ഫുട്ബോൾ ഫെഡറേഷന്റെ അച്ചടക്കനടപടി; ബ്ലാസ്റ്റേഴ്സ് അപ്പീൽ നൽകി
കൊച്ചി: ഐഎസ്എല്ലിൽ ബംഗളൂരു എഫ്സിക്കെതിരായ പ്ലേ ഓഫ് മത്സരം പൂര്ത്തിയാക്കാതെ കളം വിട്ട സംഭവത്തില് അഖിലേന്ത്യ ഫുട്ബോള് ഫെഡറേഷന് സ്വീകരിച്ച അച്ചടക്കനടപടിക്കെതിരേ അപ്പീല് നല്കി കേരള ബ്ലാസ്റ്റേഴ്സ്. എഐഎഫ്എഫ് അപ്പീല് കമ്മിറ്റിയിലാണ് ക്ലബ് അപ്പീല് നല്കിയിരിക്കുന്നത്.
മത്സരം പൂർത്തിയാക്കാതെ കളം വിട്ട സംഭവത്തിൽ ബ്ലാസ്റ്റേഴ്സിന് നാല് കോടി രൂപ പിഴയാണ് ഫെഡറേഷന് വിധിച്ചത്. പരിശീലകന് ഇവാന് വുകോമാനോവിച്ചിന് പത്ത് മത്സരങ്ങളില് വിലക്കും അഞ്ച് ലക്ഷം രൂപ പിഴയും ചുമത്തിയിരുന്നു. വിഷയത്തില് പൊതുക്ഷമാപണം നടത്താന് ക്ലബ്ബിനോടും പരിശീലകനോടും നിര്ദേശിച്ചിരുന്നു. ഇതിന്റെ ഭാഗമായി ഏപ്രില് രണ്ടാം തീയതി ക്ലബ്ബും കോച്ച് വുകോമനോവിച്ചും പരസ്യമായി ഖേദം പ്രകടിപ്പിച്ചിരുന്നു. ഇതോടെയാണ് ഇപ്പോള് ക്ലബ്ബിന് സംഭവത്തില് അപ്പീല് നല്കാന് അവസരം കിട്ടിയത്.
മാര്ച്ച് മൂന്നിന് ആയിരുന്നു സംഭവം. ഗോള്രഹിതമായ 90 മിനിറ്റുകള്ക്ക് ശേഷം മത്സരം എക്സ്ട്രാ ടൈമിലേക്ക്. ഇതിനിടെ ബ്ലാസ്റ്റേഴ്സ് ബോക്സിന്റെ പുറത്ത് ബംഗളൂരുവിന് അനുകൂലമായി ഒരു ഫ്രീ കിക്ക് ലഭിക്കുന്നു. 96-ാം മിനിറ്റില് ബ്ലാസ്റ്റേഴ്സ് താരങ്ങളും ഗോള്കീപ്പറും ഫ്രീ കിക്ക് തടയാനായി തയ്യാറെടുക്കും മുമ്പ് സുനില് ഛേത്രി പെട്ടെന്നുതന്നെ കിക്കെടുത്ത് പന്ത് വലയിലെത്തിക്കുകയായിരുന്നു. ബ്ലാസ്റ്റേഴ്സ് താരങ്ങള് തയാറാകും മുന്പാണു കിക്കെടുത്തതെന്ന് താരങ്ങള് വാദിച്ചെങ്കിലും റഫറി ക്രിസ്റ്റല് ജോണ് അത് അംഗീകരിച്ചില്ല. തുടര്ന്ന് ബ്ലാസ്റ്റേഴ്സ് പരിശീലകന് ഇവാന് വുകോമനോവിച്ച് ടീമിനെ തിരികെ വിളിക്കുകയായിരുന്നു.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
