കസ്റ്റഡി മരണം :  ജുഡീഷ്യൽ അന്വേഷണം വേണമെന്ന് രമേശ് ചെന്നിത്തല

കൊച്ചി : ശ്രീജിത്തിന്റെ കസ്റ്റഡി മരണത്തിൽ ജുഡീഷ്യൽ അന്വേഷണം വേണമെന്ന് പ്രതിപക്ഷ നേതാവ് രമേശ് ചെന്നിത്തല. സിറ്റിം​ഗ് ജഡ്ജി കേസ് അന്വേഷിക്കണം. പൊലീസുകാർക്കെതിരെ കൊലക്കുറ്റത്തിന് കേസെടുക്കണം. ഭീകരമായ പൊലീസ് മർദനത്തിന്റെ ഇരയാണ് ശ്രീജിത്തെന്നും രമേശ് ചെന്നിത്തല പറഞ്ഞു. ശ്രീജിത്തിന്റെ വീട്ടിലെത്തിയ പ്രതിപക്ഷ നേതാവ് കുടുംബാം​ഗങ്ങളുമായി സംസാരിച്ചശേഷം മാധ്യമങ്ങളോട് പ്രതികരിക്കുകയായിരുന്നു. 

ശ്രീജിത്തിന്റെ മരണത്തിൽ ആരോപണ വിധേയരായ മുഴുവൻ പൊലീസ് ഉദ്യോ​ഗസ്ഥരെയും അന്വേഷണം കഴിയും വരെ മാറ്റിനിർത്തണം. വിഷയത്തിൽ മുഖ്യമന്ത്രി മൗനം വെടിയണമെന്നും പ്രതിപക്ഷ നേതാവ് ആവശ്യപ്പെട്ടു. രാവിലെയാണ് പ്രതിപക്ഷ നേതാവ് രമേശ് ചെന്നിത്തല ശ്രീജിത്തിന്റെ വീട്ടിലെത്തിയത്. അര മണിക്കൂറോളം ശ്രീജിത്തി​ന്റെ വീട്ടിൽ ചെലവഴിച്ച ചെന്നിത്തല കുടുംബാംഗങ്ങളെ ആശ്വസിപ്പിച്ചു. 

വി.ഡി സതീശനും മറ്റു പ്രാദേശിക കോൺഗ്രസ്​ നേതാക്കളും പ്രതിപക്ഷ നേതാവിന് ഒപ്പമുണ്ടായിരുന്നു. ശ്രീജിത്തിന്റെ പേര് പ്രതിപ്പട്ടികയിൽ നൽകിയത് സിപിഎമ്മാണെന്ന് വിഡി സതീശൻ എംഎൽഎ ആരോപിച്ചു.  ബി.ജെ.പി സംസ്​ഥാന അധ്യക്ഷൻ കുമ്മനം രാജശേഖരനും ഇന്ന്​ ശ്രീജിത്തിന്റെ വീട്​ സന്ദർശിക്കുമെന്ന്​ അറിയിച്ചിട്ടുണ്ട്​.