അബുദാബി: ക്രിക്കറ്റിൽ പുതിയ ചരിത്രം രചിച്ച് മുൻ ഇംഗ്ലണ്ട് വിക്കറ്റ് കീപ്പർ ബാറ്റർ സാറ ടെയ്ലർ. പുരുഷ ഫ്രാഞ്ചൈസി ക്രിക്കറ്റ് ടീമിനെ പരിശീലിപ്പിക്കുന്ന ആദ്യ വനിതയെന്ന നേട്ടമാണ് സാറ സ്വന്തമാക്കിയത്. നവംബർ 19ന് ആരംഭിക്കുന്ന അബുദാബി ടി10 ലീഗിൽ ടീം അബുദാബിയുടെ സഹ പരിശീലകയായി നിയമിയ്ക്കപ്പെട്ടതോടെയാണ് സാറയ്ക്ക് ഈ നേട്ടം സ്വന്തമായത്.
നേരത്തെ കൗണ്ടി ക്ലബ് സസെക്‌സിൽ വനിതാ സ്‌പെഷ്യലൈസ്ഡ് കോച്ചായിരുന്നു സാറ. എക്കാലത്തെയും മികച്ച വിക്കറ്റ് കീപ്പർമാരിൽ ഒരാളായാണ് താരം അറിയപ്പെടുന്നത്. ടി10 ലീഗിലെ തന്റെ പങ്കാളിത്തം ലോകമെമ്പാടുമുള്ള വനിതകൾക്ക് പ്രചോദനമാകുമെന്ന് കരുതുന്നതായി സാറ പ്രതികരിച്ചു.
ക്രിസ് ഗെയ്ൽ അടക്കമുള്ളവരാണ് ടീം അബുദാബിയ്ക്കായി കളിക്കാനിറങ്ങുന്നത്. 32-കാരിയായ സാറ 2006-ലാണ് ഇംഗ്ലണ്ടിനായി അരങ്ങേറ്റം കുറിച്ചത്. 10 ടെസ്റ്റുകളും 126 ഏകദിനങ്ങളും 90 ടി20 മത്സരങ്ങളും ടീമിനായി കളിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
