അഹമ്മദാബാദ്: രഞ്ജി ട്രോഫി സെമി ഫൈനലിലെ സൂപ്പര്‍ ക്ലൈമാക്‌സില്‍ ഗുജറാത്തിനെ മറികടന്ന കേരളത്തിന്റെ അവസാന വിക്കറ്റ് നേട്ടം ഭാഗ്യത്തിനൊപ്പം അവിശ്വസനീയതയും കൂടിച്ചേര്‍ന്നതായി. മത്സരത്തിന്റെ 175-ാം ഓവറില്‍ അതീവ നാടകീയമായിട്ടാണ് ഗുജറാത്തിന്റെ പത്താം വിക്കറ്റ് വീണത്.
ആദിത്യ സര്‍വതെയെ ബൗണ്ടറി കടത്താന്‍ ഗുജറാത്തിന്റെ വാലറ്റക്കാരന്‍ അര്‍സാന്‍ നാഗ്‌വസ്വല്ല അടിച്ച പന്ത് ഫീല്‍ഡറായിരുന്ന സല്‍മാന്‍ നിസാറിന്റെ ഹെല്‍മറ്റില്‍ ഇടിച്ച് ഉയര്‍ന്നു പൊങ്ങി. സ്ലിപ്പില്‍ ഫീല്‍ഡ് ചെയ്ത ക്യാപ്റ്റന്‍ സച്ചിന്‍ ബേബി ക്യാച്ചെടുക്കുകയായിരുന്നു. ആശയക്കുഴപ്പത്തിനൊടുവില്‍ അംപയര്‍ ഔട്ട് വിളിച്ചതോടെ കേരളത്തിന് വിലയേറിയ രണ്ട് റണ്‍സ് ലീഡ് സ്വന്തമായി.
അര്‍ധ സെഞ്ചറി നേടിയ ജയ്മീത് പട്ടേല്‍ (177 പന്തില്‍ 79 റണ്‍സ്) സിദ്ധാര്‍ഥ് ദേശായി (164 പന്തില്‍ 30), അര്‍സാന്‍ നാഗ്‌വസ്വല്ല (48 പന്തില്‍ 10) എന്നിവരാണ് അവസാന ദിവസം പുറത്തായ ഗുജറാത്ത് ബാറ്റര്‍മാര്‍. മൂന്നു പേരുടെ വിക്കറ്റും ആദിത്യ സര്‍വതേയാണ് സ്വന്തമാക്കിയത്. പ്രിയജിത് സിങ് ജഡേജ മൂന്നു റണ്‍സുമായി പുറത്താകാതെ നിന്നു.
രഞ്ജി ട്രോഫി ടൂര്‍ണമെന്റിന്റെ ചരിത്രത്തില്‍ ആദ്യമായിട്ടാണ് കേരളം ഫൈനലിലെത്തുന്നത്. ക്വാര്‍ട്ടര്‍ ഫൈനലില്‍ ജമ്മു കശ്മീരിനെതിരെ ഒരു റണ്‍സിന്റെ ഒന്നാമിന്നിങ്‌സ് ലീഡിന്റെ പിന്‍ബലത്തിലായിരുന്നു കേരളം സെമി ഫൈനലില്‍ കടക്കുന്നത്.
സല്‍മാന്‍ നിസാര്‍, മുഹമ്മദ് അസ്ഹറുദ്ദീന്‍, സച്ചിന്‍ ബേബി, ജലജ് സക്‌സേന, ആദിത്യ സര്‍വതെ, എം ഡി നീധീഷ് തുടങ്ങിയവരുടെ മികച്ച പ്രകടനങ്ങളാണ് ടൂര്‍ണമെന്റില്‍ കേരളത്തിന് തുണയായത്. പരിശീലകനായ മുന്‍ ഇന്ത്യന്‍ താരം അമേയ് ഖുറാസിയയുടെ തന്ത്രങ്ങളും കേരളത്തിന്റെ കുതിപ്പില്‍ നിര്‍ണായകമായിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
