നാഗ്പുർ: ഏകദിനത്തിൽ അരങ്ങേറ്റം നടത്തിയ ഹർഷിത് റാണയ്ക്ക് ആദ്യം നാണക്കേടിന്റെ റെക്കോർഡ്. പിന്നാലെ ശക്തമായി തിരിച്ചടിച്ച് ഒറ്റ ഓവറിൽ രണ്ട് ഇംഗ്ലീഷ് ബാറ്റർമാരെ മടക്കി തിരിച്ചു വരവ്. അരങ്ങേറ്റത്തിൽ ഒരു ഇന്ത്യൻ ബൗളറുടെ ഏറ്റവും മോശം ബൗളിങിന്റെ നാണക്കേടാണ് താരത്തിന്റെ പേരിലായത്. നാണക്കേടിന്റെ റെക്കോർഡുണ്ടെങ്കിലും അരങ്ങേറ്റം താരം അവിസ്മരണീയമാക്കി. മത്സരത്തിൽ ഹർഷിത് റാണ 3 വിക്കറ്റുകൾ സ്വന്തമാക്കി.
റാണ എറിഞ്ഞ ആറാം ഓവറിൽ പിറന്നത് 26 റൺസാണ്. മൂന്ന് സിക്സും രണ്ട് ഫോറും സഹിതം ഇംഗ്ലണ്ട് ഓപ്പണർ ഫിൽ സാൾ‌ട്ടാണ് റാണയെ തലങ്ങും വിലങ്ങും പറത്തിയത്. ഒറ്റ ഓവറിൽ താരം വഴങ്ങിയത് 26 റൺസ്. തുടക്കത്തിൽ റാണയുടെ ഓവർ സാൾട്ട് മെയ്ഡനാക്കിയിരുന്നു. ഇതിന്റെ കുറവ് താരം ആറാം ഓവറിൽ തീർക്കുകയായിരുന്നു.
റാണ എറിഞ്ഞ ആറാം ഓവറിലെ ആദ്യ പന്ത് സ്ലോഗ് ടോപ് എഡ്ജായി ഗാലറിയിലെത്തി. രണ്ടാം പന്തിൽ അപ്പർ കട്ട് ബൗണ്ടറി. മൂന്നാം പന്തും സ്ലോഗ് സ്വീപ്പിലൂടെ സിക്സ്. നാലാം പന്ത് അതിവേഗം മിഡ് വിക്കറ്റിലൂടെ ഫോർ. അഞ്ചാം പന്തിൽ റൺസില്ല. അവസാന പന്തിൽ പുൾ ഷോട്ടിലൂടെ വീണ്ടും സിക്സ്. ആകെ പിറന്നത് 26 റൺസ്.
മത്സരത്തിൽ സാൾട്ട് 26 പന്തിൽ 43 റൺസെടുത്തു മടങ്ങി. താരം റണ്ണൗട്ടായതാണ് ഇന്ത്യക്ക് ബ്രേക്ക് ത്രൂവായി മാറിയത്. പിന്നീട് ഇംഗ്ലണ്ടിനു കൃത്യമായ ഇടവേളയിൽ വിക്കറ്റുകൾ വീണു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
