ഫോണിലെ ഫോട്ടോ ഗ്യാലറി തിങ്ങിനിറഞ്ഞാലും ഒരു ചിത്രം പോലും ഡിലീറ്റ് ആക്കില്ല. സ്‌റ്റോജേറ്റ് ഫുള്‍ ആയാലും കംപ്യൂട്ടറില്‍ നിന്ന് ഫയലുകള്‍ നീക്കം ചെയ്യാന്‍ പ്രയാസം. ഓര്‍മ്മകളുടെ ഭാരം അങ്ങനെ കൂട്ടിക്കൂടി വെയ്ക്കുന്ന ശീലം നിങ്ങള്‍ക്കുണ്ടോ? എങ്കില്‍ നിങ്ങള്‍ ഒരു ഡിജിറ്റല്‍ ഹോഡര്‍ (Digital hoarder) ആണ്.
ഡിജിറ്റല്‍ ഹോഡര്‍
ഒരു പത്രകടലാസോ, മാസികയോ ചിത്രങ്ങളോ കളയാതെ മുറിയില്‍ അടുക്കിയും അലസമായും സൂക്ഷിച്ചിരുന്ന ചില പരുക്കന്‍ ബുദ്ധിജീവികളെ പണ്ട് കണ്ടിട്ടുണ്ട്. അത്തരക്കാരുടെ മുറിയുടെ മൂലയില്‍ സൂക്ഷിച്ചിരിക്കുന്ന ചവറ്റുകുട്ട പോലും തൊടിയിപ്പിക്കില്ല, കാരണം അതിലും ആവശ്യമുള്ള സാധനങ്ങളുണ്ടെന്ന് പറഞ്ഞു വിരട്ടാറുണ്ട്. ഇതിന്റെ ഒരു ഡിജിറ്റല്‍ വേര്‍ഷന്‍ ആണ് ഡിജിറ്റല്‍ ഹോഡിങ്. വീട്ടിലെ മുറിക്ക് പകരം ഫോണ്‍ അല്ലെങ്കില്‍ മറ്റ് ഡിജിറ്റല്‍ ഉപകരണമായെന്ന് മാത്രം. ഇത്തരക്കാരെ പുറമെ ആര്‍ക്കും പെട്ടെന്ന് തിരിച്ചറിയണമെന്നില്ല.
മെയില്‍ ബോക്സില്‍ വര്‍ഷങ്ങള്‍ക്ക് മുന്‍പ് വന്ന ഒരു മെയില്‍ ആണെങ്കിലും അത് ഡിലീറ്റ് ആക്കാതെ സൂക്ഷിക്കും. രസകരമെന്ന തോന്നുന്ന ചിലത് സ്ക്രീന്‍ഷോട്ട് ചെയ്തുവെക്കും അതും കാലങ്ങളോളും ഗ്യാലറിയില്‍ ഉണ്ടാകും. ഒരേപോലെ ഒരു നൂറു സെല്‍ഫി ഉണ്ടെങ്കിലും ഒരെണ്ണം പോലും കളയില്ല. അതില്‍ വ്യത്യാസങ്ങളുണ്ടെന്ന് വാദിക്കും. 'എന്നെങ്കിലും ഇത് ആവശ്യമായി വന്നേക്കാം' എന്ന വിശ്വാസമാണ് ആളുകള്‍ ഡിജിറ്റല്‍ ഹോഡിങ് ചെയ്യുന്നതിന് പിന്നിലെ സിംപിള്‍ സൈക്കോളജി എന്നാണ് വിദഗ്ധര്‍ പറയുന്നത്.
ഡീലിറ്റ് ആക്കാനുള്ള മടിക്ക് പിന്നില്‍
ഓര്‍മകള്‍ നഷ്ടമാകുമെന്ന ഭയം- ഡിജിറ്റല്‍ നൊസ്റ്റാള്‍ജിയയുടെ കാലത്താണ് നമ്മള്‍ ജീവിക്കുന്നത്. ഒരു പഴയ ടെക്സ്റ്റ് അല്ലെങ്കില്‍ മീം ഇല്ലാതാക്കുന്നത് ഭൂതകാലത്തിന്റെ ഒരു ഭാഗം മായ്ക്കുന്നതു പോലെയാണ്.
സ്റ്റോറേജ് സ്പെയ്സ്- പരിധിയില്ലാതെ സ്റ്റോറേജ് സ്പെയ്സ് ലഭിക്കുന്നതിനാല്‍ അടിയന്തരമായി ഇതൊന്നും വൃത്തിയാക്കേണ്ട എന്ന ചിന്ത. കൂടാതെ ഫോണില്‍ സ്റ്റോറേജ് കുറഞ്ഞാലും പുറമെ ബാധിക്കില്ല.
ഉത്കണ്ഠ- പിന്നീട് ഉപയോഗപ്രദമാകും എന്ന ചിന്തയില്‍ പഴയ മെയിലുകള്‍, മീറ്റിങ് കുറിപ്പുകൾ, ഡ്രാഫ്റ്റുകൾ എന്നിവ സൂക്ഷിക്കും.
ഡിജിറ്റല്‍ ക്ലസ്റ്റര്‍
ഡിജിറ്റല്‍ ഹോഡിങ് ഒരു ശല്യം മാത്രമല്ല വലിയ പ്രത്യാഘാതങ്ങളും ഉണ്ടാക്കാം. അമിതമായ ഡാറ്റ സംഭരണം വിവരങ്ങള്‍ കേന്ദ്രീകരിക്കാനും പ്രോസസ് ചെയ്യാനും ബുദ്ധിമുട്ടാക്കുമെന്നും ചില പഠനങ്ങള്‍ പറയുന്നു. കൂടാതെ ക്രമരഹിതമായ ഫയലുകള്‍ ഉപകരണങ്ങളുടെ പ്രവര്‍ത്തനം മന്ദഗതിയിലാക്കും. സെന്‍സിറ്റീവ് ഡാറ്റ അനിശ്ചിത കാലം സൂക്ഷിക്കുന്നത് സുരക്ഷാ അപകടങ്ങള്‍ വരെ ഉണ്ടാക്കാം.
ഡിജിറ്റല്‍ ജീവിതം ഈസിയാക്കാം
ആഴ്ചതോറും അനാവശ്യ ഫോട്ടോകളും ഫയലുകളും ഇല്ലാതാക്കുന്നത് ശീലമാക്കുക.
മെയിൽ വാർത്താക്കുറിപ്പുകൾ വായ്ച്ച ശേഷം നീക്കം ചെയ്യുക. പ്രധാനപ്പെട്ട സന്ദേശങ്ങൾ ഫോൾഡറുകളായി തരംതിരിക്കുക.
ഫയലുകള്‍ സുരക്ഷിതമായ ഒരിടത്തേക്ക് മാറ്റുകള്‍
ഒരു വര്‍ഷത്തിലേറെയായി നോക്കാത്ത ചിത്രങ്ങളോ വിഡിയോയോ ഡിലീറ്റ് ചെയ്യുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
