കോഴിക്കോട് : വടകര ലോക്‌സഭാ മണ്ഡലത്തില്‍ പി ജയരാജനെ സിപിഎം സ്ഥാനാര്‍ത്ഥിയാക്കണമെന്ന് ലോക്‌സഭ മണ്ഡലം കമ്മിറ്റി നിര്‍ദേശിച്ചു. ജയരാജനെ പോലെ കരുത്തനായ സ്ഥാനാര്‍ത്ഥിയെ നിര്‍ത്തി മണ്ഡലം തിരിച്ചുപിടിക്കണമെന്നാണ് സമിതിയില്‍ ഉയര്‍ന്ന അഭിപ്രായം. ഇവിടെ ഉയര്‍ന്ന മറ്റു പേരുകളേക്കാള്‍ കൂടുതല്‍ ജയസാധ്യത ജയരാജനാണെന്നും കമ്മിറ്റി വിലയിരുത്തി.
വടകരയില്‍ ഡിവൈഎഫ്‌ഐ അളിലേന്ത്യാ പ്രസിഡന്റ് മുഹമ്മദ് റിയാസ്, ജനാധിപത്യ മഹിളാ അസോസിയേഷന്‍ സെക്രട്ടറി പി സതീദേവി, ഡിവൈഎഫ്‌ഐ മുന്‍ അഖിലേന്ത്യാ പ്രസിഡന്റ് വി ശിവദാസന്‍ എന്നിവരുടെ പേരുകളും ഉയര്‍ന്നിരുന്നു. എന്നാല്‍ കരുത്തനായ സ്ഥാനാര്‍ത്ഥിയെ തന്നെ രംഗത്തിറക്കി മണ്ഡലം തിരികെ പിടിക്കണമെന്ന ആവശ്യം കമ്മറ്റിയില്‍ ഉയര്‍ന്നു.
കോഴിക്കോട് ലോക്‌സഭാ മണ്ഡലത്തില്‍ എംഎല്‍എ പി പ്രദീപ് കുമാറിന്റെ പേരും ലോക്‌സഭാ മണ്ഡലം കമ്മിറ്റി അംഗീകരിച്ചു. മണ്ഡലത്തിലേക്ക് പ്രദീപ് കുമാറിന്റെ പേര് മാത്രമാണ് നിര്‍ദേശിക്കപ്പെട്ടത്. എംകെ രാഘവനെ പരാജയപ്പെടുത്താന്‍ പ്രദീപ് കുമാറിന്റെ ജനകീയതയ്ക്ക് സാധിക്കുമെന്നും കമ്മിറ്റി വിലയിരുത്തി. മണ്ഡലം കമ്മിറ്റികളുടെ നിര്‍ദേശം നാളെ ചേരുന്ന സിപിഎം സംസ്ഥാന സെക്രട്ടേറിയറ്റ്, സംസ്ഥാന സമിതി യോഗങ്ങള്‍ പരിശോധിക്കും. അതിന് ശേഷമായിരിക്കും സ്ഥാനാര്‍ത്ഥി പട്ടിക സംബന്ധിച്ച് അന്തിമ തീരുമാനം പുറത്തുവിടുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
