ന്യൂഡല്‍ഹി: ഇന്ത്യന്‍ മുന്‍ നായകന്‍ വിരാട് കോഹ്‌ലിക്ക് 10 ദിവസത്തെ ഇടവേള അനുവദിച്ച് ബിസിസിഐ. ഇതോടെ വെസ്റ്റ് ഇന്‍ഡീസിന് എതിരായ മൂന്നാം ട്വന്റി20യും ശ്രീലങ്കയ്‌ക്കെതിരായ ട്വന്റി20 പരമ്പരയും കോഹ്‌ലി കളിക്കില്ല. കോഹ്‌ലിക്ക് പുറമെ വിക്കറ്റ് കീപ്പര്‍ ബാറ്റ്‌സ്മാന്‍ ഋഷഭ് പന്തിനും 10 ദിവസത്തെ ഇടവേള നല്‍കിയിട്ടുണ്ട്.
കൊല്‍ക്കത്തയിലെ ടീമിന്റെ ബയോ ബബിളില്‍ നിന്നും പുറത്ത് കടന്ന കോഹ്‌ലിയും പന്തും ശനിയാഴ്ച രാവിലെ വീടുകളിലേക്ക് മടങ്ങി. ഈ വരുന്ന ഞായറാഴ്ചയാണ് വെസ്റ്റ് ഇന്‍ഡീസിന് എതിരായ പരമ്പരയിലെ അവസാന ട്വന്റി20. എന്നാല്‍ ആദ്യ രണ്ട് കളിയും ജയിച്ച് ഇന്ത്യ പരമ്പര സ്വന്തമാക്കി കഴിഞ്ഞു.
ഫെബ്രുവരി 24ന് ലഖ്‌നൗവില്‍ ആദ്യ ട്വന്റി20
മൂന്ന് ട്വന്റി20കളുടെ പരമ്പരയാണ് ഇന്ത്യ ശ്രീലങ്കയ്ക്ക് എതിരേയും കളിക്കുന്നത്. ഫെബ്രുവരി 24ന് ലഖ്‌നൗവില്‍ ആദ്യ ട്വന്റി20 ആരംഭിക്കും. 26നും 27നും ധരംശാലയിലാണ് രണ്ടാമത്തേയും മൂന്നാമത്തേയും ട്വന്റി20. ശ്രീലങ്കയ്‌ക്കെതിരായ പരമ്പരയ്ക്കുള്ള ഇന്ത്യന്‍ ടീമിനെ പ്രഖ്യാപിച്ചിട്ടില്ല.
ബയോ ബബിളില്‍ തുടരെ കഴിയേണ്ടി വരുന്ന എല്ലാ ഫോര്‍മാറ്റിലും കളിക്കുന്ന താരങ്ങളുടെ ജോലിഭാരവും മാനസിക സമ്മര്‍ദവും കുറയ്ക്കുന്നതിനായാണ് ഇടവേള നല്‍കാനുള്ള ബിസിസിഐ തീരുമാനം എന്ന് ബിസിസിഐ വൃത്തങ്ങള്‍ പറയുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
