ദുബായ്: ഐസിസിയുടെ എലീറ്റ് പാനലിലെ ഏക ഇന്ത്യന്‍ അംപയറായ നിതിന് മേനോന്‍ ചാംപ്യന്‍സ് ട്രോഫി ടൂര്‍ണമെന്റില്‍ പങ്കെടുക്കില്ല. ഫെബ്രുവരി 19 ന് ആരംഭിക്കുന്ന ടൂര്‍ണമെന്റില്‍ നിന്ന് വ്യക്തിപരമായ കാരണങ്ങളാല്‍ വിട്ടുനില്‍ക്കുന്നുവെന്നാണ് നിതിന് മേനോന്‍ അറിയിച്ചത്. മുന്‍ ഇന്ത്യന്‍ പേസ് ബോളറും നിലവില്‍ മാച്ച് റഫറിയുമായ ജവഗല്‍ ശ്രീനാഥും ചാംപ്യന്‍സ് ട്രോഫി ഒഴിവാക്കുമെന്നാണ് വിവരം.
പാകിസ്ഥാനിലേക്ക് പോകാനുള്ള ഐസിസി നിര്‍ദേശത്തെ തുടര്‍ന്നാണ് വ്യക്തി പരമായ കാരണങ്ങള്‍ കാണിച്ച് നിതിന് മേനോന്‍ ടൂര്‍ണമെന്റില്‍ നിന്ന് വിട്ടുനില്‍ക്കുന്നതായി അറിയിച്ചതെന്ന് ബിസിസിഐ വൃത്തങ്ങള്‍ പറഞ്ഞു. മത്സരങ്ങള്‍ക്ക് നിഷ്പക്ഷ അംപയര്‍മാര്‍ വേണമെന്ന നിബന്ധന പ്രകാരം ദുബായില്‍ നടക്കുന്ന ഇന്ത്യയുടെ മത്സരങ്ങള്‍ നിതിന് നിയന്ത്രിക്കാന്‍ സാധിക്കുമായിരുന്നില്ല. ബാക്കി മത്സരങ്ങള്‍ക്ക് വേദിയാകുന്നത് പാകിസ്ഥാനായതിനാല്‍, നിതിന് മേനോന്‍ ടൂര്‍ണമെന്റില്‍നിന്നു തന്നെ പിന്‍മാറുകയായിരുന്നുവെന്നാണ് വിവരം.
ടൂര്‍ണമെന്റില്‍നിന്ന് ഒഴിവാക്കണമെന്ന് ഐസിസിയോട് ആവശ്യപ്പെട്ടതായി ശ്രീനാഥും പ്രതികരിച്ചെന്നാണ് റിപ്പോര്‍ട്ട്. നിലവില്‍ ഇന്ത്യ ഇംഗ്ലണ്ട് ഏകദിന പരമ്പരയുമായി ബന്ധപ്പെട്ട് നാഗ്പുരിലാണ് ശ്രീനാഥ്, ചാംപ്യന്‍സ് ട്രോഫിയില്‍നിന്ന് ലീവ് അനുവദിക്കണമെന്ന് ശ്രീനാഥ് ഐസിസിയോട് അഭ്യര്‍ഥിച്ചതായാണ് റിപ്പോര്‍ട്ട്. നിലവില്‍ ഇന്ത്യയില്‍നിന്ന് മാച്ച് റഫറിമാരുടെ എലൈറ്റ് പാനലില്‍ അംഗമായ ഏക ഇന്ത്യക്കാരനാണ് ജവഗല്‍ ശ്രീനാഥ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
