കൊച്ചി: നടി ആക്രമിക്കപ്പെട്ട സംഭവവുമായി ഇപ്പോള്‍ നടക്കുന്ന വിവാദം അമ്മ എക്‌സിക്യൂട്ടിവ് യോഗത്തില്‍ ചര്‍ച്ച ചെയ്യില്ലെന്ന് സംഘടനയുടെ പ്രസിഡന്റ് ഇന്നസെന്റ്. ഈ കേസ് കോടതിയുടെ പരിഗണനയിലാണുള്ളത്. കോടതിയിലിരിക്കുന്ന വിഷയത്തില്‍ സംഘടന ചര്‍ച്ച ചെയ്തതുകൊണ്ടു കാര്യമില്ലെന്ന് ഇന്നസെന്റ് പറഞ്ഞു.
നടി ആക്രമിക്കപ്പെട്ട സംഭവത്തില്‍ അന്വേഷണം നന്നായിട്ടാണ് നടക്കുന്നത്. കുറ്റവാളികള്‍ ആരായാലും ശിക്ഷിക്കപ്പെടണം എന്നതാണ് അമ്മയുടെ നിലപാട്. അത് ആരുതന്നെയായാലും ഒപ്പം നില്‍ക്കില്ല. സിനിമാ രംഗത്ത് ക്രിമിനലുകള്‍ ഉള്ളതായി അറിയില്ലെന്നും ഇന്നസെന്റ പറഞ്ഞു. അമ്മ എക്‌സിക്യുട്ടിവ് യോഗത്തിനു മുമ്പായാണ് ഇന്നസെന്റിന്റെ പ്രതികരണം.
നടി ആക്രമിക്കപ്പെട്ട സംഭവവുമായി ബന്ധപ്പെട്ട് അമ്മയുടെ നിലപാട് ഏറെ വിമര്‍ശനവിധേയമായിരുന്നു. വിവാദത്തില്‍ ഇരുപക്ഷത്തായാണ് അമ്മയിലെ അംഗങ്ങള്‍ അണിനിരന്നത്. അതോടൊപ്പം ആദ്യ ദിനങ്ങളില്‍ സംഭവത്തെ അപലപിച്ചു രംഗത്തുവന്നവര്‍ പിന്നീട് നടിക്കൊപ്പം നിന്നില്ലെന്നും ആക്ഷേപം ഉയര്‍ന്നു. ഈ പശ്ചാത്തലത്തില്‍ ഇന്നു നടക്കുന്ന എക്‌സിക്യു്ട്ടിവ് യോഗത്തില്‍ ഇക്കാര്യത്തില്‍ ചര്‍ച്ച നടക്കും എന്നായിരുന്നു സൂചനകള്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
