ഹൈദരാബാദ്: വിജയ് ഹസാരെ ട്രോഫി ഏകദിന പോരാട്ടത്തില്‍ തകര്‍പ്പന്‍ ജയവുമായി കേരളം. ത്രിപുരയെ കേരളം 145 റണ്‍സിനു തകര്‍ത്തു. ആദ്യം ബാറ്റ് ചെയ്ത കേരളം നിശ്ചിത ഓവറില്‍ 5 വിക്കറ്റ് നഷ്ടത്തില്‍ 327 റണ്‍സ് കണ്ടെത്തി. ത്രിപുരയുടെ പോരാട്ടം 42.3 ഓവറില്‍ 182 റണ്‍സില്‍ അവസാനിപ്പിച്ചാണ് കേരളം മിന്നും ജയം സ്വന്തമാക്കിയത്.
ആദിത്യ സാര്‍വതെ, എംഡി നിധീഷ് എന്നിവര്‍ മൂന്ന് വിക്കറ്റുകള്‍ വീഴ്ത്തി ത്രിപുരയെ തകര്‍ക്കുന്നതില്‍ നിര്‍ണായകമായി. ജലജ് സക്‌സേന, ബേസില്‍ തമ്പി എന്നിവര്‍ ഓരോ വിക്കറ്റെടുത്തു.
ക്യാപ്റ്റന്‍ മന്‍ദീപ് സിങ് (78) മാത്രമാണ് ത്രിപുര നിരയില്‍ പിടിച്ചു നിന്നത്. തേജസ്വി ജയ്‌സ്വാള്‍ (23), ആര്‍എ ഡേയ് (24) എന്നിവരും പ്രതിരോധിക്കാന്‍ ശ്രമിച്ചു.
നേരത്തെ കൃഷ്ണ പ്രസാദ് നേടിയ തകര്‍പ്പന്‍ സെഞ്ച്വറിയാണ് കേരളത്തിന് മികച്ച സ്‌കോര്‍ സമ്മാനിച്ചത്. 110 പന്തുകള്‍ നേരിട്ട് 8 സിക്സും 6 ഫോറും സഹിതം 135 റണ്‍സ് അടിച്ചെടുത്തു.
ഓപ്പണര്‍ രോഹന്‍ കുന്നുമ്മല്‍ അര്‍ധ സെഞ്ച്വറി നേടി. താരം 57 റണ്‍സ് കണ്ടെത്തി. ക്യാപ്റ്റന്‍ സല്‍മാന്‍ നിസാറാണ് തിളങ്ങിയ മറ്റൊരു താരം. ക്യാപ്റ്റന്‍ 34 പന്തില്‍ 42 റണ്‍സുമായി പുറത്താകാതെ നിന്നു.
ഓപ്പണര്‍ ആനന്ദ് കൃഷ്ണന്‍ (22), മുഹമ്മദ് അസ്ഹറുദ്ദീന്‍ (26) എന്നിവര്‍ മികച്ച രീതിയില്‍ മുന്നേറവെ പുറത്തായി. കളി അവസാനിക്കുമ്പോള്‍ സല്‍മാനൊപ്പം 20 റണ്‍സുമായി ഷറഫുദ്ദീനും പുറത്താകാതെ നിന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
