ചെറുപ്പത്തില് ഏറ് പന്ത് കളിച്ചത് മറന്നോ? തൊങ്കി പിടിത്തം, ഓടി തൊട്ട് കളി, കൊത്തംകല്ല് കളി എന്നുവേണ്ട കുട്ടിക്കാലത്തെക്കുറിച്ച് ഓര്ക്കുമ്പോള് നിറമുള്ള ഒരുപാട് കാര്യങ്ങളാണ് പലര്ക്കും പറയാനുള്ളത്. മറ്റൊന്നിനെക്കുറിച്ചും ആകുലപ്പെടാതെ ജീവിതത്തിലെ ഓരോ നിമിഷവും ആസ്വദിച്ചിരുന്ന ആ കാലഘട്ടം തിരിച്ചുകിട്ടിയിരുന്നെങ്കില് എന്ന് ആഗ്രഹിക്കാത്തവര് കുറവായിരിക്കും. പക്ഷെ, വലുതാകുന്തോറും ഇത്തരം ത്രില്ലെല്ലാം പതിയെ നഷ്ടപ്പെട്ടുതുടങ്ങും. പിന്നെ ഒന്നിനോടും താത്പര്യമില്ലാതാകും, സമയം കുറയും. അങ്ങനെ ആ നിഷ്കളങ്ക ബാല്യത്തോട് വിട പറയും.
ചെറുപ്പക്കാരുടേത് അല്ലെങ്കില് കുട്ടികളുടേത് എന്ന് വിശേഷിപ്പിക്കുന്ന പ്രവര്ത്തികളില് ഏര്പ്പെട്ട് സ്വന്തം ബാല്യം തന്നെ വീണ്ടെടുക്കുകയാണ് വലിയൊരു വിഭാഗം ആളുകൾ. മില്ലെനിയല്സിനിടയില് കാണുന്ന ഈ ട്രെന്ഡിനെയാണ് 'കിഡള്ട്ടിങ്' എന്ന് വിശേഷിപ്പിക്കുന്നത്. 'കിഡ്' (കുട്ടി), 'അഡള്ട്ടിങ്' (പ്രായപൂര്ത്തിയായ ആള്) എന്നീ രണ്ട് വാക്കുകള് ചേര്ത്താണ് 'കിഡള്ട്ടിങ്' എന്ന പദം ഉണ്ടായത്. ഉത്തരവാദിത്തങ്ങള്ക്കിടയിലും മുതിര്ന്നവര് യുവത്വത്തിന്റെ ഉന്മേഷം പുനരുജ്ജീവിപ്പിക്കുന്നതാണ് ഇത്.
കോവിഡ് മഹാമാരിയുടെ തുടക്കത്തിലാണ് ഈ ട്രെന്ഡ് തുടങ്ങിയത്. പല മുതിര്ന്ന ആളുകളും സ്വന്തം ആവശ്യത്തിനായി ടോയ്സടക്കം വാങ്ങി. മുതിര്ന്നവര്ക്കായുള്ള ഹാപ്പി മീല്സ് അവതരിപ്പിച്ച് മക്ഡൊണാള്ഡ്സ് പോലുള്ള ബ്രാന്ഡുകള് പോലും ഈ ട്രെന്ഡിനൊപ്പം ചേര്ന്നു. കേള്ക്കുമ്പോള് നിസ്സാരമെന്ന് തോന്നുമെങ്കിലും കിഡള്ട്ടിങ് ചിരിച്ചുതള്ളേണ്ട ഒന്നല്ല. ഈ മാറ്റം പലര്ക്കും വലിയ ആശ്വാസമായിട്ടുണ്ട്.
കുട്ടിക്കാലത്തെ സന്തോഷം, കൗതുകം, കളികള് എല്ലാം തിരിച്ചുപിടിക്കുകയാണ് പലരും. ഇഷ്ടമുള്ള വിനോദങ്ങളില് ഏര്പ്പെടുന്നത് മുതല് മറ്റൊന്നും ചിന്തിക്കാതെ സന്തോഷിക്കാന് കഴിയുന്നതുവരെ ഈ ട്രെന്ഡിന്റെ ഭാഗമായുള്ള നേട്ടമാണ്. മാനസികാരോഗ്യത്തില് പോസിറ്റീവായ മാറ്റം ഇതുവഴി ലഭിക്കുമെന്നാണ് വിദഗ്ധര് പറയുന്നത്. സമ്മര്ദ്ദം കുറയ്ക്കാനും മാനസികാവസ്ഥ മെച്ചപ്പെടുത്താനും ഈ സന്തോഷനിമിഷങ്ങള്ക്ക് കഴിയും. ക്രിയാത്മകമായി ചിന്തിക്കാനുള്ള കഴിവിനെ ഉണര്ത്താനും ഈ തിരിച്ചുപോക്ക് ഗുണകരമാകും. ഒരു കാര്യത്തില് ശ്രദ്ധകേന്ദ്രീകരിക്കാനും അതില് പൂര്ണ്ണമായു മുഴുകാനുള്ള കഴിവ് ആര്ജ്ജിച്ചെടുക്കാന് ഇത് സഹായിക്കും. ഓരേ താത്പര്യങ്ങളുള്ള ആളുകളുമായി ബന്ധം സ്ഥാപിക്കാനും ജീവിതത്തില് ജോലിയും ഇഷ്ടങ്ങളും തമ്മില് ഒരു ബാലന്സ് കണ്ടെത്താനും കഴിയും.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
