'ലോകകപ്പ് കളിക്കാൻ ആ​ഗ്രഹിച്ചു, കോച്ചിനു സന്ദേശവും അയച്ചു'- വെളിപ്പെടുത്തി ലിയോൺ

സിഡ്നി: ലോകകപ്പ് കളിക്കാനുള്ള ആ​ഗ്രഹം താൻ പരിശീലകൻ ആൻഡ്രു മക്ഡൊണാൾഡിനെ അറിയിച്ചിരുന്നുവെന്നു വെളിപ്പെടുത്തി ഓസ്ട്രേലിയൻ സ്പിന്നർ നതാൻ ലിയോൺ. ലോകകപ്പിനായി ഇന്ത്യയിലേക്ക് പറക്കാൻ താൻ ഒരുക്കമായിരുന്നു. ഇക്കാര്യം താൻ പരിശീലകനെ സന്ദേശത്തിലൂടെ അറിയിച്ചെന്നും ലിയോൺ വെളിപ്പെടുത്തി. 

ലോകകപ്പ് ടീമിൽ ഉണ്ടായിരുന്ന സ്പിന്നർ ആഷ്ടൻ ആ​ഗർ പരിക്കേറ്റ് പുറത്തായിരുന്നു. ഇതോടെ പകരക്കാരനായി മറ്റൊരു സ്പിന്നറെ ടീമിൽ ഉൾപ്പെടുത്തുമെന്നു പ്രതീക്ഷിക്കപ്പെട്ടു. എന്നാൽ ആ​ഗറിനു പകരം മർനസ് ലബുഷെയ്നിനെയാണ് ഓസ്ട്രേലിയ ലോകകപ്പ് ടീമിൽ ഉൾപ്പെടുത്തിയത്. നിലവിൽ ആദം സാംപ മാത്രമാണ് ടീമിലെ ഏക സ്പെഷലിസ്റ്റ് സ്പിന്നർ. 

ആ​ഗർ പുറത്തായ ഘട്ടത്തിലാണ് ലിയോൺ കോച്ചിനു താൻ പത്തോവർ എറിയാൻ തയ്യാറാണെന്നു വ്യക്തമാക്കി ഫോണിൽ സന്ദേശമയച്ചത്. ആഷസ് പരമ്പരയ്ക്കിടെ പരിക്കേറ്റ ലിയോൺ നിലവിൽ വിശ്രമത്തിലാണ്. 

'ആഷ്ടൻ ആ​ഗർ പുറത്തായപ്പോൾ ഞാൻ ആൻഡ്രു മക്ഡൊണാൾഡിനു ഒരു സന്ദേശമയച്ചിരുന്നു. ഞാൻ പത്തോവർ എറിയാൻ സന്നദ്ധനാണെന്നു അതിൽ വ്യക്തമാക്കി. കളിക്കാൻ 100 ശതമാനം ഫിറ്റാണെന്നും അറിയിച്ചു.' 

'ടീമിൽ ഉൾപ്പെട്ടിരുന്നെങ്കിൽ പൂർണമായി സമർപ്പിക്കാനും ഞാൻ തയ്യാറാണെന്നു വ്യക്തമാക്കി. എങ്കിലും നിലവിലെ ടീം മികച്ചതാണ്'- ലിയോൺ വ്യക്തമാക്കി. 

തന്റെ ലോകകപ്പ് ടീം പ്രവേശനവുമായി ബന്ധപ്പെട്ട് ഒരു സ്പിന്നർ കൂടി ടീമിൽ വേണ്ടതായിരുന്നുവെന്ന പരോക്ഷ വിമർശനവും താരം ഉന്നയിക്കുന്നു. എങ്കിലും നിലവിലെ ടീം പോരായ്മകൾ പരിഹരിച്ചു മികവു പുലർത്തുമെന്ന പ്രതീക്ഷയും താരം പങ്കിട്ടു. 

ഈ വാർത്ത കൂടി വായിക്കൂ

ഇന്ത്യൻ സ്പിൻ വലയിൽ ഓസീസ്; ഏഴ് വിക്കറ്റുകൾ വീണു

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ