ന്യൂഡല്‍ഹി: ഈ വര്‍ഷം നടക്കുന്ന ഏകദിന ലോകകപ്പിനുള്ള ഇന്ത്യന്‍ ടീമിനെ പ്രഖ്യാപിച്ച് ബിസിസിഐ. മിതാലി രാജ് ആണ് ക്യാപ്റ്റന്‍. ഹര്‍മന്‍പ്രീത് കൗര്‍ വൈസ് ക്യാപ്റ്റന്‍.
ന്യൂസിലാന്‍ഡ് വേദിയാവുന്ന ലോകകപ്പിനായി 15 അംഗ സംഘത്തെയാണ് ഇന്ത്യ പ്രഖ്യാപിച്ചിരിക്കുന്നത്. മാര്‍ച്ച് നാല് മുതല്‍ ഏപ്രില്‍ മൂന്ന് വരെയാണ് ലോകകപ്പ്. ഫാസ്റ്റ് ബൗളര്‍ ശിഖാ പാണ്ഡേ, ബാറ്റര്‍ ജെമിമ റോഡ്രിഗസ് എന്നിവരാണ് ടീമില്‍ ഉള്‍പ്പെടാതിരുന്ന പ്രമുഖ താരങ്ങള്‍.
2021ല്‍ മോശം ഫോമില്‍ ജെമിമ റോഡ്രിഗസ്
ഫോമില്ലായ്മ ചൂണ്ടിയാണ് ജെമിമ, ശിഖാ പാണ്ഡേ എന്നിവരെ ഒഴിവാക്കിയത്. 2021ല്‍ ഇന്ത്യക്കായി കളിച്ച ഒരു മത്സരത്തില്‍ പോലും സ്‌കോര്‍ രണ്ടക്കം കടത്താന്‍ ജെമിമയ്ക്ക് കഴിഞ്ഞിരുന്നില്ല. ശിഖ പാണ്ഡേയ്ക്കും ടീമിനായി മികവ് പുറത്തെടുക്കാനായിരുന്നില്ല.
ഏകദിന ലോകകപ്പിന് മുന്‍പായി ന്യൂസിലാന്‍ഡില്‍ ഏകദിന പരമ്പരയും ഇന്ത്യന്‍ സംഘം കളിക്കും. അഞ്ച് ഏകദിനങ്ങളാണ് ഇന്ത്യ ന്യൂസിലാന്‍ഡില്‍ കളിക്കുക. ലോകകപ്പിനുള്ള 15 അംഗ സംഘം തന്നെയാണ് ന്യൂസിലാന്‍ഡിന് എതിരായ പരമ്പരയിലും കളിക്കുക.
ഏകദിന ലോകകപ്പിനുള്ള ഇന്ത്യന്‍ ടീം: മിതാലി രാജ്(ക്യാപ്റ്റന്‍), ഹര്‍മന്‍പ്രീത് കൗര്‍(വൈസ് ക്യാപ്റ്റന്‍), സ്മൃതി മന്ദാന, ഷഫലി വര്‍മ, യസ്തിക, ദീപ്തി, റിച്ച ഘോഷ്(വിക്കറ്റ് കീപ്പര്‍), സ്‌നേഹ് റാണ, ജുലന്‍, പൂജ, മേഘ്‌ന സിങ്, രേണുക സിങ് താക്കൂര്‍, താനിയ(വിക്കറ്റ് കീപ്പര്‍), രാജേശ്വരി, പൂനം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
