എപ്പോൾ കുളിക്കുന്നതാണ് നല്ലത്, രാവിലെയോ രാത്രിയോ?

ചൂടുകൂടിയതോടെ ദിവസത്തിൽ രണ്ട് നേരം കുളിച്ചാലും തികയില്ലെന്ന മട്ടാണ്. ശരീരം വ‍ൃത്തിയാക്കുക മാത്രമല്ലല്ലോ, ശാരീരികമായും മാനസികമായും ഫ്രഷ് ആയിയിരിക്കാനും കുളിക്കുന്നത് നല്ലതാണ്. പകലു കുളിക്കുന്നവരും രാത്രി കുളിക്കുന്നവരുമുണ്ട്. രാവിലെയുള്ള കുളിക്കും വൈകുന്നേരമുള്ള കുളിക്കും ശാസ്ത്രീയമായി വ്യത്യാസങ്ങളുണ്ടെന്നാണ് വിദ​ഗ്ധ‍രുടെ അഭിപ്രായം.

ഏഷ്യൻ രാജ്യങ്ങളിൽ പൊതുവെ രാത്രിയിലാണ് കുളിക്കാൻ തിരഞ്ഞെടുക്കുന്നത്. രാത്രിയിലത്തെ കുളി ശരീരത്തെ ക്ലെൻസ് ചെയ്യുകയും പകലത്തെ അഴുക്കുകളും വിഷാംശങ്ങളുമെല്ലാം അകറ്റുകയും ശരീരത്തിന് വിശ്രമം നൽകുകയും മികച്ച ഉറക്കം ലഭിക്കാൻ സഹായിക്കുകയും ചെയ്യുമെന്ന് പറയുന്നത്.

എന്നാൽ പാശ്ചാത്യ രാജ്യങ്ങളിൽ കൂടുതൽ ആളുകളും രാവിലെയാണ് കുളിക്കാറ്. രാവിലെയുള്ള കുളി ഉന്മേഷവും ഊർജവും നൽകുകയും ദൈനംദിന പ്രവൃത്തികൾ കൃത്യതയോടെ ചെയ്യാൻ സഹായിക്കുകയും ചെയ്യുന്നു. ജീവിതശൈലി, കാലാവസ്ഥ, വ്യക്തിപരമായ മുൻ​ഗണനകൾ എന്നിവയനുസരിച്ച് ഓരോരുത്തർക്കും കുളിക്കാൻ ശരിയായ സമയം തിരഞ്ഞെടുക്കാവുന്നതാണ്.

രാത്രി കുളിക്കുന്നതു കൊണ്ടുള്ള ഗുണങ്ങൾ

• ചൂടു വെള്ളം പേശികളെ റിലാക്സ് ചെയ്യാൻ സഹായിക്കുന്നു.

• മനസ്സും ശരീരവും റിലാക്സ് ആകാൻ സഹായിക്കുന്നു. മെച്ചപ്പെട്ട ഉറക്കം ലഭിക്കും.

• പകൽ സമയത്തുള്ള വിയർപ്പ്, അഴുക്ക്, അന്തരീക്ഷത്തിലെ മലിനവസ്തുക്കൾ ഇവയെല്ലാം രാത്രി കുളിക്കുന്നതിലൂടെ അകറ്റുന്നു.

• ചർമത്തിന്റെ ആരോഗ്യം നിലനിർത്തുന്നു.

• ചൂടുള്ളതും ഈർപ്പമുള്ളതുമായ കാലാവസ്ഥകളിൽ രാത്രിയിലെ കുളി ഏറ്റവും ഗുണകരമാണ്.

രാവിലെ കുളിച്ചാലുള്ള ഗുണങ്ങൾ

• ദിവസം തുടങ്ങുമ്പോൾ കുളിക്കുന്നത് ശരീരത്തിന് ഉന്മേഷവും ഊർജ്ജവും കിട്ടാൻ സഹായിക്കുന്നു.

• ഉറക്കം തൂങ്ങുന്നത് ഒഴിവാക്കി ഫ്രഷ് ആയിരിക്കാൻ സഹായിക്കും.

• മാനസികാവസ്ഥ മെച്ചപ്പെടുത്താനും രാവിലെയുള്ള കുളി സഹായിക്കും.