മെല്‍ബണ്‍: രാഹുല്‍ ദ്രാവിഡ് എന്ന പേര് കേള്‍ക്കുമ്പോള്‍ ക്രിക്കറ്റ് പ്രേമികളുടെ മനസിലേക്ക് ആദ്യം എത്തുന്ന കാര്യം എന്തായിരിക്കും. ശാന്തനായ ആവേശം അധികം പ്രകടിപ്പിക്കാത്ത താരം എന്നതായിരിക്കും ആദ്യം വരുന്ന ചിന്ത. കളിച്ചിരുന്ന കാലത്ത് മൈതാനത്തും പുറത്തും വൈകാരിക പ്രകടനങ്ങള്‍ക്ക് വലിയ സ്ഥാനം കല്‍പ്പിക്കാത്ത പ്രകൃതമായിരുന്നു ദ്രാവിഡിന്.
ഇന്ത്യയും പാകിസ്ഥാനും തമ്മിലുള്ള ടി20 ലോകകപ്പ് സൂപ്പര്‍ 12 പോരാട്ടം അതിന് മാറ്റം വരുത്തിയിരിക്കുകയാണ്. പരിശീലകനായ ദ്രാവിഡിന്റെ വിജയാഘോഷമാണ് ഇപ്പോള്‍ വൈറലായി മാറിയിരിക്കുന്നത്. അദ്ദേഹത്തിന്റെ ആവേശവും ആഘോഷവും കണ്ടാല്‍ അറിയാം ഈ വിജയത്തിനായി ടീം എത്രമാത്രം കൊതിച്ചു എന്ന്.
31 റണ്‍സ് ചേര്‍ക്കുന്നതിനിടെ നാല് മുന്‍നിര ബാറ്റര്‍മാരെ നഷ്ടപ്പെട്ട ഇന്ത്യക്ക് മഹാമേരുവായി നിന്ന വിരാട് കോഹ്‌ലി എന്ന പോരാളിയായ താരത്തിന്റെ ഇച്ഛാശക്തിയാണ് വിജയത്തിന് അടിത്തറയിട്ടത്. അവസാന ഓവറില്‍ 16 റണ്‍സ് ചേര്‍ത്താണ് ഇന്ത്യ വിജയക്കൊടി പാറിച്ചത്.
കളിയുടെ എല്ലാ നാടകീയതകളും അശ്വിന്‍ നേടിയ സിംഗിളില്‍ അവസാനിച്ചപ്പോള്‍ ഇന്ത്യക്ക് സമ്മോഹനമായൊരു ദീപാവലി ആഘോഷത്തിനുള്ള വെടിക്കെട്ടിന്റെ തിരി കൊളുത്തലായി ആ വിജയ നിമിഷം മാറി. അവസാന സെക്കന്‍ഡ് വരെ ആവേശം നിറഞ്ഞു നിന്ന പോരിനൊടുവില്‍ അശ്വിന്‍ ഓടിയെടുത്ത സിംഗിളിന് പിന്നാലെ ഇന്ത്യന്‍ ഡഗൗട്ടില്‍ അക്ഷരാര്‍ഥത്തില്‍ ഒരു പൊട്ടിത്തെറി തന്നെ അരങ്ങേറി.
ഈ ആഘോഷത്തിലെ ദ്രാവിഡിന്റെ ആവേശമാണ് ഇപ്പോള്‍ ശ്രദ്ധേയമായത്. വാക്കുകളേക്കാള്‍ ഈ ദൃശ്യങ്ങള്‍ കണ്ടാല്‍ ഏതൊരു ആരാധകനും ആ വിജയത്തിന്റെ മാറ്റ് ഉള്‍ക്കൊള്ളാന്‍ സാധിക്കും.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
