'റെഡി ടു കുക്ക്' സമയം ലാഭിക്കാൻ നല്ലതാണ്, പക്ഷെ ഇഞ്ചി-വെളുത്തുള്ളി പേസ്റ്റ് സൂക്ഷിക്കണം

തിരക്കുപിടിച്ച ജീവിതത്തിൽ പാചകം എളുപ്പമാക്കാൻ ഇപ്പോഴത്തെ റെഡി ടു കുക്ക് സൗകര്യം വളരെ സഹായകരമാണ്. അരച്ച് പാക്കറ്റിൽ കിട്ടുന്ന ഇഡലി-ദോശ മാവ്, ഹാഫ് കുക്ക്ഡ് ചപ്പാത്തി, ഇഞ്ചി-വെളുത്തുള്ളി പേസ്റ്റ്, ഫ്രോസൺ പരോട്ട, റെഡി മസാല മിക്സുകൾ എന്നിവ ഇതിന് ഉദ്ദാഹ​രണങ്ങളാണ്. ഇവയൊക്കെ നമ്മു‌ടെ സമയം ലാഭിക്കാനും പാചകം എളുപ്പത്തിലാക്കാനും സഹായിക്കും. എന്നാൽ ശരിയായ രീതിയിൽ ഉപയോഗിച്ചില്ലെങ്കിൽ പണി കിട്ടാനും സാധ്യതയുണ്ട്.

ഇഞ്ചി-വെളുത്തുള്ളി പേസ്റ്റ്

മുൻപ് കറികൾക്ക് അരച്ചും അരിഞ്ഞും ചേർത്തിരുന്ന ഇഞ്ചിയും വെളുത്തുള്ളിയും പേസ്റ്റ് രൂപത്തിൽ ഇന്ന് വിപണിയിൽ സുലഭമാണ്. ഇഞ്ചിയും വെളുത്തുള്ളിയും തെലികളഞ്ഞ് അരിഞ്ഞ് സമയം കളയാതിരിക്കാൻ ഇതൊരു മികച്ച മാർ​ഗമാണെങ്കിലും ആരോ​ഗ്യത്തിന് അത്ര സുരക്ഷിതമല്ലെന്ന് വിദ​ഗ്ധർ മുന്നറിയിപ്പ് നൽകുന്നു.

ഇത് പ്രിസർവേറ്റീവുകളും, അസിറ്റീവുകളും മറ്റ് രാസവസ്തുക്കളും ചേർത്താണ് പ്രീസർവേവ് ചെയ്തിരിക്കുന്നത്. കൂടാതെ ജിഞ്ചർ ഗാർളിക് പേസ്റ്റിൽ സിട്രിക് ആസിഡും, സാന്തം ഗമ്മും സിന്തറ്റിക് ഫുഡ് കളറുകളുമാണ് ചേർക്കുക. മിതമായ അളവ് പ്രശ്നമല്ലെങ്കിൽ ദീർഘകാല ഉപയോ​ഗം ആരോ​ഗ്യപ്രശ്നങ്ങൾ ഉണ്ടാക്കാം. പ്രത്യേകിച്ച്, സെൻസിറ്റീവായ വയറും കുടലുമൊക്കെയുള്ളവർക്ക്. അതുകൊണ്ടു തന്നെ പരമാവധി പാക്ക്ഡ് പേസ്റ്റുകൾ ഒഴിവാക്കുക. കഴിയുന്നതും വീട്ടിൽ തന്നെ തയ്യാറാക്കാൻ ശ്രമിക്കുക.

ഹാഫ്-കുക്ക് ചപ്പാത്തി

പല റെഡി-ടു-കുക്ക് ഭക്ഷണങ്ങളിലും രുചി വർധിപ്പിക്കാനും ഷെൽഫ് ലൈഫ് കൂട്ടാനും കൂടുതൽ ഉപ്പ് ചേർക്കാറുണ്ട്. ഇത് ഉയർന്ന രക്തസമ്മർദ്ദം, ഹൃദ്രോഗ സാധ്യത, ശരീരത്തിൽ വെള്ളം കെട്ടിനിൽക്കൽ, വൃക്കകളുടെ പ്രവർത്തനം തകരാറിലാകുക എന്നിവയ്ക്ക് സാധ്യതയുണ്ട്.

ഫ്രോസൺ പറോട്ട, ഹാഫ്-കുക്ക് ചപ്പാത്തി, റെഡി സ്നാക്കുകൾ എന്നിവയിൽ പലപ്പോഴും അധിക എണ്ണയും ട്രാൻസ് ഫാറ്റും ഉണ്ടാകാം. ഇത് കൊളസ്ട്രോൾ, അമിതവണ്ണം, ഹൃദ്രോഗ സാധ്യത വർധിക്കുക, ഫാറ്റി ലിവർ പ്രശ്നങ്ങൾ എന്നിവ ഉണ്ടാക്കാം.

ദോശമാവ്, ഇഞ്ചി-വെളുത്തുള്ളി പേസ്റ്റ് പോലുള്ളവ ശരിയായ താപനിലയിൽ സൂക്ഷിക്കാത്ത പക്ഷം ബാക്ടീരിയ വേഗത്തിൽ വളരാം. ഇത് ഭക്ഷ്യവിഷബാധയ്ക്ക് വരെ കാരണമാകാം.

ശ്രദ്ധിക്കേണ്ട കാര്യങ്ങൾ:

• പാക്കറ്റ് തുറന്ന ശേഷം മണിക്കൂറുകളോളം പുറത്തുവയ്ക്കരുത്.

• ഫ്രിഡ്ജിൽ സൂക്ഷിക്കണം.

• ദുർഗന്ധമോ നിറമാറ്റമോ വന്നാൽ ഉപയോഗിക്കരുത്.

• കാലാവധി കഴിഞ്ഞവ ഒഴിവാക്കുക

• പൂർണ്ണമായി വേവിച്ച ശേഷമേ കഴിക്കാവൂ

• വീണ്ടും വീണ്ടും ചൂടാക്കരുത്

റെഡി ടു കുക്ക് തിരഞ്ഞെടുക്കുന്നത് സമയം ലാഭിക്കാൻ സഹായിക്കുമെങ്കിലും അവ അമിതമായി ഉപയോഗിക്കാതെ ശ്രദ്ധിക്കുക. ഗുണനിലവാരമുള്ളത് ഉപയോഗിക്കുന്നതും ആരോഗ്യ സങ്കീർണതകൾ കുറയ്ക്കാൻ സഹായിക്കും.