊഴുപ്പ് സംസ്കരിച്ച ഭക്ഷണങ്ങളിൽ അടങ്ങിയ ആനാരോ​ഗ്യകരമായ കൊഴുപ്പുകൾ കാരണമുണ്ടാകുന്ന ആരോ​ഗ്യപ്രശ്നങ്ങൾ ചെറുക്കാൻ സഹായിക്കുമെന്നും ​ഗവേഷകർ കൂട്ടിച്ചേർത്തു.