കോഴിക്കോട്: മതം ഉപേക്ഷിക്കുകയാണെന്ന് അറിയിച്ചതിന് പിന്നാലെ പേര് മാറ്റി സംവിധായകൻ അലി അക്ബർ. 'രാമസിംഹൻ' എന്നാണ് സംവിധായകന്റെ പുതിയ പേര്.
ഫെയ്സ്ബുക്ക് ലൈവിലൂടെ ആയിരുന്നു താൻ മതം മാറുന്ന കാര്യം അലി അക്ബർ അറിയിച്ചത്. സംയുക്ത സേനാ മേധാവി ബിപിൻ റാവത്ത് അന്തരിച്ചപ്പോൾ ആ വാർത്തയ്ക്കു നേരെ ഫെയ്സ്ബുക്കിൽ ആഹ്ളാദ പ്രകടനം നടന്നെന്നും അതിൽ പ്രതിഷേധിച്ചാണ് മതം വിടുന്നതെന്നും അലി അക്ബർ പറഞ്ഞിരുന്നു.
'എന്റെ പേര് നാളെ മുതൽ രാമ സിംഹൻ എന്നാക്കുകയാണ്. സംസ്കാരത്തോട് ചേർന്ന് നിന്നപ്പോൾ കൊല ചെയ്യപ്പെട്ട വ്യക്തിത്വമാണ് രാമസിംഹൻ. നാളെ മുതൽ അലി അക്ബറിനെ നിങ്ങൾക്ക് രാമസിംഹൻ എന്ന് വിളിക്കാം. നല്ല പേരാണത്'- അലി അക്ബർ പറഞ്ഞു.
ബിപിൻ റാവത്തിന്റെ മരണ വാർത്തയ്ക്ക് സോഷ്യൽ മീഡിയയിൽ ചിലർ സ്മൈലികൾ ഇടുന്നതായി ചൂണ്ടിക്കാട്ടി അലി അക്ബർ കഴിഞ്ഞ ദിവസം ഫെയ്സ്ബുക്ക് ലൈവ് നടത്തിയിരുന്നു. എന്നാൽ ലൈവ് വീഡിയോയിലെ വർഗീയ പരാമർശം ചൂണ്ടിക്കാട്ടി ഫെയ്സ്ബുക്ക് സംവിധായകന്റെ അക്കൗണ്ട് ഒരു മാസത്തേക്ക് നിർജ്ജീവമാക്കി. തുടർന്ന് മറ്റൊരു ഫെയ്സ്ബുക്ക് അക്കൗണ്ടിലൂടെയാണ് താൻ മതം വിടുന്നതായി പ്രഖ്യാപിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ