കൊല്‍ക്കത്ത: നോണ്‍സ്‌ട്രൈക്കേഴ്‌സ് എന്‍ഡില്‍ നിന്ന രോഹിത്തിനെ റണ്‍ഔട്ട് ആക്കാന്‍ ശ്രമിച്ച പൊള്ളാര്‍ഡിന് രസകരമായ മറുപടി നല്‍കി വിരാട് കോഹ് ലി. ഇന്ത്യന്‍ ഇന്നിങ്‌സിന്റെ എട്ടാം ഓവറിലാണ് സംഭവം.
എട്ടാം ഓവറിലെ മൂന്നാമത്തെ ഡെലിവറിയില്‍ കോഹ് ലിയുടെ ഷോട്ട് രോഹിത്തിന്റെ ദേഹത്ത് തട്ടി ഡിഫ്‌ളക്റ്റഡായി. ഈ സമയം മിഡ് ഫീല്‍ഡില്‍ നിന്നിരുന്ന പൊള്ളാര്‍ഡ് രോഹിത്തിനെ റണ്‍ഔട്ട് ആക്കാനുള്ള സാധ്യത മുന്‍പില്‍ കണ്ടു. എന്നാല്‍ ക്രീസ് ലൈനിന് പുറത്തേക്ക് ഇറങ്ങാതിരുന്ന രോഹിത് അതിന് അവസരം നല്‍കിയില്ല.
ഈ സമയം പൊള്ളാര്‍ഡിനോട് കോഹ് ലി പറയുന്നതാണ് സ്റ്റംപ് മൈക്കില്‍ പതിഞ്ഞത്. അവനെ ആ വിധം റണ്‍ഔട്ട് ആക്കാനാവില്ല പോളി എന്നായിരുന്നു കോഹ് ലിയുടെ വാക്കുകള്‍. ഇത് കേട്ട് നോണ്‍സ്‌ട്രൈക്കേഴ്‌സ് എന്‍ഡില്‍ നിന്ന് രോഹിത്തും ചിരിച്ചു.
ഇഷാന്‍ കിഷന്‍ പുറത്തായതിന് ശേഷം ഒന്നിച്ച കോഹ് ലിയും രോഹിത്തും ചേര്‍ന്ന് 49 റണ്‍സ് ആണ് കണ്ടെത്തിയത്. ട്വന്റി20യില്‍ രോഹിത്-കോഹ് ലി കൂട്ടുകെട്ടില്‍ 1000 റണ്‍സ് എന്ന നേട്ടവും ഇരുവരുടേയും മുന്‍പില്‍ എത്തി. എന്നാല്‍ 9 റണ്‍സ് കൂടി വേണ്ടപ്പോള്‍ രോഹിത് പുറത്തായി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
