കോഴിക്കോട്: പിടിക്കുമെന്ന് ഉറപ്പായപ്പോള്‍ മോഷ്ടിച്ച സ്വര്‍ണ്ണാഭരണം വീട്ടുമുറ്റത്ത് ഉപേക്ഷിച്ച് മോഷ്ടാവ് കടന്നുകളഞ്ഞു. കൊടുവള്ളി കളരാന്തിരി ചെന്നനംപുറം മൊയ്തീന്‍ കുട്ടിയുടെ വീട്ടില്‍ നിന്നും കഴിഞ്ഞ ബുധനാഴ്ചയാണ് 5 പവന്‍ സ്വര്‍ണാഭരണം മോഷണം പോയത്.
വീട്ടിനുളളിലെ തട്ടിന്‍ മുകളില്‍ അഴിച്ചു വെച്ചതായിരുന്നു ആഭരണം. ആ സമയം വീട്ടില്‍ തന്റെ മകന്‍ ജുനൈദിനൊപ്പമെത്തിയ കൂട്ടുകാരനല്ലാതെ മറ്റാരും ഉണ്ടായിരുന്നില്ല. ആ നിലക്ക് വീട്ടുകാര്‍ സ്വന്തം നിലയ്ക്ക് അന്വേഷണം നടത്തുകയും ചെയ്തു. എന്നാല്‍ സംശയിക്കുന്നയാള്‍ കുറ്റം സമ്മതിക്കാതിരുന്നതിനെ തുടര്‍ന്ന് കൊടുവള്ളി പൊലീസില്‍ പരാതി നല്‍കി.
പൊലീസ് സംശയമുള്ളയാളെ വിളിപ്പിച്ച് ചോദ്യം ചെയ്ത് വിട്ടയച്ചിരുന്നു. ഇന്ന് രാവിലെ വീണ്ടും സ്‌റ്റേഷനില്‍ എത്താന്‍ ആവശ്യപ്പെട്ടാണ് വിട്ടയച്ചത്. അതിനിടയിലാണ് ഇന്നു പുലര്‍ച്ചെ വീട്ടുകാര്‍ പുറത്തിറങ്ങിയപ്പോള്‍ വീടിന്റെ മുന്‍വശത്ത് സ്വര്‍ണാഭരണം കാണുന്നത്. ഇതോടെ വീട്ടുകാര്‍ വിവരം കൊടുവള്ളി പൊലീസില്‍ അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
